Македонија
„Коцките за супа се во магацините“: од компанијата велат дека воопшто не биле дистрибуирани во малопродажната мрежа
„Подравка Македонија“ со демант на вчерашното соопштение на Агенцијата за храна и ветеринарство каде беше истакнато дека е започната итна постапка за повлекување од пазарот на потенцијално небезбедни коцки за супа од Хрватска поради можно присуство на туѓо тело.
„Во наведениот текст, неточна е секоја информација која упатува на присутност на производите: говедска коцка со серија 0507241, со рок на употреба до 05.07.2025 година и пилешка коцка со серија 0307241, со рок до 03.07.2025 година на полиците во продажните места на македонскиот пазар.
Во согласност со својата праксa за општествено одговорно работење и односи со потрошувачите, компанијата Подравка, a по извршениот инспекциски надзор од страна на Агенцијата за храна и ветеринарство (АХВ), ги известува своите потрошувачи дека производите: говедска коцка со серија 0507241, со рок на употреба до 05.07.2025 година и пилешка коцка со серија 0307241, со рок до 03.07.2025 година, се наоѓаат во магацините на „Подравка Македонија“ и воопшто не се дистрибуирани во малопродажната мрежа.
Воедно, по добиените официјални информации за потенцијална контаминација поради механичко оштетување на машината за производство на масни коцки кај производителот во Република Хрватска, во магацинот на „Подравка Македонија“ беа блокирани и двата вида на масни коцки, со упатство за суспендирање на било каква дистрибуција во малопродажната мрежа.
Потрошувачите треба да бидат спокојни бидејќи „Подравка“, како општествено одговорна компанија, им гарантира дека спорните серии масни коцки воопшто не биле пуштени во промет“, се нагласува во демантот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Ѓорѓиевски на средба со НДИ – Борбата против корупцијата е приоритет
Во просториите на општина Кисела Вода, градоначалникот и претседател на ЗЕЛС, одржа состанок со претставници на НДИ, кои го раководат проектот за борба против корупција на локално ниво.
Проектот е финансиран од Швајцарската амбасада и треба да трае 8 години. Основната цел на проектот е да се изнајдат механизми со помош на кои максимално ќе се намали корупцијата на локално, општинско ниво.
За таа цел, тие на средбата сакаа да слушнат што се основните цели во поглед на децентрализација на ЗЕЛС, како се одвиваат процесите на дигитализација на локално ниво, но и каква е соработката на ЗЕЛС со централните власти, односно што очекуваме брзо да се реализира при преговорите со Владата, информираат од кабинетот на Ѓорѓиевски.
„Ѓорѓиевски ги извести за меморандумот што пред месец дена го склучија ЗЕЛС и Владата, но и за систематизираните ставови, кои ги подготвуваме секоја година и после консултација со членките и усвојување на седница на Управен одбор на ЗЕЛС, ги доставуваме како најитни барања до Владата.
Стана збор и за лошата состојба со финансиите со кои се соочува, речиси секоја општина и нашите барања до Владата, тоа да се промени во позитивна смисла.
Претставниците на НДИ пак, не известија дека поминала подготвителната фаза на нивниот проект и дека очекуваат во ноември да го потпишат договорот за почеток на реализацијата на проектот, кој треба да трае 8 години. Известија дека, по потпишување на нивниот договор со Швајцарската амбасада, сакаат да потпишат договор со ЗЕЛС, за соработка и заедничка реализација на истиот“, се истакнува во дописот.
Македонија
Од пазарот се повлекуваат бисквити поради можност од присуство на надворешно тело, соопшти АХВ
Од македонскиот пазар се повлекуват производите на „Атлантик Штарк“: Кексичи како перелив 220 гр. серија 1507482842 и Најлепше жеље кукис 145 гр. ноисет, серија 1507483391, двата со рок на траење до 11.05.2025 година, поради можност за присуство на надворешно тело, соопшти Агенцијата за храна и ветеринарство.
„Агенцијата за храна и ветеринарство (АХВ) вчера, од компанијата „Атлантик траде Скопје Доо“ Илинден доби известување дека поради можност за присуство на надворешно тело, од пазарот ги повлекува следниве производи:
– 280766 Кексичи како перелив 220 гр. серија 1507482842 со рок на траење 11.05.2025
– 281061 Најлепше жеље кукис 145 гр. ноисет, серија 1507483391 со рок на траење 11.05.2025.
Производител на производите кои се повлекуваат според известувањето е „Атлантик Штарк доо Белград“, Република Србија“, се нагласува во информацијата од АХВ.
Агенцијата како одговорна институција за безбеднста на храната согласно законските надлежности, како што додаваат од таму, ја следи состојбата со повлекувањето на производите.
„До потрошувачите како и компанијата увозник, упатуваме апел доколку ги купиле посочените производи со сериските броеви и рокови на употреба истите да не ги консумираат или да ги вратат на продажното место од каде ги купиле“, истакнуваат од Агенцијата за храна.
Македонија
Меџити на средба со словенечкиот амбасадор Прескер: Словенија за нас е пример во делот на заштитата на природата, инвестирањето во зелена економија и зелениот развој
Првиот заменик-претседател на Владата и министер за животна средина и просторно планирање, Изет Меџити, денеска, оствари средба со амбасадорот на Република Словенија Грегор Прескер.
На средбата се разговараше за досегашната соработка меѓу двете држави, кои имаат потпишано спогодба за развојна соработка помеѓу владите на Република Северна Македонија и Република Словенија и имаат формирано заедничка мешовита комисија за билатерална соработка.
Вицепремиерот Меџити истакна дека Словенија за нас е пример во делот на заштитата на природата, инвестирањето во зелена економија и зелениот развој.
Амбасадорот Прескер ја потврди подготвеноста на Словенија да ја поддржи нашата држава на патот кон ЕУ-интеграцијата и на имплементација на активностите со кои ќе се забрза зелениот развој на државата.
Меѓу другото, Меџити и Прескер разговараа и за тековните политички прашања.