Економија
Гувернерката Ангеловска-Бежоска на годишното генерално собрание на БИС
![](https://makfax.com.mk/wp-content/uploads/2024/07/angelovska.jpg)
Во рамките на Годишното собрание на Банката за меѓународни порамнувања (БИС), гувернерката Анита Ангеловска-Бежоска присуствуваше на средбата на жените гувернери и заменици на гувернери на која се сретна со гувернерката на централната банка на Норвешка и заменик-гувернерките на Канада, Финска и Турција. На средбата беше истакнато дека иако минатата година инфлацијата бележеше надолен тренд, а финансиската стабилност беше задржана, и натаму е потребна внимателност.
Исто така, таа заедно со вицегувернерката Ана Митреска, разговараше и со гувернерот на централната банка на Италија, во врска со напредокот во пристапувањето кон СЕПА, но и за можноста за приклучување кон платежниот систем ТИПС на Европската централна банка, што може да обезбеди бројни придобивки во платежната сфера за нашите граѓани и компаниите.
На Собранието на БИС беа разгледани и усвоени најновиот Годишен извештај за работата на БИС и Годишниот економски извештај. Во Извештајот се нагласува дека политиките на централните банки ги ублажија последиците од кризите и овозможија задржување на стабилноста во економиите. Како приоритет на краток рок се нагласува потребата од задржување на ценовната стабилност, како и внимателноста при олабавувањето на монетарната политика. На долг рок, потребни се политики коишто ќе обезбедат финансиска и макроекономска стабилност, како и јакнење на фискалните позиции. Во рамките на структурните реформи за јакнење на економскиот потенцијал, се истакнува важноста од иновациите во дигиталната сфера во финансискиот систем.
Во рамките на Годишното собрание беа и панел-дискусиите каде што беа обработувани актуелните теми и предизвици со кои се соочува централнобанкарската заедница. Така, на Конференцијата се зборуваше за геополитичките движења и нивниот одраз врз макроекономијата, како и за нивното влијание врз инфлациските притисоци и монетарната политика. Исто така, беа разгледани и можностите и ризиците коишто ги носи дигиталната трансформација и употребата на вештачката интелигенција во работењето на централните банки, како и важноста од инвестициите во зелени финансии.
Средбите во рамките на Годишното собрание на БИС се од исклучително значење за справувањето со тековните предизвици, но и за подготовка за идните трендови во монетарната сфера, имајќи ја предвид улогата на БИС како банка на централните банки, како и улогата на меѓународната соработка за поддршка на монетарната и финансиската стабилност. Во тој контекст, гувернерката Ангеловска-Бежоска и вицегувернерката Митреска остварија и бројни билатерални средби со повеќе свои колеги од централните банки членки на БИС.
Народната банка е полноправна членка на БИС со уште шеесет и две централни банки и монетарни власти од светот, коишто учествуваат и имаат право на глас на Генералното собрание.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
![](https://makfax.com.mk/wp-content/uploads/2022/08/makfax_logo_350px.jpg)
Економија
(Фото) Во министерството за финансии се крои ребалансот на буџетот, работата тече и викендов
![](https://makfax.com.mk/wp-content/uploads/2024/07/Screenshot-2024-07-06-193859.jpg)
Се крои ребалансот на буџетот. Во министерството за финансии се работи и викендов без прекин. Се пренаменуваат пари од нереализирани и непродуктивни трошења за она кое е попотребно и неопходно. Една од тие ставки е зголемувањето на пензиите од 2.500 денари од септември. Пари требаат и за капиталните проекти за општините. Според информациите, планирано е да бидат пренаменети 200 до 300 милиони евра.
„И овој викенд повторно работно во Министерството за финансии. Се работи на ребалансот на Буџетот. Секогаш во интерес на граѓаните на Македонија!“, напиша на Фејсбук министерката за финансии Гордана Димитреска Кочоска.
Економија
(Видео) Трипуновски: Земјоделските задруги се важни за решавање на проблемот со пласманот на производи
![](https://makfax.com.mk/wp-content/uploads/2024/07/Screenshot-2024-07-06-154913.jpg)
Министерот за земјоделство, шумарство и водостопанство Цветан Трипуновски присуствување на панел дискусија во организација на Македонската асоцијација на земјоделски задруги.
– Мораме да работиме да го развиваме задругарството, во моментов се наоѓаме во еден правен вакуум бидејќи законот за земјоделски задруги е укинат и се формираше еден посебен закон за задруги меѓутоа делот на земјоделските задруги остана недефиниран. – изјави Трипуновски.
На панел дискусијата се споделија неколку идеи за во која насока треба да се движат земјоделските задруги, а министерот Трипуновски ги презентираше мерките и проектите од владината програма за земјоделски задруги.
Преземавме обврска да веќе во наредниве месеци да го измениме законот за земјоделство и рурален развој каде што ќе ги дефинираме земјоделските задруги и нивното здружување. Ние во нашата владина програма имаме ставено фокус на задругарството преку разни мерки и проекти се со цел да овој начин на здружување биде еден од алките на решавање со пласманот на нашите земјоделски производи – заврши Трипуновски.
Економија
Димитриеска-Кочоска – Гир: Континуитет во поддршката од ЕУ, МФ ќе го искористи искуството за спроведување на реформскиот план
![](https://makfax.com.mk/wp-content/uploads/2024/07/05073.jpg)
Министерката за финансии, Гордана Димитриеска-Кочоска, денеска оствари средба со евроамбасадорот Дејвид Гир, на која соговорниците се осврнаа на реформите што ѝ претстојат на земјата во нејзиниот евроинтегративен процес.
На средбата беа разменети мислења за активностите што ги презема Министерството за финансии како институција, која е координатор во рамките на економско-финансискиот дијалог со ЕУ, како и за реформската агенда на земјата поврзана со новиот план за раст на Западен Балкан, активност што ја реализира Министерството за финансии заедно со Министерството за европски прашања.
„Министерството за финансии ги координира активностите во рамките на Економско-финансискиот дијалог веќе 10 години и во тој процес има континуитет. Тоа искуство ќе се искористи и во рамките на реформскиот процес поврзан со планот за раст на Западен Балкан“, рече министерката.
Таа изрази уверување дека реформите што се поврзани со Министерството за финансии во рамките на тој евроинтеграциски процес ќе бидат во фокусот на работата бидејќи тие значат и унапредување на процесите и приближување на земјата до ЕУ-стандардите.
Како што беше посочено, ЕУ е значаен поддржувач на земјата од нејзината независност и дека таквата поддршка ќе продолжи и во наредниот период.