Македонија
Изборните резултати го клекнаа СДСМ на колена, но под мое раководство повторно ќе биде победничка партија: Филипче поднесе кандидатура за претседател
Поранешниот министер за здравство и актуелен пратеник Венко Филипче денеска ја поднесе кандидатурата за претседател на СДСМ.
„Ова е убав ден за демократијата. Овој ден означува симболично почеток на реформа и на промена во партијата. Ќе поднесам и програма во која се напишани основните постулати на тоа како, доколку бидам избран за претседател ќе работам, тоа е: посветено, професионално со целата моја енергија и знаење. Во оваа трка влегувам сам, немам никавки преговори со никого“, нагласи Филипче.
Оцени дека не треба да се потпишуваат некакви изјави, како што тоа некој го предлага.
„Тимот треба секој сам да го состави, а не од почеток да се прават поделби и да се поставуваат некакви правила. Треба да имаме фер-плеј и за тоа ќе разговарам со сите кои ќе се кандидираат за лидерската функција, со цел кој и да победи да имаме соработка и разбирање“, рече Филипче и појасни дека ниеден член на СДСМ нема да биде оставен по страна и вети дека ќе биде отворен и достапен за секој член.
На тие кои ќе бидат дел од тимот, им порача дека ќе имаат многу работа.
„Изборните резултати ја клекнаа СДСМ на колена, некои го поставуваат прашањето дали партијата воопшто ќе опстои. Но сметам дека не само што со мое раководење СДСМ ќе опстои, туку повторно ќе биде победничка партија. Ги повикувам сите што имаат ентузијазам да работат, да ни се приклучат и да дадат придонес“, рече Филипче.
На прашањето за поддршката од другите членови во партијата или конкретно од Зоран Заев и дали смета дека тој ќе биде во неговата сенка, Филипче кажа дека слушнал такви коментари и истакна:
„Доколку бидам претседател, за кратко време ќе докажам дека ќе владеам со мојот интегритет и достоинство. Тоа што имам одлични релации со Заев говори за мене, зашто имам такви добри релации и со други сегашни и поранешни функционери и со членството, а тие се главни предуслови, обединувањето да се случи многу брзо“.
На прашањето зошто се кандидирал, одговори дека оценил дека ги разбрал пораките од членовите на партијата и дека знае како да одговори на предизвикот.
„Имам одлична комуникација со сите членови и сметам дека е тоа еден од факторите за брзо обединување во партијата. Сите размислувања ќе бидат вградени во програмата. Членството ќе почувствува дека е дел од раководењето со партијата. Ќе се либерализира и изборот на раководни кадри на локално ниво“.
Рокот за доставување на кандидатури истекува утре, а изборот на нов претседател на СДСМ е закажан за 30 јуни.
Свои кандидатури денеска се очекува да поднесат и поранешната министерка за одбрана и актуелна пратеничка, Славјанка Петровска и актуелниот директор на ТИРЗ, Јован Деспотовски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
ВМРО-ДПМНЕ: Орбан го пукна балонот на СДС, парите за кредитот се европски, а не кинески
Орбан го пукна балонот на СДС, парите за кредитот се европски, а не кинески. СДС со денови и месеци шири лаги дека парите од унгарскиот кредит се кинески, сега сите нивни лаги се распрснаа. Богданка Кузеска велеше: „Парите за унгарскиот кредит се всушност кинески пари”, велат од ВМРО-ДПМНЕ.
