Македонија
Муцунски на НАТО-самитот: Како кредибилна НАТО-членка остануваме посветени на зајакнувањето на колективната безбедност
Министерот за надворешни работи и надворешна трговија, Тимчо Муцунски, заедно со владина делегација, предводена од премиерот Христијан Мицкоски, учествуваше на НАТО-самитот, што се одржа од 9 до 11 јули во Вашингтон.
Во фокусот на темите беа актуелните безбедносни предизвици, со посебен акцент на поддршката за Украина, зајакнувањето на одбраната и одвраќањето на алијансата, како и унапредување на соработката со партнерите од Индо-Пацификот.
Сојузниците го поздравија постигнувањето 2 % од БДП за инвестиции во одбраната од страна на 23 земји членки на алијансата, меѓу кои и Северна Македонија. Земјава оваа година го надмина споменатиот праг и се очекува тој да расте во периодот што следува. Со тоа докажуваме дека сме кредибилна НАТО-членка, што активно придонесува за зајакнување на колективната безбедност.
На самитот беше реафирмирана силната и непоколеблива поддршка за Украина оценувајќи ја руската агресија како брутално кршење на меѓународниот поредок базиран на правила. Воедно, беше донесена одлука за пакет за практична поддршка за Украина, како и заложба за долгорочна безбедносна помош на земјата. Северна Македонија останува цврста на ставот за поддршка на територијалниот интегритет и суверенитет на Украина, како и обезбедување помош за украинскиот народ сѐ додека е потребно.
На состаноците беше нагласена потребата од зајакнување на соработката помеѓу НАТО и ЕУ во земјите од Западен Балкан, што претставува гаранција за регионалната и целокупната трансатлантска сигурност. Притоа беше истакнато дека продолжувањето на политиката на отворени врати на НАТО и проширувањето на Европската Унија се најдобрите алатки за постигнување траен мир и гарантирање на демократските процеси на нашите простори.
НАТО-самитот беше одлична можност и за разгледување на перспективите за продлабочување на соработката со земјите од Индо-Пацификот, што е важно во променетиот геополитички контекст. Зајакнувањето на врските со Австралија, Јапонија, Јужна Кореја и Нов Зеланд ќе придонесе за зајакнување на алијансата и обезбедувањето силен и решителен одговор на растечките предизвици што произлегуваат од соработка меѓу авторитарните актери.
Во рамките на работната посета на Вашингтон, Муцунски оствари неколку работни средби, а по нејзиното завршување, тој патува за Њујорк, каде што следува средба со претставниците на македонската дијаспора и низа состаноци насочени кон зајакнување на билатералните односи и промовирањето на земјава како атрактивна дестинација за странски инвестиции.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Средба на министерот Муцунски со шефот на Мисијата на ОБСЕ во Скопје, Вал
Министерот за надворешни работи и надворешна трговија, Тимчо Муцунски, денеска оствари средба со шефот на Мисијата на ОБСЕ во Скопје, амбасадорот Килиан Вал. На средбата беше потврдена долгогодишната соработка со ОБСЕ во различни области, при што беше изразена поддршка за напорите на Организацијата насочени кон зајакнување на соработката и одржување на мирот во регионот на ОБСЕ, извести МНР.
Двајцата соговорници изразија задоволство од досегашната соработка помеѓу ОБСЕ и македонските институции, и ја потврдија подготвеноста за нејзино продолжување. Тие разменија мислења и за тековните активности на Мисијата и заеднички ја реафирмираа посветеноста на продолжување на проектите кои ги поддржуваат реформските процеси на новата Влада.
Македонија
ЛДП со реакција за изјавата градоначалникот на Кисела Вода: Сепак има надеж
ЛДП реагираше на изјавите на Орце Ѓорѓиевски во врска со можноста за отповикување на градоначалници, нагласувајќи дека оваа иницијатива не е нова, туку е дел од нивните заложби кои претходно не биле поддржани ниту јавно ниту во Собранието.
„ЛДП ја истакна потребата за воспоставување на механизам за отповикување на градоначалници преку референдум, со цел поголема отчетност и одговорност на локалните лидери. Оваа иницијатива, која партијата ја поддржува подолг период, се заснова на примери од европските земји како Обединетото Кралство, Полска и Молдавија, каде ваквите механизми веќе се применуваат.
Според нив состојбата во која градоначалниците можат да ги поминат своите мандати без да одговараат за несработеното, ги оштетува општините и граѓаните. Иницијативата за отповикување на градоначалници се споменува како начин за подобрување на транспарентноста и одговорноста на локалната власт кон оние кои ја избрале“, велат од ЛДП.
Од партијата потсетија дека уште изминатата година кога ја пласираа идејата за доверба или отповикување на градоначалник истата беше отфрлена.
„Воедно минатата недела поднесовме амандман на измените во законот за локална самоуправа, кој за жал не беше поддржан во Собранието. Но, добро е што само по неколку дена доаѓаат позитивни реакции и изјави по однос на нашата заложба. Подаваме рака да го изработиме предлогот и да го усвоиме сите заедно во интерес на граѓаните“, истакнуваат од ЛДП.
ЛДП почнува серијал на јавни трибини со сите засегнати страни, а пред се со граѓаните затоа што предлогот ги има нив во фокусот: да добијат отчетни институции кои ќе им служат лично нив, а не на сопствените и партиски интереси. Институции исклучиво по европски стандарди и хармонизација со европското законодавство. ЛДП го повикува претседателот на ЗЕЛС и Министерот за локална самоуправа да се приклучат на оваа иницијатива.
Македонија
Претседателката Сиљановска Давкова се обрати на дискусијата „Младите и внатрепартиската демократија“
Претседателката Гордана Сиљановска Давкова се обрати на дискусијата „Младите и внатрепартиската демократија“, што се одржа во Кабинетот на Претседателот по повод 15 септември – Меѓународниот ден на демократијата.
Во дискусијата учествуваа подмладоци од политичките партии во земјава кои ги претставија своите погледи и искуства за улогата и положбата на младите во политичките партии кадешто членуваат и разменија идеи и препораки за подобрување на внатрепартиската демократија и за поттикнување на младинскиот ангажман во политиката.
Претседателката Сиљановска Давкова во обраќањето пред политичките подмладоци посочи дека демократизацијата на политичките партии е клучна за демократизацијата на политиката. Таа се осврна на процесите на внатрепартиското одлучување, на процесите на кандидирање и избор на партиските функционери, посочувајќи дека е неопходна децентрализираност на партиите, почитување на различни тенденции и мислења внатре во партиите и поавтентичен настап на локалните партиски организации.
Во таа насока, таа говореше за потребата од одговорност внатре во партијата, неопходноста од реформи, партиципативна политичка култура и промени во пристапот и комуникацијата на партиите со јавноста.
Претседателката во своето обраќање се осврна и на структурата на партиите и нивното претставување од аспект на родовата застапеност, истовремено посочувајќи дека дејствувањето на политичките партии во голема мера зависи од етичкиот капацитет на водството и на лидерот.
Претседателката ја поддржа потребата од поголема вклученост на младите во носењето на партиските одлуки, истакнувајќи дека тие треба да бидат најсубверзивниот елемент којшто ќе влијае на демократизацијата на овие процеси и на партиското одлучување.
Истакнувајќи ја важноста на внатрепартиската демократија, младите ги разгледаа можностите и начините за нивно поголемо влијание врз политичките процеси, преку активно учество и инклузија во партиските структури.
Политичките подмладоци како генератори на идното партиско лидерство ја истакнаа важноста од едукација и сензибилизирање за демократијата и нејзините сфаќања помеѓу младите.