Македонија
„Вреди“: Формирањето албанска академија е рефлексија на одредени негативни состојби во државата, иницијативата доби широка поддршка

„Имаме разбирање за ставот на нашите партнери бидејќи прашањето за формирање албанска академија е чувствително, но наша цел како „Влен“ не е да им нанесуваме политичка штета на нашите коалициски партнери, туку да го спроведуваме она што сме го ветиле пред гласачите.
Секако, нашите програмски заложби нема да ги приспособуваме за личен комфор во Владата. Договорот за формирање на Владата е јасен за одредени прашања кои високо ја сензибилизираат едната јавност, како правичната застапеност во институциите за Албанците или прашањето за албанска академија за Македонците да се поведуваат иницијативи и да се обидуваме да наоѓаме заеднички прифатливи решенија“, велат од коалицијата „Вреди“.
Според нив, така функционира секоја демократска влада составена од партии со разни идеолошки и политички определби. Формирањето албанска академија е рефлексија на одредени негативни состојби во државата поради што во некои институции сѐ уште нема место за Албанците.
Од „Вреди“ соопштија дека денес се одржал состанок на политичкото координативно тело на „Влен“, при што биле дадени политичка поддршка и поголем легитимитет на новата иницијатива за академија на Албанците за наука и уметност.
Од „Вреди“ додаваат дека создавањето на оваа академија е важен чекор кон подигање на стандардите на образованието и научната креативност во нашата земја. Обезбедувајќи платформа за истражувачите, уметниците и интелектуалците од албанската заедница, академијата, како што велат, ќе овозможи размена на знаења и таленти поттикнувајќи нова култура на совршеност и иновации.
Членовите на координативното тело се согласиле дека оваа иницијатива, и покрај острите реакции, било да се тие од албанска или македонска страна, има своја благородност бидејќи се работи за знаење, култура и граѓанство, а не за создавање разлики во нашето мултиетничко општество, ниту за освојување политички поени.
По состанокот, членовите изразиле уверување дека оваа иницијатива ќе понуди нови можности за соработка и развој помагајќи во подобрувањето на квалитетот на образованието и научната креативност.
„Влен“ нагласува дека оваа иницијатива ќе биде референтна точка за сите оние што се заинтересирани за напредокот на знаењето и уметноста создавајќи поволна средина за иновации и креативност.
„Остануваме целосно посветени на обезбедување академија на Албанците за наука и уметност да ги постигне своите амбициозни цели носејќи големи придобивки за нашето општество.
Ги повикуваме сите истражувачи, уметници и интелектуалци да се приклучат на оваа важна иницијатива и да придонесат за изградба на посветла иднина за албанската наука и уметност“, истакнуваат од „Вреди“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Игуменот Георгиј избран за нов митрополит на Дебарско – кичевската епархија

Игуменот Георгиј (Ѓорѓевски) е избран за нов духовен водач на Дебарско-кичевската епархија
Тој е назначен на местото на упокоениот митрополит Тимотеј.
Георгиј, инаку, поранешен македонски амбасадор во Ватикан, неодамна се замонаши.
„На 28 мај 2025 година, кога Светата Црква го прославува Одданието на Воскресение и споменот на светите Гаврил Велички и Ахил Преспански, Неговото Блаженство Архиепископот Охридски и Македонски г. г. Стефан, отслужи Божествена Литургија во манастирот „Свети великомаченик Георгиј“ – Криви Дол, Скопје. На Литургијата Архиепископот го ракоположи во јероѓаконски чин монахот Георгиј (Ѓорѓевски).”, објави Скопската епархија на МПЦ-ОА на својата веб-страница.
Ѓорѓевски е македонски теолог и универзитетски професор. Тој е редовен професор на Православниот богословски факултет „Св. Климент Охридски“ при Универзитетот „Св. Кирил и Методиј“ во Скопје, каде што предава предмети од областа на Старозаветната теологија, вклучувајќи Библиска историја и археологија, Вовед во Стариот Завет и Егзегеза на Стариот Завет.
Своето високо образование го започнал на истиот факултет, каде што дипломирал теологија. Потоа продолжил со постдипломски студии на Понтификалниот универзитет „Грегоријана“ во Рим, Италија, каде што магистрирал и докторирал во областа на библиската теологија.
Во периодот од 2010 до 2014 година, Ѓорѓевски ја извршувал функцијата амбасадор на Македонија при Светата Столица (Ватикан).
Ѓорѓевски е автор на бројни научни трудови и книги. Во периодот од 2016 до 2023 година, тој бил декан на Православниот богословски факултет „Св. Климент Охридски“ во Скопје.
Македонија
Муцунски на проштални средби со амбасадорките на Србија и Шведска

