Претседателката Гордана Сиљановска-Давкова, на маргините на НАТО самитот во Хаг, оствари средби со претседателот на Чешка, Петр Павел, премиерот на Република Естонија, Кристен Михал и со премиерот на Кралството Белгија, Барт де Вевер.

На средбите соговорниците изразија задоволство од одличната билатерална соработка и партнерство во различни области и поддршка за евроинтегративниот пат на државава.

Заблагодарувајќи му се на претседателот Петр Павел, за принципиелната и доследна поддршка на Чешка, Сиљановска-Давкова укажа на тековните предизвици и политички мотивираните обиди за блокирање на европскиот пат на државава. Таа ја потенцираше неопходноста од заштита на националниот идентитет и истакна дека прашањата поврзани со идентитетот, или толкувањето на историјата не можат да бидат дел од преговарачката рамка на ЕУ. Претседателот Павел рече дека земјава може да смета на континуирана чешка поддршка во текот на евроинтегративниот процес.

Повторувајќи го јасниот став против билатерализацијата, Сиљановска-Давкова рече дека длабоко ја цени принципиелната поддршка на Естонија за политиката на проширување на ЕУ и нагласи дека овој процес има стратешка и геополитичка важност. Естонскиот премиер Михал посочи дека државава добро ги исполнува Копенхагенските критериуми. Тој изрази подготвеност за помош во процесот на македонската евроинтеграција.

Прашањето за деблокирање на евроинтегративниот пат беше во фокусот и на средбата со премиерот на Кралството Белгија, Барт де Вевер, кој истакна дека членките на ЕУ треба да имаат појасен и поискрен став во однос на проширувањето. Тој нагласи дека интеграциите мора да се одвиваат според напредокот и спроведените реформи на државата аспирант за членство.

Владимир Туфегџиќ – адвокатот на таткото на убиената Вања Ѓорчевска, Александар Ѓорчевски ја коментираше денешната ослободителна пресуда за неговиот клиент, велејќи дека нема простор за победничка еуфорија, а судот донел законска одлука, но празна по својата суштина и без одговорите на клучните прашања. Во процесот, според зборовите на  Туфегџиќ, не е даден одговорот на прашањето зошто е киднапирана и убиена Вања, како и зошто се инсистирало нејзинниот татко да биде дел од постапката и покрај тоа што против него немало докази.

Адвокатот побара одговор од институциите зошто не го спречиле ниту криминалниот план за киднапирање на луѓе којшто, според исказот на осудениот Манев, обвинетите го скроиле уште од 2022 година. Туферџиќ праша дали дали вмешувањето на Ѓорчевски во овој случај било обид за дефокусирање од она што би требало да биде предмет на истрагата. Побара одговор од надлежните зошто четворицата обвинети со план за киднапирање луѓе кои копале дупки низ државата за таа цел, не биле детектирани навремено.

Александар Ѓорчевски во моментот не размислува за поднесување кривични пријави. Туферџиќ рече и дека судија на претходна постапка има доставено барање за обезбедување на медицинска документација за констатирани повреди од вршењето тортура кон Александар, на 16 февруари 2024 година. По ниту едно од тие барања не било постапено, ниту пак, јавниот обвинител го проследил ова известување до надлежното Јавно Обвинителсто кое треба да постапува за сторени кривични дела на полициските службеници.

Обвинителството од друга страна соопшти дека ќе се жали на ослободителната пресуда за Ѓорчевски. Обвинителката Ана Стојковиќ Димитриевска по изрекувањето на пресудата дека иако немале докази какви што сакаат да имало, неспорен факт е дека само родителите знаеле дека детето ќе оди само во училиште, а двајца од обвинетите кажале дека дознале од таткото, преку Палевски, пред потоа да ја сменат изјавата. Обвинителката вели дека кога го смениле исказот, двајцата обвинети не понудиле ниту еден разумен факт и околност зошто го сториле тоа, а за тврдењето дека се вршела тортура над нив, обвинителката рече дека тоа не е реално, ниту се докажало.

Кривичниот суд пресуди доживотен затвор за Љупчо Палевски, Боре Видевски, Велибор Манев, Влатко Кешишов за грабнувањето и за убиството  на 14-годишната Вања Ѓорчевска и 74-годишниот Панче Жежовски. Таткото на Вања, Александар Ѓорчевски е ослободен од обвинение.

По една година од преземањето на одговорноста за водење на владата, ВМРО-ДПМНЕ и Владата предводена од премиерот Христијан Мицкоски започнуваат голема акција на јавна отчетност и отворена комуникација со граѓаните – трибини низ цела Македонија под слоганот:„Ги градиме темелите на промените – доаѓа времето на Македонија“, изјави Валентин Манасиевски од ВМРО-ДПМНЕ.

Според него, оваа иницијатива е израз на нивната определба за транспарентно, одговорно и отчетно работење.

„Граѓаните имаат право не само да слушнат, туку и да прашаат, да кажат, да предложат свои сугестии, идеи и критики со кои ние ќе станеме подобри и пофункционални. Затоа овие трибини ќе бидат можност да секој еден да учествува, да дискутира и да придонесе. Министрите, премиерот и владиниот тим ќе бидат присутни на трибините. Ќе презентираме што сработивме, што започнавме, со што се соочивме и што следува. Ќе зборуваме за проектите, за реформите, за чекорите напред. Но и ќе слушаме. Ќе слушаме од народот, затоа што нашата политика се темели на гласот и интересот на граѓаните“, рече Манасиевски.

Првата трибина ќе се одржи денес во Прилеп на градскиот плоштад во 19:30ч, насловена како „Економски раст и дигитална трансформација’’, а потоа следуваат трибини низ сите краишта на Македонија – во градови и села.

На првата трибина ќе се обрати претседателот на ВМРО ДПМНЕ, Христијан Мицкоски, како и Гордана Димитриеска Кочоска – министерка за финансии, Елена Петрова – директорка на Управата за јавни приходи, Стефан Андоновски – министер за дигитална трансформација и Бојан Стојаноски – пратеник во македонското Собрание.