Европа
Фон дер Лајен: Овие избори ни испратија две пораки
Кандидатот на Европската народна партија за претседател на Комисијата, Урсула фон дер Лајен, е уверена дека ќе добие нов мандат и потребното мнозинство во новоизбраниот Европски парламент.
„Да, уверена сум за новиот мандат, но секако има уште многу работа пред мене“, изјави Фон дер Лајен.
Во изјавата по објавувањето на првите привремени резултати за Европскиот парламент, таа изрази задоволство од успехот на Европската народна партија (ЕПП), која и натаму останува со најмногу претставници и сидро на стабилноста.
„Овие избори ни испратија две пораки, првата е дека сè уште постои центристичко мнозинство за силна Европа и тоа е клучно за стабилноста. Но, исто така е точно дека екстремите од левицата и од десницата добија поддршка и затоа овој резултат бара уште поголема одговорност од централните партии“, рече Фон дер Лајен, водечкиот кандидат на ЕПП.
Таа најави дека од денеска ќе стапи во контакт со другите две водечки политички групи, социјалдемократите и либералите, со кои сака да воспостави широка коалиција за силна Европа. Таа рече дека секој што е проевропски, кој ја поддржува Украина и владеењето на правото, е добредојден.
Таа посочи дека светот е во превирања, дека силите внатре и надвор од ЕУ се обидуваат да ја дестабилизираат и ослабат Европа.
„Никогаш нема да го дозволиме тоа. Овие изборни резултати покажуваат дека мнозинството Европејци сакаат силна Европа“, рече таа.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Четиринаесетгодишно девојче е киднапирано во Грција, во месноста Лариса
Четиринаесетгодишно девојче е киднапирано во Грција, во месноста Лариса, а активирана е „Амберт алерт“ – килибарна тревога. Девојчето Хрисула Хрисобаланти исчезнало на 27 јуни околу 20.30 часот. Се претпоставува дека девојчето било киднапирано од постаро лице.
Медиумите пренесуваат дека девојчето е високо 155 сантиметри, тешко 55 килограми, долга кафена коса и темнозелени очи.
Во моментот на нејзиното исчезнување носела зелени бермуди, бела маица и бели влечки.
Грчките власти пред неколку дена известија дека трагаат по девојчето Константина-Ирини Р.(16), кое исчезна од предградието Ахарнес во Атина.
Според грчките медиуми, девојчето последен пат била видена во неделата на 16 јуни во вечерните часови.
Европа
Пет лица загинаа во напад со беспилотно летало во руската област Курск, меѓу нив и деца
Пет лица загинаа во напад со беспилотно летало во руската област Курск во близина на границата со Украина, објави регионалниот гувернер Алексеј Смирнов на Телеграм.
„Меѓу жртвите има и две деца. Удрена е куќа во селото Городиште во Рилската околија. Двајца други членови на семејството, од кое се жртвите, се во тешка состојба“, додаде Смирнов.
Претходно руското Министерство за одбрана соопшти дека се уништени шест украински беспилотни летала над неколку руски региони, вклучувајќи ги Тверската, Белгородската и Брјанската област, како и над Крим.
Сообраќајот по Кримскиот мост бил во прекин околу еден час рано утринава и сега вкупно околу 600 автомобили се собрани од двете страни на мостот
Европа
Италијанскиот остров го забрани доаѓањето на туристи поради недостиг на вода
Италијанскиот остров Капри денеска го забрани пристигнувањето на туристи поради недостиг на вода предизвикан од проблеми со снабдувањето од копното.
Градоначалникот на Капри, Паоло Фолко, ја прогласи забраната во седум часот наутро, поради што неколку фериботи веќе на пат кон островот мораа да се вратат назад.
Компанијата задолжена за снабдување на островот со вода објави дека има технички потешкотии во четвртокот, а иако подоцна објави дека ги решила, на Капри се уште му недостасува вода.
„Ситуацијата се влошува“
За време на објавувањето на забраната, Фалко предупреди на вонредна ситуација, велејќи дека иако во петокот имало малку вода на островот, акумулациите се празни.
„Ситуацијата се влошува со пристигнувањето на илјадници туристи секој ден во Капри“, рече тој.
„Забраната останува до понатамошно известување“
Жителите на тој остров во близина на Неапол имаат право на 25 литри вода за пиење по домаќинство, најави градоначалникот.
Забраната за пристигнување на туристи ќе остане на сила до понатамошно известување, додаде тој.
Капри, островот познат по своите бели вили, заливи и врвни хотели, има околу 13 илјади жители.