Регион
Вучиќ: Запирањето на сообраќајот на железничките станици и патишта е терор врз мнозинството
Српскиот претседател Александар Вучиќ изјави дека блокадата на железницата и патиштата на протестот во Белград поради плановите за ископ на литиум е исмејување на демократијата.
Оцени дека протестот се одвивал во демократска атмосфера, но по неговото завршување се случило она што го очекувале.
„Затоа што кога се заканувате секој ден, се случува насилството да преовладува“, истакна Вучиќ во своето обраќање, пренесе „Радио Слободна Европа“ (РСЕ).
Додаде дека запирањето на сообраќајот на железничките станици и патишта е спроведување на насилството, волјата и теророт на малцинството врз мнозинството.
Според него дека блокадите и протестите не се решение, туку разговор, додавајќи дека на разговор повикал и претставници на опозицијата, но тие не дошле.
Вучиќ рече и дека ќе разговара со народот за стравот од ископ на литиум и со оние кои мислат поинаку.
„Ќе одам да разговарам со народот. Ќе одам и во Лозница, Крупањ, Мали Зворник, Милановац, Чачак и Ваљево“, рече Вучиќ.
Како што додаде, сака да разговара со народот за распишување референдум за литиумот, без разлика дали се работи за референдум во целата држава или на територијата на градот Лозница.
Полицијата во неделата околу 5:30 часот ги разбрка учесниците на протестот против ископувањето на литиум од железничките станици „Белград центар – Прокоп“ и „Нови Београд“.
Министерот за внатрешни работи Ивица Дачиќ изјави дека полицијата интервенирала без употреба на присилни средства и дека нема повредени.
„Приведени се вкупно 14 лица поради постоење на основано сомнение дека сториле кривични дела, три поради сомнение за сторени прекршоци и две лица кои се странски државјани поради присуство на протестот во близина на најважните државни институции“ изјави Дачиќ.
Како што подвлече, полицијата работи на идентификација на други лица.
Илјадници граѓани се собраа во саботата во центарот на Белград на покана на Алијансата на еколошките организации на Србија, откако владата не го исполни нивното барање да донесе закон во рок од 40 дена со кој се забранува ископ на литиум и отворање рудници од страна на компанијата „Рио Тинто“ во долината на реката Јадар на запад од државата.
Учесниците на протестот против ископ на литиум во Белград блокираа две железнички станици во главниот град на Србија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Вархеји: Добра средба со Вучиќ за спроведување на следните чекори, планот за раст во полн ек
Европскиот комесар за соседска политика и проширување Оливер Вархеји денеска изјави дека имал добра средба со српскиот претседател Александар Вучиќ во Брисел за да ги подготви следните чекори во време кога се започнуваат „амбициозните реформи засновани на реформската агенда на Србија“.
Вархеји на социјалната мрежа Х оцени дека новиот План за раст на Западен Балкан вреден шест милијарди евра е во полн ек.
„На маргините на состанокот на лидерите од Западен Балкан, имав добар состанок со претседателот Александар Вучиќ за да ги подготвам следните чекори додека започнуваме амбициозни реформи врз основа на реформската агенда на Србија. Новиот план за раст од 6 милијарди евра е веќе во полн ек. Повеќе реформи, повеќе поддршка!“, рече Вархеји.
Регион
Експлозија во Нови Сад: едно лице повредено
Едно лице е повредено денеска кога се случила експлозија во Нови Сад.
Дошло до експлозија на плинска боца.
Повредениот веднаш бил пренесен на Ургентниот центар, но за сега не се знае за сериозноста на повредите. Истрагата е во тек, а по задолжителниот увид, се очекува на самото место да излезат екипи на компанијата „Нови Сад гас“.
Регион
Три девојчиња претепале врсничка пред училиште во Панчево
На социјалните мрежи се појави снимка од тепачка што се случи синоќа во Панчево, а според првите информации, се работи за тинејџерки, инаку малолетни.
На видеото се гледа како три девојчиња ги тепаат своите врсници.
Околу нив има голем број луѓе, но никој не се обидува да ги спречи во насилството. Во еден момент претепаното девојче паѓа на бетонот, но трите врснички продолжуваат да ја удираат по главата по што некој од присутните ги раздвојува.
Од полициската управа во Панчево велат дека веднаш ги презеле сите дејства за идентификување на учесниците и утврдување на околностите, но дека самиот случај не бил пријавен во полиција од ниту еден од учесниците. Исто така, потенцираа дека по сознанијата за актерите на инцидентот, ќе се консултираат надлежното обвинителство и судот.