Македонија
Николовски: СДСМ со амандман, земјоделците и понатаму да добиваат 30% предвремена исплата на субвенции
Пратеникот на СДСМ Љупчо Николовски на денешната седница на собраниската комисија за финансирање и буџет го образложи предложениот амандман на СДСМ за ребалансот на буџетот, кој предвидува да продолжи да се применува новиот модел на субвенционирање, со кој земјоделците добиваат 30% предверемена исплата на субвенции и е замена на популситичкиот модел на ВМРО-ДПМНЕ, со кој се заглави со исплати на субвенции, со правење списоци и селекции.
-Го променивме популистичкиот, груевистички модел на субвенционирање на се и сешто во државата, модел на селективна исплата на субвенции, на ненавремена исплата и да го замениме со нов модел за потпишување решенија за исплата на субвенции, во еден ден за сите лозари, во еден ден за сите тутунари, во еден ден за сите полјоделци, истакна Николовски, додавајќи дека земјоделците ја знаат таа пракса и се научија на Св. Трифун да добиваат субвенции лозарите, дека во следните 2 месеци без никаква селекција ги добиваат сите останати.
Николовски нагласи дека се очекува воспоставената пракса да продолжи токму и заради тоа што во текстот на ребалансот се поддржува новиот модел на субвенционирање.
Во текстот на ребалансот покрај се друго што се поддржува, односно континуитетот на успешните политики, се потенцира новиот модел и се она што го предвидува и токму затоа го поднесуваме овој амандман со којшто се бараат 2 милијарди денари, кои се уште не се создадени обврски, заради тоа што пријавувањето на субвенциите се уште трае. И ова ја демаскира лагата дека тоа се пари што некој не ги предвидел, нагласи Николовски.
Николовски истакна дека треба да се направат напори да се најдат овие 2 милијарди и да се продолжи со предвремена и авансна исплата на субвенциите.
За разлика од ВМРО-ДПМНЕ која во 2017 година остави близу 5 милијарди денари долг од претходни години, денеска имаме 0 долг по претходни години, наследивме несиплатени 5 години, затворени винарии како Повардарие, Петра, Џумајлија, да не зборуваме за Сведмилк и други афери, неисплатени лозари, коишто ги исплаќавме, во 2017 година, кога ја преземавме власта не беше исплатен тутунот, не беа исплатени основните сунвенции, имавме ризик од укинување на ИПАРД фондовите, имавме протести, имавме исплата на субвенции пред избори, 58 милиони евра во 2014 година и многу други скандали и неправилности, нагласи Николовски.
Тој постети дека критикуваниот популистички модел со кој не се евидентира производството, со кој не се пријавува производството туку се даваат субвенции само по површина, е заменет со нов, кој ги зголеми средствата и го насочува производството кон стратешките култури.
Земјоделците треба да знаат дали до крајот на годината, ќе добијат 30% предвремена исплата на субвенциите кои треба да ги добијат во 2025 година. Ако за оваа влада е приоритет земјодлество, ќе го направи истото што и претходната влада, не на почеток на година, не со ребаланс, туку на крајот на годината со репрограм на неискоритени средства коа беа додадени 2 милијради за авансна исплата за земјоделците, порача пратеникот на СДСМ Љупчо Николовски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Очигледно раководството на Северна Македонија не сака да продолжи по патот на европската интеграција па ја обвинува Бугарија, вели Ковачев
Во Република Северна Македонија немаат желба за европска интеграција и бараат изговор зошто тоа не може да се случи. Вака европратеникот од ЕПП/ГЕРБ Андреј Ковачев ги коментираше провокациите на РСМ кон Бугарија во последните денови за бугарскиот БНТ.
„Очигледно е дека актуелното раководство на Република Северна Македонија не сака да продолжи по патот на европската интеграција. Тие бараат изговор во својата јавност зошто тоа не може да се случи, а изговорот е, се разбира, со клеветење на Бугарија“, коментира тој.
Ковачев е дециден дека Бугарија не дала повод за вакви провокации:
„Напротив, ние се однесуваме крајно цивилизирано, европско, сакаме добрососедство.
Бугарија мора да го почитува европскиот дух и да очекува странските кандидати да ги исполнат своите обврски“, нагласи Ковачев на прашањето дали неговата земја треба да ја зајакне својата политика во однос на Северна Македонија.
„Не ни преостанува ништо друго освен да инсистираме на нивно спроведување и да побараме од нашите партнери, како и од САД, тоа повеќепати да го повторуваат пред Скопје“, рече европратеникот.
Македонија
За јакнење на јавната доверба и углед на судството: општите седници на Врховниот суд ќе бидат јавни
Општата седница на Врховниот суд на Република Северна Македонија денеска на предлог на претседателката на Врховниот суд, Беса Адеми, донесе измени на Деловникот за работа на Врховниот суд со кои се овозможува јавност на Општата седница.
