Регион
Во Грција најавени пеколни горештини: затворија и училиштата
Во Грција денеска се најавени пеколни горештини, а многу високите температури, според најавите, ќе траат до викендот.
Највисоки температури се очекуваат денеска и утре, а се прогнозира дека во некои делови од земјата ќе достигнат и до 42 Целзиусови степени. Најтопло ќе биде во копното на Грција, најмногу во централните и јужните региони, а властите предупредуваат на голема опасност од избувнување на пожари.
Поради многу високите температури, основните училишта се затворени низ цела Грција, а постои можност учебната година да заврши порано поради екстремните горештини за основците и предучилишната возраст. Според извештаите на локалните медиуми, во многу градинки и пониски одделенија од основните училишта наставата трае само до 11:30 часот.
Како што е најавено во северните делови на Грција, температурата ќе се движи од максимални 37 до 40 степени.
Во централна Грција и западниот Пелопонез максималната температура ќе достигне од 38 до 40 степени, а во Тесалија 41 до 42 степени, додека во источните делови живата во термометарот може да достигне и 43 степени.
Според најавите, на островите во источното Егејско Море температурата ќе достигне 39 степени, додека локално на Крит до 42 Целзиусови степени.
Во Атика во четврток максималната температура ќе достигне до 41 степен, додека во приморските предели температурата ќе биде пониска за 3 до 5 степени.
Во петок се очекува опаѓање на температурата во западните, централните и северните делови од земјата, додека во останатиот дел се уште ќе има многу високи температури.
Властите предупредија на опасност од пожари во регионот на Атика, Коринт, Лариса.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Родители, по потекло од Србија, го киднапирале своето бебе во Франција: Уапсени се во Холандија
Во околината на Амстердам се уапсени родители со потекло од Србија, кои го киднапирале своето недоносено бебе од породилиште во Франција, пренесоа француските медиуми, додавајќи дека малото е добро.
Бебето Сантијаго, киднапирано во понеделникот вечерта од породилиште во Olne su Bois, во департманот Сена-Сен Дени во Париз, било пронајдено во хотел во близина на Амстердам во Холандија, дознава Le Parisien од извор близок до истрагата, потврдувајќи информации од BFMTV.
Неговите родители, кои беа предмет на европска потерница, беа уапсени. Според извор близок до случајот, цитиран од BFMTV, здравствената состојба на бебето е опишана како „добра“.
Како што пишува Le Parisien, родителите се по потекло од Србија, од ромската заедница.
Исчезнувањето на предвременото бебе предизвика „аларм за киднапирање“ пред да биде прекинат во вторникот вечерта на барање на француските обвинители.
Тогаш во Белгија беше издадена национална потерница. Јавното обвинителство отвори истрага за „организирано киднапирање на малолетничка која не наполнила 15 години“.
На прес-конференцијата во четвртокот, полицијата и обвинителството рекоа дека се „крајно загрижени“ за здравјето на детето, додека одбиваат да „изгубат надеж“ дека ќе го најдат живо.
Властите ги повикаа бегалците „веднаш да го однесат (нивното бебе) во најблиската болница“ за да му дадат итна помош.
Во понеделникот вечерта, „помеѓу 23:00 и 23:30 часот“, бебето исчезна од одделението во болницата Роберт Балангер.
Родителите биле видени како го напуштаат објектот со торба, во која инспекторите се сомневале дека го сокриле бебето. Во исто време, медицинскиот персонал во болницата бил предупреден со исклучување на сензорот за срцето на бебето.
Бебето, родено многу предвреме, барало постојана медицинска нега, а секој прекин во оваа нега може да му го загрози животот, вели јавниот обвинител Ерик Матаис, во соопштение за медиумите.
Полицијата најпрвин се обидела телефонски да стапи во контакт со мајката на доенчето, пред да отиде на адресите дадени од родителите, а потоа да контактира со другите членови на семејството, објасни обвинителот.
Приведени се уште три лица, осомничени дека им помагале.
Регион
Фон дер Лајен: Србија е еден од најнапредните кандидати за членство во ЕУ
Србија е една од најнапредните земји во процесот на пристапување во Европската унија и на неа е да избере брзина на пристапување, изјави претседателката на Европската комисија Урсула фон дер Лајен по состанокот со српскиот претседател Александар Вучиќ во Белград.
Фон дер Лајен рече дека партнерството меѓу Србија и Европската унија станува се посилно, а ЕУ е првиот трговски партнер и инвеститор на Србија.
Напредокот на Србија на европскиот пат и почетокот на имплементацијата на Планот за раст на Западен Балкан беа во фокусот на разговорот меѓу Вучиќ и Фон дер Лајен.
„Планот за раст треба да ги приближи економиите од Западен Балкан до нашата и постепено да го интегрира регионалниот пазар со единствениот европски пазар. Принципот е многу едноставен. Ги отвораме вратите на единствениот пазар на Европската унија во одредени сектори за српските компании, а за возврат треба да се спроведат одредени реформи заради фер услови на пазарот“, рече Фон дер Лајен.
Регион
Земјотрес со јачина од четири степени ја погоди Албанија
Земјотрес со јачина од четири степени според Рихтеровата скала вечерва ја погоди Албанија, соопшти Европско-медитеранскиот сеизмолошки центар (EMSC).
Земјотресот се случил на длабочина од пет километри, додава EMSC.
Епицентарот на земјотресот е регистриран на 11 километри источно од градот Фјер, каде живеат околу 60.000 луѓе.