Ана Сорокин, измамничката позната и како Ана Делви, продолжува да го привлекува вниманието на јавноста две години по објавувањето на серијата на „Нетфликс“, „Измислувајќи ја Ана“. Моментно е во домашен притвор, но од таму ниже успеси.

Во интервју за WWD во јуни таа рече дека се труди да биде зафатена и продуктивна.

„Не правам ништо доволно возбудливо во моментот. Би било полесно да создадам повеќе содржини ако можам да ја напуштам куќата. Никој не сака да ме види како седам на каучот и пишувам книга. Сѐ зависи од тоа кога ќе бидам слободна. Потоа ќе правам интересни работи што луѓето што сакаат да ги гледаат“, додаде Ана.

Зошто е позната?

Ана е родена во Русија и е позната по тоа што ги измамила банките и њујоршката социјална служба за илјадници долари меѓу 2013 и 2017 година. Тогаш таа живееше на Менхетн, а сите мислеа дека е германска наследничка со богатство од 67 милиони долари во Европа.

Ана изјави за „Ен-би-си њуз“ дека никогаш не сакала да биде позната како измамничка.

„Тоа е целосно наметнато од обвинителството и медиумите, како и од сериите на „Нетфликс“, но, дефинитивно, се обидувам да побегнам од тоа“, рече таа.

„Едноставно мразам да ги гледам сите тие наслови за измами и лажно наследство. Би сакала да добијам шанса луѓето да не ме гледаат само како наводна измама“, вели Ана.

За прикажувањето на нејзината приказна во серијата на „Нетфликс“, Сорокин добила речиси 200 илјади долари.

Која е, всушност, Ана Делви?

Делви е родена како Ана Сорокин во предградијата на Москва во 1991 година, а подоцна се преселила во Германија со своето семејство. Таа стажирала во парискиот магазин „Прпл“ . Таму се спријателила со главниот уредник Оливие Зам и тој бил првиот што го вовлекла во својата мрежа од лаги и манипулации, а во 2014 година се преселила во Њујорк.

Ана направила огромни сметки за ресторани и хотели и се извлекла со плаќањето. Во еден случај на пријателка ѝ оставила долг од 62 илјади долари. Имено, таа ја поканила на луксузен одмор во Маракеш, а кога требало да плати, Ана побарала од нејзината пријателка тоа да го направи таа со нејзината кредитна картичка.

Во април 2019 година Ана беше осудена на минимум четири години затвор за измама, но беше ослободена поради добро однесување во февруари 2021 година.

Каде е сега Ана Делви?

Во јуни Ана беше видена како пристигнува на сослушување за имиграција во Њујорк. Имено, кога излегла од затворот, во март 2021 година повторно била приведена од Имиграциската и царинската служба поради престан на визата. Таа беше во притвор една година.

Таа требаше да биде депортирана во Германија во 2022 година, но депортацијата не успеа бидејќи одби да го напушти притворот и да оди на аеродром. Нејзиниот адвокат потоа изјави за „Њујорк пост“ дека е поднесено барање за задржување на депортацијата. Подоцна истата година таа беше ослободена од притвор под два услова. Мораше да плати кауција од 10.000 долари и да остане во домашен притвор.

Стана хит на  „Тик-ток“

На Ана ѝ е забрането да ги користи сите форми на социјални мрежи. Таа често се фотографира и снима додека оди на суд, а овие појавувања редовно ги користи како можност за нејзините модни моменти носејќи луксузни брендови и интересни комбинации. На „Тик-ток“ многумина со нетрпение ги следат нејзините појави и споделуваат видеа.

„Подобро е да ја поканат на Мет гала в година“, „Таа е модна икона“, „Ја обожавам“, „Овој нов нејзин изглед ме воодушевува“, „Леле, таа изгледа неверојатно“, се само некои од коментарите под видеото, кои имаат стотици илјади прегледи на „Тик-ток“.

Што друго прави Ана Делви?

Таа потпиша договор за нова документарна серија за животот по затворот, која ќе продолжи таму каде што застана серијата на „Нетфликс“.

Во јануари 2023 година излезе вест дека Ана ќе го снима реалното шоу Delvey’s Dinner Club во својот стан во Ист Вилиџ во Њујорк, каде што е во домашен притвор. За време на домашниот притвор Ана го почна и поткастот The Anna Delvey Show со цел да го промени својот имиџ.

Во јули 2023 година таа го издаде својот деби-сингл What the Hell? со ѕвездата на „Тик-ток“, Брук Батлер.

Таа ја организира и првата модна ревија во својот стан со познатиот дизајнер Шао Јанг.

„Само се трудам да го направам најдоброто што можам. Не размислувам што ќе мислат луѓето за мене“, изјави таа за WWD. Освен во модата, тој се обидува да се докаже и во светот на уметноста. Имено, додека чекала вести за својата депортација, на Менхетн била отворена нејзината прва уметничка изложба наречена Free Anna Delvey. Изложбата содржеше дела на 33 уметници инспирирани од нејзиното искуство.

Втората изложба, нејзината прва самостојна изложба наречена „Наводно“, беше претставена со 20 цртежи што ги нацртала додека била во притвор. Според „Вараети“, нејзиниот трговец со уметнички дела ја проценува вредноста на колекцијата помеѓу 400.000 и 500.000 долари.