Македонија
Ристески: Оваа влада ќе ја направи Македонија економски моќна и демократска држава
Пратеникот на ВМРО-ДПМНЕ, Петар Ристески зборуваше на денешната собраниска седница за избор на заменици министри, односно докомплетирање на македонската влада, при што посочи дека ќе даде поддршка за овие компетентни и искусни кадри, секој во својата област.
Тој истакна дека за оваа парламентарно мнозинство и оваа влада предводена од ВМРО-ДПМНЕ македонските граѓани дадоа консензуална, силна и недвосмислена поддршка.
„Оваа влада го црпи сиот свој легитимитет од народот. Оваа влада не е инсталирана влада, не е влада на партија која ги изгубила изборите, а потоа била на сила донесена на власт за да изврши национални предавства. Оваа влада се формира за да го врати достоинството на македонските граѓани, за да ја направи Македонија силна, горда, економски моќна и демократска држава која повторно ќе биде во рацете на граѓаните на Република Македонија“, рече Ристески.
Тој додаде дека четири години можат да бидат години на промени ако се работи посветено, но и момент на стагнација како што тоа го направија Социјалдемократскиот сојуз и ДУИ во два наврати.
„Сведоци сме и ние и граѓаните дека во изминатиот период државата како на копче беше исклучена и не функционираа институциите на системот. Во секоја нормална држава, ќе го наведам како за пример, тоа што половина од населението остана без пасоши би се сместило во рубриката „верувале или не“ и за тоа секако некој ќе мораше да понеси одговорност, но тоа не беше случај со криминалците од Социјалдемократскиот сојуз и ДУИ. Понатаму, цели учебни години учениците ги поминуваа без учебници, децата ни учеа од скрипти и диктирани текстови, коко во пост воена социјалистичка Македонија а не модерна држава која се стреми да биде членка на Европската унија. Немавме ни регистарски таблици, лични карти, сообраќајни книшки, свидителства и сето ова зборува само за едно, криминал, корупција, неспособност, незнаење, неработење“, потенцираше Ристески.
Ристески посочи дека на сето ова веќе му дојде крајот и на со ВМРО-ДПМНЕ на чело на македонската влада ќе дојдат подобри времиња и ќе се врати нормалното функционирање на системот и на државата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Укината забраната за движење во шуми
По извршената процена за намален ризик за појава на шумски пожари на површините под шума и шумско земјиште од страна на ЈП „Национални шуми“ – Скопје и на нивно барање, Министерство за земјоделство, шумарство и водостопанство донесе согласност за отповикување на целосната забрана за движење во шума и на шумско земјиште.
Македонија
Мицкоски: Работиме штипската болница да биде изградена во најбрз рок
„Јас мандатот го почнав пред неполни три месеци токму од пред штипската Клиничка болница и тогаш реков во овој мандат таа ќе биде завршена. Работиме на модел. Медицинско-техничко-економски модел којшто е во фаза на, би рекол, развој и очекувам дека до крајот на оваа година сето тоа ќе биде завршено и веќе од почетокот на следната ќе почнеме со градење на Болницата“, одговори претседателот на Владата, Христијан Мицкоски на денешното новинарско прашање при посетата на Штип, во однос на изградбата на Клиничката болница и додаде:
„Проблемот е што пари нема. Парите ги украле или ги потрошиле за нешто што не требало. Требало за Болницата, но парите ги украле. За жал наследивме состојба таква каква што е, но тоа е што е, тука е, нѐ гласале граѓаните, да немаме оправдување, туку да работиме, да ја направиме работата подобра. Што е нашиот пристап? Нашиот пристап е да обезбедиме и финансирање, и допроектирање и опремување и изградба и пренос на објектот. Тоа во моментов Законот за јавни набавки не го дозволува. Ако е потребно ќе влеземе и чекор напред, ако треба мали нивелирања на Законот, само за да можеме да ги одглавиме многу проекти за коишто се почнати, парите се украдени и тие се сега споменици на едно време. Тоа правиме, иновираме, се трудиме да најдеме начин за сето ова го задвижиме и ќе успееме. Ќе успееме, јас сум оптимиста дека ќе успеаме“, дополни тој.
Македонија
Трипуновски: Доделени договорите од ИПАРД III-програмата
Денеска во просториите на Агенцијата за финансиска поддршка и рурален развој, министерот за земјоделство, шумарство и водостопанство Цветан Трипуновски заедно со директорот на агенцијата Илија Стоилев доделија договори од ИПАРД III програмата за 2021-2027.
Договорите се однесуваат на мерката 1 –Инвестиции во основни средства на земјоделските стопанства и мерката 7 – Диверзификација на фарми и развој на бизниси.
Финансиската поддршка се состои од 75% средства од ЕУ буџетот и 25% средства обезбедени од буџетот на Македонија.
Вкупната финансиската поддршка во рамките на ИПАРД III програмата од мерката 1 изнесува 18.893.333 евра, односно 1.171.764.533 денари, додека за мерката 7 изнесува 11.400.000 евра, односно 707.028.000 денари.
Денеска се потпишаа 30 договори од вкупно 76 од мерката 1 за кои вкупно прифатливите трошоци по договор изнесуваат 214.737.900,00 денари односно 3.494.514 евра, додека кофинансираната сума изнесува 141.279.000,00 денари односно 2.299.000 евра. Од мерката 7 се пишуваат 6 договори за кои вкупно прифатливите трошоци по договор изнесуваат 90.379.675,00 денари, а додека кофинансираната сума изнесува 54.488.543,00 денари, односно 886.713,00 евра.
“Владата и Министерството за земјоделство, шумарство и водостопанство веруваат во потенцијалот на македонското земјоделство а со тоа и на земјоделците. Континуирано се прават заложби за подеднаков развој на земјоделството на секој дел од државата.
Со потпишување на договорите им посакавме успешна реализација на инвестициите и понатамошно беспрекорно работење, плодна соработка со агенцијата и министерството. Ги охрабруваме и останатите земјоделци да се вклучат во програмите за финансиска поддршка£, се истакнува во соопштението.