„Вчера премиерот на Унгарија, господин Виктор Орбан јасно кажа: ” Она што се однесува до заемот, кинески заем не можеме да даваме, кинески пари не можеме да даваме. Бидејќи ние со Кина имаме договор сите пари кои доаѓаат од Кина одат на конкретни проекти за развој во Унгарија. Значи кинески пари не можеме да даваме, европски пари можеме и тие ќе ви ги даваме.” Условите од кредитот се исклучително поволни за Македонија. Со каматна стапка од 3.2%, ги добиваме најдобрите услови на пазарот моментално. Дополнително рокот за отплата е 15 години, од кои 3 години се грејс период. Стопанството ќе добие 250 милиони евра од тие пари по истите услови по кои и зема државата. Општините ќе ги добијат остатокот од 250 милиони евра, кои ќе бидат наменети за капитални проекти. СДС се противи на развојот, СДС сака Македонија да стагнира, затоа се против Унгарскиот кредит, а во истовреме се и лицемерни, затоа што нивните градоначалници први поитаа да конкурираат за парите кои ќе ги дава владата. СДС се прочитана книга. Македонија економски ќе се трансформира и тоа СДС не може да го запре“, велат од партијата.
Македонија
Министерот за јавна администрација, Горан Минчев, оствари средба со ЕУ Амбасадорот Рокас
Министерот за јавна администрација, Горан Минчев, одржа средба со новиот ЕУ Аамбасадор, Н.Е. Михалис Рокас. На овој состанок се разгледаа тековните и планираните иницијативи на Министерството, со акцент на реформите во јавниот сектор.
Двајцата соговорници истакнаа значајната улога на Европската Унија како клучен партнер во напорите за подобрување на јавната администрација. Министерот Минчев посочи дека оваа средба е значаен чекор кон создавање на професионална и квалитетна јавна администрација, која ќе служи на граѓаните.
Амбасадорот Рокас потврди дека ЕУ е подготвена да обезбеди поддршка и ресурси за реформите, кои ќе имаат позитивен ефект не само на вработените во јавниот сектор, туку и на целото општество. Тој нагласи важноста на редовниот дијалог за поддршка на реформите, со цел подобрување на јавната администрација.
Министерот Минчев нагласи дека владата чекори по европскиот пат и дека нема друга алтернатива. Соработката со ЕУ е клучна за креирање квалитетни закони, кои ќе бидат ефективно имплементирани во иднина.
На крајот, Министерот Минчев го запозна Амбасадорот Рокас со активностите на Министерството за јавна администрација во изминатите 90 дена. Амбасадорот ги поздрави напорите на Министерството за јавна администрација и целата Влада за почетокот на реформската агенда , како и планот и роковникот за истата.
Македонија
Склучен Меморандум за соработка помеѓу Државниот завод за статистика и Царинската управа
Државниот завод за статистика електронски ќе ги презема податоците за надворешна трговија од Царинската управа. Ова е утврдено со Меморандумот за соработка, што беше потпишан од страна на директорот на Државниот завод за статистика, Дејан Станков и директорот на Царинската управа, Бобан Николовски.
„Преземањето на податоците од Царинската управа преку веб-сервиси е особено важно за обезбедување навременост и заштита на податоците како и понатамошно хармонизирање, модернизирање и унапредување на системите“ истакна Станков.
Директорот Станков, на денешното потпишување на Меморандумот, потенцираше дека институцијата вложува напори за дигитализација на процесите и зголемено користење на административните извори при продукција на официјалните статистички податоци.
Меморандумот е во насока на унапредување на меѓуинституционалната соработка преку размена на податоци и повисок степен на дигитализација.
„Царинската управа е посветена на процесот на унапредување на меѓуинституционалната соработка, што крајно треба да ни овозможи креирање одржлив економски раст. Ваквиот чекор е само дел од нашите заложби за заедничко делување во насока на подобрување на условите за водење бизнис. Сетовите на податоци што ги обезбедуваме во делот на надворешно трговската размена овозможуваат компаниите да направат истражување на пазарот и дефинирање на нивните стратегии, за економски студии, но и за унапредување на трговските политики на државно ниво“, истакна директорот на Царинската управа, Бобан Николовски.
И двете страни ја искажаа својата заложба за натамошно продлабочување на соработката, а потпишувањето на Меморандумот ги зајакнува и унапредува веќе воспоставените практики на размена на информации и податоци.