Во новите измени на Деловникот за работа на Врховниот суд се пропишува дека општите седници на Врховниот суд на Република Северна Македонија се јавни, а јавноста во работата на Општата седница се обезбедува и со присуство на претставници на средствата за јавно информирање.
Претседателката на Врховниот суд на денешната Општа седница истакна дека значењето на Врховниот суд од уставен и законски аспект, како и значењето на прашањата кои се разгледуваат пред Општата седница од правен аспект, а воедно се од интерес за граѓаните, ја наметнуваат потребата од јавност.
„Измените на Деловникот за работата на Врховниот суд се во согласност со темелните уставни вредности, законските начела и меѓународните принципи. Со предложените измени на Деловникот, ќе се даде значаен придонес за јакнење на јавната доверба и углед на судството и на Врховниот суд како највисок суд во државата.
Со предложените измени се предвидува јавност во работата на Општата седница и остварување на јавноста во работењето на судот преку нормативна новина која ќе ја унапреди и соработката и комуникацијата на Врховниот суд на Република Северна Македонија со медиумската заедница и со пошироката заинтересирана јавност.
Предложените измени се засноваат на уставните и законските начела за јавност на судството, највисоките меѓународни правни норми интегрирани во домашното законодавство, принципите на Европската конвенција за заштита на човековите права и стандардите на Европскиот суд за човековите права, европските стандарди и меѓународните документи од областа на судството и заложбите и активностите на Советот за отворено судство“, образложи претседателката Адеми.
Македонија
Мицкоски од Брисел: Бевме понижувани многупати, ние не можеме повеќе да прифаќаме ултиматуми
Денеска до сега, до овој момент имав две значајни средби. Првата беше работниот ручек кој што го организираше старо-новата претседателка на Европската Комисија Урсула Фон Дер Лајен, на кој што беа присутни и останатите пет лидери од регионот на Западен Балкан, а потоа и средба со претседателот на Европскиот Совет Шарл Мишел, информира од Брисел премиерот Христијан Мицкоски.
„Она кое што можев да го кажам таму е дека мора процесот на интегрирање во рамките на Европската Унија и за нас, но и за регионот да се темели на процес каде што ќе се оценуваат постигнувањата, а не на билатерализација, односно на билатерални прашања, кои што ќе бидат одлучувачки фактор.
За жал, ние речиси две и пол децении откако го започнавме овој интеграционен процес, откако го потпишавме Договорот за асоцијација и стабилизација, сме жртви на билатерални проблеми, односно на билатерализација на претпристапниот процес. И она што таму го кажав е дека ние сега се бориме да започнеме преговори во кои што ние ќе ги зајакнеме институциите и ќе ги збогатиме капацитетите. Не зборуваме за полноправно членство во рамки на Европската Унија. Ние поради билатерални прашања, поради прашања кои што се поврзани од средниот век не можеме да се развиваме како држава за 21, 22 век, а камоли пак да зборуваме за нешто повеќе“, изјави Мицкоски.
Уште еднаш потенцирав, нагласува Мицкоски од Брисел, дека ние не можеме повеќе да прифаќаме ултиматуми.
„И за нас принципот тие се таму, вие сте надвор, ако сакате да бидете таму треба тоа да го прифатите, простете, но ние такво нешто не можеме да прифатиме. А од друга страна ни велат дека има желба да бидеме како држава, членка во Европската Унија. Мојот одговор на таа теза е, ако има желба, тогаш има и начин. Ние сме тука да бидеме конструктивни, да останеме фокусирани на исполнување на оваа стратешка цел. Остануваме фокусирани да предлагаме решенија, и ако навистина има желба, тогаш има и начин“, вели премиерот.
Појасни дека за време на ручекот еден од присутните споменал дека се потребни жртви да се направат во овој процес на интегрирање на регионот во рамките на Европската Унија.
„Јас само потенцирав дека правење жртва можеби за нас е и добар збор и политички коректен збор, бидејќи ние бевме жртва на многу понижувања во минатото. Пожртвуваност е нешто друго. Но, ние бевме понижени многу пати. Ќе ве потсетам во името на европските вредности променивме знаме, променивме банкноти, неколку пати Устав менувавме, менувавме име, што не направивме за да покажеме дека навистина сакаме да бидеме дел од европското семејство. И некој кога ќе ми каже ама тоа е rule of unanimity или правилото на еден глас, ве молам, тоа е ултиматум.
Не се тие европските вредности во кои што мојата генерација се вљуби. Јас сум подготвен со секого да разговарам, колку е тоа потребно, со секој буквално да разговарам додека не најдеме вистински пат, кој што овој пат нема да биде понижувачки. Да ни дозволат да ги јакнеме институциите и да ги збогатиме нашите капацитети како држава, тоа е она што го барам. Дали е многу? Јас мислам дека не е многу“, додава Мицкоски во изјавата од Брисел.