Цената на златото денеска за првпат на светските пазари надминаа 3.200 долари, додека инвеститорите бараат безбедно засолниште за својот капитал во услови на слабеење на доларот и стравувањата дека трговската војна меѓу САД и Кина може да ја загрози светската економија.

На физичкиот пазар унца злато попладне чинеше 3.223,36 долари и поскапе за 1,56 отсто од вчерашното затворање. Ова е највисока цена откако златото се тргува на берзата. Од почетокот на неделата поскапе за околу шест отсто.

На американскиот пазар златото се тргуваше по цена повисока за 2,14 отсто, по речиси 3.228 долари.

Американскиот претседател, Доналд Трамп, вчера ги зголеми тарифите за кинески стоки на дури 145 отсто, а Пекинг возврати со зголемување на царините за увоз од САД на 125 отсто.

„Постои зголемен ризик од рецесија, приносите на обврзниците растат, а американскиот долар слабее. Сето тоа се фактори кои го поддржуваат златото во улога на еден вид заштита од криза и инфлација“, изјави трговецот со благородни метали во германската филијала на Хереус Металс, Александар Зумфе.

Инвеститорите традиционално купуваат злато за да ги заштитат вредностите на средствата во периоди на зголемена економска и политичка нестабилност и да се спротивстават на падот на каматните стапки. Клиенти се и централните банки кои сакаат да го зајакнат билансот на состојба и да ги обезбедат залихите.

Во вакви услови златото лани поскапе за повеќе од 28 отсто, покажуваат пресметките на здружението на рударски компании WGC. Од почетокот на годината неговата цена е зголемена за речиси 21 отсто.

Послабиот долар, исто така, ја зголемува побарувачката за злато бидејќи ја зајакнува куповната моќ на инвеститорите со други валути, забележува „Ројтерс“.

Американскиот претседател, Доналд Трамп, изјави дека американскиот милијардер Илон Маск, кој раководи со американското Министерство за владина ефикасност (DOGE), не е неопходен во неговата администрација, „туку едноставно му се допаѓа“.

„Илон заврши фантастична работа… Не ми треба за ништо друго освен што случајно ми се допаѓа. Овој човек, ова момче заврши фантастична работа“, рече Трамп во разговор со новинарите и членовите на кабинетот во Белата куќа, пренесува Business Insider.

Маск, кој доби широк пристап до владините операции и податоци преку неговата улога во борбата против злоупотребите и измамите во американската администрација, е помалку присутен во јавноста од минатонеделната трка за Врховниот суд во Висконсин, која ја загубија републиканците.

Според извештаите на медиумите, ова покренало прашања за неговото идно учество во администрацијата, особено што поретко го гледале во Белата куќа.

Некои американски медиуми го обвинија Трамп за злоупотреба на својата моќ, вклучително и претворање на Белата куќа во изложбен салон за „Тесла“, чиј извршен директор е Маск, откако минатиот месец американскиот претседател најави дека ќе го купи електричниот автомобил на производителот.

Трамп негираше дека добил посебни услови за ова купување и дека тоа го направил „за поддршка на Маск“.

„Не ми треба неговиот автомобил. Јас всушност го купив затоа што ми рекоа: „О, дали го купивте евтино? Реков „не, дај ми ја највисоката цена“. Платив многу пари за тој автомобил. Но, искрено, тој прави одлични автомобили… Јас го направив тоа во знак на поддршка“, рече Трамп.

Тој, исто така, рече дека Маск „не бил третиран како што треба“, алудирајќи на протестите насочени кон милијардерот и насилните напади врз салоните на „Тесла“.

Премиерот на Србија во технички мандат и претседател на СНС, Милош Вучевиќ денеска изјави дека претседателот на Партијата на слободата и правдата, Драган Ѓилас го уништил и опустошил Белград повеќе од германските окупатори и дека веќе никој не верува во неговите „Потемкинови села“.

„Внимавајте што вели експертот за кражба на народни пари, човекот кој Белград го направи негова приватна сопственост и го уништи и го направи полош од германските окупатори“, рече Вучевиќ на мрежата Икс, реагирајќи на најавата на Ѓилас на социјалните мрежи за формирање на новата влада на Србија.

Вучевиќ изјавил дека цената на кражбата на Ѓилас ја платиле граѓаните на Србија со години, додека тој кон Белград имал долг од 1,2 милијарди евра, а в џеб ставил 619 милиони евра.

„Почитуван Ѓилас, одамна никој не верува во вашите „Потемкински села“, Белград и Србија не се лонец со злато од кој можете да извадите пари колку сакате“, истакна Вучевиќ.

Тој додаде дека никој не сака неговите алтернативи за нормален живот и сигурна иднина да бидат криминал, ароганција, грабеж, насилство, неморал, злоупотреба на службената положба, бидејќи, како што истакна, тоа се синоними за Ѓилас и неговата „банда крадци кои би се вратиле на власт без волјата на народот“.

Нема да се извлечете! Србија ќе победи!“, нагласи Вучевиќ, пренесува Танјуг.