Министерот за надворешни работи и надворешна трговија, Тимчо Муцунски, денеска оствари одвоени проштални средби со амбасадорката на Република Србија, Невена Јовановиќ, и амбасадорката на Кралството Шведска, Еми Ларсон Џејн.
На средбите, министерот Муцунски изрази благодарност за севкупниот ангажман и придонес на двете амбасадорки во унапредувањето на билатералните односи и меѓусебната соработка за време на нивниот дипломатски мандат во нашата земја.
Соговорниците изразија заедничко задоволство од континуираниот политички дијалог на високо ниво и успешната соработка во сите области од заемен интерес. Притоа, беше реафирмирана заедничката посветеност за натамошно продлабочување на односите и одржување на отворен и конструктивен дијалог по сите прашања од заеднички интерес.
Македонија
(Видео) Началници, инспектори, министри, сите тие кои требало да спречат се штитат во истрагата, вели Талески за трагедијата во Кочани

Во Кочани изгореа 62 млади животи. Изгореа во дискотека која работела незаконски, под носот на институциите. Изгореа во објект кој требало одамна да биде затворен. Изгореа зад заклучени врати, по наредба на актуелните службеници во МВР. И денес, додека родителите плачат, а државата треба да донесе правда, директните виновници се штитат од истрага, истакна на прес-конференција Миле Талески, пратеник на СДСМ.
Три месеци по трагедијата, вели тој, нема вина, нема одговорност за оние кои ако делувале вечерта, трагедијата ќе била спречена. Вистинските виновници сè уште се на слобода.
„Началници, инспектори, министри, сите тие кои требало да спречат се штитат во истрагата. Истрагата се затвора без ниеден обвинет актуелен функционер.
Наредбата со која била затворена вратата на дискотеката, клучната причина за високата бројка на жртви, до ден денес е мистерија. Никој не признава. Никој не потпишал. Никој не знае ништо. И сите зборуваат за сè освен за суштината. Кој е одговорен за тоа што децата не можеа да излезат живи, вели Талески.
Според него, оперативниот план на полицијата, наместо да се отвори пред јавноста, е прогласен за тајна.
Прашува, зошто се крие вистината за одговорноста на полицијата.
„Додека трагедијата уште боли, се штитат директните виновници:
– Дејан Салтировски, началникот на СВР Штип, човекот кој ја дал наредбата, добива политичка заштита од својот поранешен адвокат сега министер, и од самиот Мицкоски.
– Драган Петрушев Казак, службеникот што ја спровел наредбата, иако знаел дека е спротивна на процедурите.
– Кристина Јованова, која дозволила фирма со блокирана сметка да работи на црно, да организира забави за деца.
– Томо Донев, кој не мрднал прст, ни кога било јасно дека се користи пиротехника без дозвола.
Фирмата ММММ ДООЕЛ, без дозвола за пиротехника, без овластени лица, работела без проблем. Не само што никој не ја спречил – се отвора сомнеж дека имала политичка заштита. Дали затоа што била блиска до ВМРО-ДПМНЕ? Затоа што организирала митинзи за партијата? Не добиваме одговор ниту на ова прашање“.
Ова според Талески е системско злосторство.
„Кога државата не ги штити децата, туку ги штити оние што ги загрозиле, тоа веќе не е држава. Тоа е режим. Сите гледаме дека одговорност се бара кај келнери, кај диџеи, кај обезбедување. Кај последните во синџирот, но обвинителството е слепо за оние над нив. Се бараат виновници од 2012 година наваму, но не и оние кои вечерта можеле да го спречат пожарот. Никој не сака да погледне во вистинските виновници и тоа е трагедија за целиот овој процес“, додава тој.
Нагласува дека СДСМ нема да молчи и тоа не е политичка пресметка, туку должност.
„Ќе ја раскажеме вистината за Кочани, секој ден, секој детал, сè додека не паднат маските и не се појават сите имиња и од полициските командни штабови, и од владиниот врв.
Ова е масовно убиство со државен потпис и за тоа ќе има одговорност“, потенцира Талески.