Македонија
Муцунски – Столтенберг: Остануваме кредибилна НАТО-членка со значаен придонес во глобалниот мир, регионалната стабилност и безбедност
![](https://makfax.com.mk/wp-content/uploads/2024/06/mucunski_stoltenberg1.jpeg)
Министерот за надворешни работи и надворешна трговија, Тимчо Муцунски, во рамките на првата работна посета на Брисел оствари средба со генералниот секретар на НАТО, Јенс Столтенберг, во седиштето на алијансата.
Средбата се реализира во пресрет на севкупните подготовки на алијансата за одбележување на значајниот јубилеј – 75-годишнина од формирањето на НАТО, кој соодветно ќе биде одбележан за време на претстојниот самит на НАТО, што ќе се одржи во јули во Вашингтон.
Во фокусот на разговорите беа актуелните состојби во земјите од Западен Балкан како регион од стратешко значење за НАТО и потребата од забрзување на евро-атлантските интегративни процеси.
„Особено значајно е продолжувањето на блиската координација и заедничките активности на НАТО и ЕУ, пред сѐ, преку забрзување на европските и евро-атлантските интегративни процеси на земјите од регионот, што е особено важно за консолидирање на регионалната стабилност, безбедност и просперитет“, нагласи Муцунски.
На средбата беше поздравен успехот на земјата во однос на постигнатиот праг од повеќе од 2 % од БДП за одбраната, што претставува показател дека земјата е кредибилен НАТО-сојузник посветен на зачувувањето на трансатлантската стабилност.
Муцунски во оваа пригода го запозна соговорникот и со приоритетите од програмата за работа на новата Влада и фокусот што ќе биде ставен на реформските процеси истакнувајќи ја и определбата за наш натамошен придонес во обезбедувањето на заедничкиот мир и безбедноста на евро-атлантската област.
Соговорниците ја реафирмираа поддршката за Украина, како и силната осуда за руска воена агресија, а разменија мислења за состојбите во Блискиот Исток и други актуелни прашања од надворешнополитичка и безбедносна природа.
Министерот Муцунски ги пренесе изразите на највисока благодарност за долгата и посветена работа на генералниот секретар Столтенберг во алијансата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
![](https://makfax.com.mk/wp-content/uploads/2022/08/makfax_logo_350px.jpg)
Македонија
Министерот за правда Филков и Дејвид Гир разговараа за реформите во правосудството
![](https://makfax.com.mk/wp-content/uploads/2024/07/filkov-gir.jpg)
Министерот за правда Игор Филков денеска оствари средба со шефот на делегацијата на ЕУ во земјава, Дејвид Гир.
Се разговараше за состојбата со тековните и планираните реформски чекори во судството, , евроинтегративните процеси, Стратегијата за реформи во правосудството 2024-2028,состојбата со Судскиот совет , затворите како и борбата против корупцијата и организираниот криминал.
Во однос на законодавната агенда која треба да се реализира во периодот кој претстои се планира отворање на широка јавна дебата на сите засегнати чинители во која ќе бидат слушнати мислењата на експертската и општата јавност со цел да се дојде до најдобри реформски решенија за реализација на програмските цели на Владата .
Министерот Филков посочи дека во изминатите 10 дена откако ја презеде функцијата е информиран и целосно запознаен со процесот на преговори во делот на Поглавјето 23,, Правосудство и фундаментални права”, Планот за раст и 7-те цели од Реформската агенда, вклучување на невладините организации во дискусиите, како и активностите поврзани со реализација трите тековни проекти, еден од ЕУ и два од УСАИД.
Филков ја истакна определбата дека спроведувањето на реформската агенда е приоритет на државата при што останува клучна поддршката од ЕУ за стабилноста на земјата со надеж за продолжување на билатералната соработка во духот на заедничките вредности.
Делегацијата на ЕУ предводена од евроамбасадорот Гир ја поздрави посветеноста кон реформската агенда и ја истакна максималната поддршка за евроинтеграцискиот процес како и подготвеноста за континуирана соработка и обезбедување на сета потребна помош за спроведување на клучната реформска агенда.
Македонија
Гаши на парламентарниот самит на НАТО во Вашингтон
![](https://makfax.com.mk/wp-content/uploads/2021/11/afrim-gashi-alternativa.jpg)
Претседателот на Собранието, Африм Гаши, престојува во Вашингтон, САД, каде што ќе учествува на Парламентарниот самит на НАТО, во рамки на Самитот на Алијансата, по повод 75-годишнината од нејзиното формирање.
Самитот е во организација на Парламентарното собрание на Алијансата и ќе се одржи утре (9 јули), а покрај претседателот на Собранието, поканети се и претседатели на парламенти и шефови на делегации во ПС на НАТО од сите други земји членки.
За време на настанот, Гаши утре ќе има свое обраќање. На овој самит учествува и пратеникот Миле Талески, како в.д. претседател на Делегацијата на Собранието во ПС на НАТО.
Во текот на посетата на Вашингтон, предвидени се повеќе билатерални средби на претседателот Гаши со странски државници и високи американски претставници.
Делегацијата на Претставничкиот дом на САД во ПС на НАТО е домаќин на Парламентарниот самит, на кој ќе се соберат лидери на парламенти од 32 земји членки, како и Украина. Најавено е учество на 23 претседатели на парламенти.
Овој собир на високо ниво треба да ја покаже важноста на парламентарната димензија на Алијансата и да ги нагласи ставовите на сојузничките парламенти за клучните приоритети.
Македонија
Перински за 100. милиони евра што ќе ги добијат општините: Убеден сум дека ќе аплицираат со корисни проекти
![](https://makfax.com.mk/wp-content/uploads/2024/07/08072024-Perinski-sredba-so-gradonachalnici-1.jpg)
Министерот за локална самоуправа, Златко Перински денеска имаше состанок со градоначалниците од Скопскиот плански регион. На состанокот се разговараше за приоритетите на општините и за нивната подготвеност да реализираат проекти, кои што ќе бидат финансирани со средства од јавниот повик кој што веќе го подготвува Министерството за локална самоуправа.
„Јавниот повик ќе биде објавен веднаш по ребалансот на Буџетот и на општините ќе им бидат достапни првите 100 милиони евра за реализација на готови проекти. Убеден сум дека општините ќе аплицираат со квалитетни и корисни проекти кои што ќе одговорат на потребите на граѓаните“, рече министерот за локална самоуправа, Златко Перински.
Перински истакна дека Владата во континуитет ќе ги поддржува општините и затоа фокусот треба да биде ставен на подготовка на добри проекти и на проектна документација.
„Потребна е целосна посветеност на граѓаните и на нивните потреби. Владата и Министерството за локална самоуправа се подготвени и ќе инвестираат во квалитетни инфраструктурни објекти кои што ќе направат разлика и ќе го подобрат квалитетот на живеење во општините. Така ќе го поттикнеме развојот и на локално и на ниво на плански региони. Рамномерниот развој бара сериозни вложувања, нашите ветувања ги реализираме веднаш затоа што имаме за цел секоја општина да ги искористи сопствените потенцијали и да биде атрактивно место за живеење и за вложување во развојот“, рече Перински.