Свет
Исчезнат планинар пронајден мумифициран во мраз по 22 години во Перу
Сочуваното тело на американскиот планинар, кој исчезна пред 22 години додека се искачуваше на снежниот врв во Перу, е пронајдено по топењето на мразот предизвикано од климатските промени, соопшти денеска полицијата.
Вилијам Стампфл беше пријавен за исчезнат во јуни 2002 година на 59-годишна возраст кога лавина ја затрупа неговата група алпинисти на планината Хуаскаран, висока повеќе од 6.700 метри. Пребарувањето не даде резултати.
Перуанската полиција соопшти дека неговите останки биле откриени со топење на мразот на планинскиот венец Кордилера Бланка на Андите.
Телото на Стампфл, како и неговата облека, појасот и чизмите, беа добро сочувани од студот, сподели полицијата.
Меѓу работите бил пронајден и неговиот пасош, што ѝ овозможило на полицијата да го идентификува телото.
Планините во североисточниот дел на Перу, дом на врвовите покриени со снег, како Хуаскаран и Кашан, се омилени меѓу планинарите од целиот свет.
Во мај таму беше пронајдено тело на израелски планинар, речиси еден месец по исчезнувањето.
Минатиот месец искусен италијански планинар беше пронајден мртов кога падна додека се обидуваше да се искачи на друг врв на Андите.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Германија го суспендираше новиот извоз на воено оружје во Израел
Германија го суспендираше новиот извоз на оружје за Израел додека се справува со правните предизвици, според анализата на податоците на Ројтерс и извор близок до Министерството за економија.
Извор близок до министерството цитираше висок владин функционер дека работата за одобрување дозволи за извоз на оружје во Израел е стопирана поради правниот и политичкиот притисок од правните случаи кои тврдат дека таквиот извоз од Германија го прекршува хуманитарното право.
Министерството за економија соопшти дека нема и нема да има забрана за извоз на оружје во Израел, а одлуките се носат од случај до случај по внимателно разгледување, додавајќи дека меѓународното право, надворешната и безбедносната политика се клучни фактори во нивните оценки.
– Нема бојкот на германскиот извоз на оружје против Израел – изјави владиниот портпарол во средата, коментирајќи го извештајот.
Минатата година Германија одобри извоз на оружје за Израел во вредност од 326,5 милиони евра, вклучувајќи воена опрема и воено оружје, што е десеткратно зголемување во споредба со 2022 година, покажуваат податоците на Министерството за економија, кое одобрува извозни дозволи.
Но, годинава одобренијата паднаа, а од јануари до 21 август се дадени само 14,5 милиони евра, покажуваат податоците на Министерството за економија како одговор на пратеничко прашање.
Регион
Вархеји: Добра средба со Вучиќ за спроведување на следните чекори, планот за раст во полн ек
Европскиот комесар за соседска политика и проширување Оливер Вархеји денеска изјави дека имал добра средба со српскиот претседател Александар Вучиќ во Брисел за да ги подготви следните чекори во време кога се започнуваат „амбициозните реформи засновани на реформската агенда на Србија“.
Вархеји на социјалната мрежа Х оцени дека новиот План за раст на Западен Балкан вреден шест милијарди евра е во полн ек.
„На маргините на состанокот на лидерите од Западен Балкан, имав добар состанок со претседателот Александар Вучиќ за да ги подготвам следните чекори додека започнуваме амбициозни реформи врз основа на реформската агенда на Србија. Новиот план за раст од 6 милијарди евра е веќе во полн ек. Повеќе реформи, повеќе поддршка!“, рече Вархеји.
Свет
Фолксваген сака да укине до 30.000 работни места во Германија и да ги намали инвестициите
Производителот на автомобили Фолксваген сака да укине до 30.000 работни места во Германија и да ги намали инвестициите, објави германскиот деловен портал Менаџер.
Како што се наведува, поддржувачите на радикалните мерки во менаџментот на Фолксваген очекуваат бројот на работници да се намали од сегашните 130.000 за речиси една четвртина.
Се најавува дека и Фолксваген поради заштеди ќе ги намали инвестициите за речиси 20 милијарди евра, а можни се отпуштања и во одделот за истражување и развој, пренесува Bild.