Спорт
Флавио Бријаторе се враќа во Формула 1
Поранешниот шеф на Рено, Флавио Бријаторе, ќе преземе советодавна улога во Алпин и ќе се врати во Формула 1. Бријаторе се повлече пред 14 години, кога поднесе оставка во Рено поради вмешаноста во скандалот за Големата награда на Сингапур во 2008 година, што беше откриено две години по трката.
Изминатите неколку недели се шпекулираше дека Италијанецот ќе се врати во Формула 1.
„Алпин може да потврди дека Флавио Бријаторе е назначен од извршниот директор на Групацијата Рено, Лука де Мео, за нејзин извршен советник за Формула 1. Бријаторе првенствено ќе се фокусира на највисоките нивоа на тимот, вклучувајќи скаутинг и проценка на пазарот на возачи, промени на постоечките проекти и проценка на сегашната структура и советување за стратешки прашања во спортот“, се вели во краткото соопштение на Алпин.
Бријаторе ги предводеше тимовите на Бенетон и Рено до нивниот најголем успех во Формула 1, бидејќи под негово водство Михаел Шумахер беше незапирлив во 1994 и 1995 година, а потоа и Фернандо Алонсо во 2005 и 2006 година. Сепак, неговиот мандат во францускиот тим заврши со еден од најголемите скандали во историјата на Формула 1
Тој првично беше казнет доживотно од ФИА поради неговата вмешаност во скандалот „Крашгект“.
Бријаторе беше обвинет дека, во текот на трката за ГН на Сингапур во 2008 година му наредил на Нелсон Пике јуниор да удри во ѕидот и на тој начин да предизвика безбедносното возило да излезе на патеката за да му помогне на неговиот тимски колега Фернандо Алонсо да победи.
Кога доби отказ во Рено, Пике ги откри сите детали за скандалот што ја потресе Формула 1. И покрај тоа што Бријаторе беше осуден на доживотна забрана, неговата жалба пред францускиот Врховен суд беше уважена, бидејќи беше утврдено дека таму имало одредени несовпаѓања во казните кои им беа изречени и на Бријаторе и на Пет Симондс, кој првично беше казнет со суспензија од пет години.
И покрај тој скандал, Бријаторе не ја напушти целосно Формула 1. Тој сè уште е еден од менаџерите на Алонсо, а има и одредена улога во организацијата на Големата награда на Азербејџан.
Она што е интересно е фактот дека ангажирањето на искусениот Италијанец доаѓа во време кога Алпин ја разгледува можноста да ја напушти Формула 1 како производител на мотори.
Очигледно, францускиот тим сака да влезе во партнерство со некој од останатите конструктори од 2026 година, кога започнува новата ера на Формула 1, а се чини дека прв пик за ова е Мерцедес.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Спорт
Марио Балотели преговара со клуб од соседството
Некогаш еден од најдобрите европски напаѓачи, Марио Балотели, моментално е во потрага по нов клуб.
Како што пренесуваат бугарските медиуми, поранешниот италијански репрезентативец преговара со екипата на ЦСКА од Софија.
Овој клуб вложи многу пари во новата сезона, а сега сака да го доведе најзвучното засилување.
Марио Балотели е слободен играч откако му истече договорот со турскиот суперлигаш Адана Демирспор.
Балотели има 34 години и има настапувано за 11 клубови од пет земји. Играше во Италија (Лумекане, Интер, Милано, Бреша, Монца), Англија (Манчестер Сити, Ливерпул), Франција (Ница, Олимпик Марсеј), Турција (Адана Демирспор) и Швајцарија (Сион).
За италијанската репрезентација одигра 36 натпревари и постигна 14 голови. Тој беше вицешампион на Европа во 2012 година со Аѕурите.
Спорт
Порто падна во Норвешка, АЗ го победи Елфсборг
Со победи на Босдо/Глимт и АЗ Алкмар започна новата сезона во Лига Европа. Двата тима забележаа идентични победи 3:2 во дуелите со Порто, односно Елфсборг.
Во Норвешка, Порто подобро влезе во натпреварот и со голот на Омородион во осмата минута поведе со 0:1. Радоста на Португалците траеше само седум минути, на голема радост на домашната публика изедначи Хег. До крајот на полувремето Боде/Глимт направи пресврт со голот на Хауге во 42.минута.
Судбината на Порто ја реши 20 минути подцна Хауге со својот втор гол. Поразот го ублажи Гул во 90.минута.
Сличен тек имаше и дуелот во Алкмар. Гостите од Шведска водеа со голот на Оума, АЗ направи пресврт со головите на Ван Бомел, Хдлунд изедначи, а победата на АЗ му ја донесе Перот од пенал во 74.минута.
Спорт
Влаховиќ му кажал „Не“ на Јувентус
Ситуацијата во Торино се повеќе се вжештува кога е во прашање статусот на Душан Влаховиќ во Јувентус.
Српскиот репрезентативец, кој вторпат по ред не е на списокот на Драган Стојковиќ Пикси, влезе во своевидна војна со челниците на „старата дама“.
Имено, Јувентус сака да му понуди нов договор, но и да му ја намали платата.
Со 12.000.000 евра по сезона тој е најплатен играч во Серија А, а Јуве има намера да го намали тоа на осум или девет милиони, а во договорот би биле вметнати и одредени клаузули кои доколку би биле исполнети би му овозможиле на напаѓачот да дојде до сумата од 12.000.000 евра.
Влаховиќ ја одбил понудата, и практично му ги „врза рацете“ на спортскиот директор Кристијан Џунтоли во обид да донесе нови засилувања.
Србинот е на удар на критиките од почетокот на сезоната, особено по три последователни натпревари во кои Јувентус е без голови во Серија А.
Влаховиќ постигна само два од нив сезонава, и двата на гостувањето кај Верона во 2. коло.
Инаку медиумите во Италија шпекулираат дека Јувентус се заинтересирани за Виктор Осимен, а во исто време се пишува дека Влаховиќ би можел да заврши во Арсенал.