Македонија
„Вреди“: Формирањето албанска академија е рефлексија на одредени негативни состојби во државата, иницијативата доби широка поддршка
„Имаме разбирање за ставот на нашите партнери бидејќи прашањето за формирање албанска академија е чувствително, но наша цел како „Влен“ не е да им нанесуваме политичка штета на нашите коалициски партнери, туку да го спроведуваме она што сме го ветиле пред гласачите.
Секако, нашите програмски заложби нема да ги приспособуваме за личен комфор во Владата. Договорот за формирање на Владата е јасен за одредени прашања кои високо ја сензибилизираат едната јавност, како правичната застапеност во институциите за Албанците или прашањето за албанска академија за Македонците да се поведуваат иницијативи и да се обидуваме да наоѓаме заеднички прифатливи решенија“, велат од коалицијата „Вреди“.
Според нив, така функционира секоја демократска влада составена од партии со разни идеолошки и политички определби. Формирањето албанска академија е рефлексија на одредени негативни состојби во државата поради што во некои институции сѐ уште нема место за Албанците.
Од „Вреди“ соопштија дека денес се одржал состанок на политичкото координативно тело на „Влен“, при што биле дадени политичка поддршка и поголем легитимитет на новата иницијатива за академија на Албанците за наука и уметност.
Од „Вреди“ додаваат дека создавањето на оваа академија е важен чекор кон подигање на стандардите на образованието и научната креативност во нашата земја. Обезбедувајќи платформа за истражувачите, уметниците и интелектуалците од албанската заедница, академијата, како што велат, ќе овозможи размена на знаења и таленти поттикнувајќи нова култура на совршеност и иновации.
Членовите на координативното тело се согласиле дека оваа иницијатива, и покрај острите реакции, било да се тие од албанска или македонска страна, има своја благородност бидејќи се работи за знаење, култура и граѓанство, а не за создавање разлики во нашето мултиетничко општество, ниту за освојување политички поени.
По состанокот, членовите изразиле уверување дека оваа иницијатива ќе понуди нови можности за соработка и развој помагајќи во подобрувањето на квалитетот на образованието и научната креативност.
„Влен“ нагласува дека оваа иницијатива ќе биде референтна точка за сите оние што се заинтересирани за напредокот на знаењето и уметноста создавајќи поволна средина за иновации и креативност.
„Остануваме целосно посветени на обезбедување академија на Албанците за наука и уметност да ги постигне своите амбициозни цели носејќи големи придобивки за нашето општество.
Ги повикуваме сите истражувачи, уметници и интелектуалци да се приклучат на оваа важна иницијатива и да придонесат за изградба на посветла иднина за албанската наука и уметност“, истакнуваат од „Вреди“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Дел од Центар денеска без вода
Од ЈП Водовод и Канализација известуваат дека денеска поради изведување на водоводен приклучок ф-125мм на улицата Светозар Марковиќ бб, прекинато водоснабдување ќе имаат корисниците на дел од улицата Светозар Марковиќ и дел од булеварот Кочо Рацин, вклучително и објектот на Веро Џамбо, општина Центар.
Водоснабдувањето ќе биде прекинато од 09:00 часот до завршување со работните активности.
Македонија
Облачно со врнежи од дожд кои повремено ќе бидат пообилни, на планините врнежи од снег
Времето денеска ќе биде облачно со врнежи од дожд кои повремено наместа ќе бидат пообилни. На планините врнежите ќе бидат од снег, а на повисоките места од дожд и снег. Во источните делови ќе има услови за ретки грмежи. Ќе дува засилен повремено силен северен ветер.
Минималната температура ќе биде во интервал од 1 до 7, а максималната ќе достигне од 7 до 13 степени.
Во Скопје, облачно со врнежи од дожд. Ќе дува засилен повремено силен ветер од северен правец. Минималната температура ќе се спушти до 3, а максималната ќе достигне до 9 степени.
Времето во наредните денови
Во среда и четврток времето ќе биде стабилно, а во четврток ноќта и во петок ќе има нови пообилни врнежи.
Македонија
Филипче: Велеа решен проблем со транспортерите, а не е, ќе понесе ли Николоски одговорност
Вицепремиерот Николовски велеше не се секирајте проблемот на транспортерите е решен, разговаравме со Европската Унија, нема да има проблем, но еве не е решен, укажа претседателот на СДСМ, Венко Филипче на средбата со Општинската организација на СДСМ во Гевгелија. Филипче посочи дека дел од компаниите веќе се селат во Бугарија и во Хрватска.
„Гледате како излажа вицепремиерот Николовски за транспортерите. Што велеше, не се секирајте, завршен е проблемот, разговаравме со Европската Унија, нема да има проблем. Еве, не е така. Ќе понесе ли одговорност затоа што не ја зборел вистината? Зборувавме со неколку компании. Веќе се селат во Бугарија и во Хрватска. Таму ќе ги регистрираат транспортните компании“, рече Филипче.
Во обраќањето Филипче нагласи дека владата на ВМРО-ДПМНЕ свесно ја доведе државата до состојба на изолација и без јасен план за напредок, што носи сериозни последици врз економијата, компаниите, граѓаните.
„Целосно не изолираа, целосно не изолираа. Ќе го враќаа името, ќе обезбедеа подобра преговарачка позиција. Ништо од тоа. Ништо. Ние сме изолирани, слепо црево на Балканот. Нема план како напред, кажува премиерот, што не кажуваше пред изборите 2024 дека ќе го запре целосно европскиот пат и нема да има уставни измени. Тој велеше и ветуваше, ќе има подобра преговарачка позиција за земјата. Затоа му дадоа поддршка луѓето, не за да го запре европскиот пат на земјата којшто трае од 1991 прва година“, рече Филипче.
Тој додаде дека премиерот Мицкоски нема право да ја држи изолирана државата и да ја загрозува иднината на граѓаните.
„Тој нема право да го прави тоа, тој нема никакво право, ни морално, ни политичко, да ја запре земјата, да ја изолира, да не стави целосно на страна, под силно влијание на српско-унгарски интереси, на медиумска мрежа којашто не ја кажавме ние, ја анализираа независни истражувачки новинари.Кажаа дека таква мрежа, која што шири антиевропски наратив, проруски наратив е контролирана од Орбан. 40% од медиумите кај нас се под контрола на Орбановата мрежа на медиуми“, рече Филипче.

