Сите коалиционери во Вреди, освен министерот за здравство и лидер на Алијанса за Албанците, Арбен Таравари, сметат дека единствена опција им е коалицијата да прерасне во политичка партија. Министерот за животна средина и лидер на партијата Демократско движење која е дел од Вреди, Изет Меџити, денес јавно, од говорницата во Владата го повика Таравари да ги прекине преговорите со ДУИ и да остане во Вреди за Албанците да  имаат два табора, како што има во Косово и во Албанија.

„Јавно го поканувам Таравари да рефлектира. Тој е дел од Вреди, го сакаме внатре во Вреди. Граѓанинот, гласачот, сака Вреди за се фузира во една партија за да има два табора во албанскиот блок, да има конкуренција меѓу Албанците. Да не биде еден наспроти десет за и да се распредели албанскиот глас, туку да има два табора. Најсилниот табор е Вреди каде е Алијанса на Таравари, каде го посакуваме, но последно време е да се повлече од преговорите со ДУИ. Не може да биде и дел од Вреди и да разговара со ДУИ“, рече Меџити.

Тој побара Таравари да се одлучи и да пресече оти не е во интерес ниту на коалицијата ниту на граѓаните да преговара со ДУИ.

„И јас и тој вчера избегавме од ДУИ која не беше на ова дереџе. Сега една ДУИ која е на црните листи, со пола претседателство затрени за корупција, соработката со нив ќе значи дека треба да се испорачаат и фактури оттаму оти тие ќе имаат некои барања. Преговори со ДУИ значат дека може да испорача и фактури од ДУИ. Тогаш ќе се коси со политиките на Владата“, рече Меџити.

Тој и денес, исто како и претходните денови, објаснуваше дека коалицијата Вреди е формирана како антипод на ДУИ и дека идејата да прерасне во една политичка партија е од формирањето на коалицијата. Се чекал погоден момент, а наводните преговори на Таравари со ДУИ биле аларм дека тоа мора да се направи сега.

„Ова не е нова идеја туку е идеја од почеток. Тогаш не сакавме ниту да избрзуваме со овој процес ниту да го оставиме на заборав. Затоа оценивме дека е време посебно со вие превирања каде господинот Таравари јавно искажува дека има две опции, се поставува како партнер, не дел од Вреди, значи може да преговара и со Вреди и со ДУИ. Во оваа ситуација оценивме, другиот дел од Вреди, дека е време да ги затвориме темите на мали политички партии и да го формираме Вреди како алтернатива на Албанците која ги донесе промените, победи на изборите и ќе ги предводи промени за граѓаните да ги чувствуваат разликите“, рече Меџити.

Преминот на Вреди од коалиција во еден политички субјект, според Меџити реално е почнат од мината година оти веќе имаат заеднички тела како што е центарот за информирање, кадровската комисија и други тела во кои свои членови имаат сите коалиционери во Вреди.

Како коалиција, Меџити рече дека Вреди освоила историски рекорден број гласови како албанска опозиција, но гласовите не се на само една партија која е дел од коалицијата туку на сите заедно и затоа смета дека обврска им е така и да продолжат.

„Од деведесеттите досега имало коалиции и коалиции. Десетици и стотици коалиции во Република Северна Македонија, но никогаш не се случило во Влада да се заедно, а на локални да одат на посебни листи и да се поделат“, рече Меџити и потврди дека Таравари бил надгласан од останатите коалиционери оти предложил сите да одат со посебни листи.

Како втор политички аргумент против предлогот на Таравари, Меџити  наведе дека за листите за советници основата е Донтовиот систем кој што ги фаворизира големите.

„И ние како Вреди сме во големите и место да користиме гласови кои ќе изгорат кај малите политички субјекти, ние бараме од големите да преминеме кај малите. Тоа веќе не е во интерес и во функција на Вреди туку оди во прилог на друга политичка партија“, рече Меџити.

Министерот за здравство и лидер на Алијанса за Албанците Арбен Таравари, пак, вчера рече дека ако останатите коалиционери во Вреди веќе се договориле да се спојат во една политичка партија, тој е подготвен да им го отстапи името Вреди, а на локалните избори да излезат сами како Алијанса за Албанците. Отсечно негираше дека преговара со ДУИ за локалните избори и кажа дека му се допаѓа концептот Вреди да прерасне во политичка партија.

Алијансата на Албанците се огласи по апсењето на Мухсин Арифи, директорот на болницата за геријатрија, поради поткуп.

Од партијата на Таравари, чијшто кадар е Арифи, ги повикуваат надлежните државни органи во брза и ефикасна постапка да ги расчистат сите околности поврзани со конкретниот кривично правен настан.

„Секој кој се огрешил пред законите мора да понесе одговорност, без разлика на етничката, верската или политичката припадност. Испораката на правда мора да биде неселективна“, се вели во дописот до медиумите.

Се додава дека Алијансата останува силно посветена на борбата против корупцијата, а албанскиот народ не заслужува да го претставуваат лица кои евентуално се обидуваат нелегално да се збогатат на здравствените маки на граѓаните.

„Ова е недозволиво и надвор од принципите кои ги застапуваме“, децидна е партијата која уверува дека партиските органи ќе ги преземат сите неопходни статутарни чекори за зачувување на угледот.

Во акција на Министерството за внатрешни работи (МВР) и Основното јавно обвинителство за гонење организиран криминал и корупција (ОЈО ГОКК), приведени се две лица под сомнение за примање поткуп и примање награда за противзаконито влијание.

Премиерот Христијан Мицкоски побара да се разгледа работењето на судијата во Тетово, кој вчера досуди две години затвор за возачот што смртно ја прегази 22-годишната Теодора Ристевска пред три години. Тој побара нова пресуда за случајот и рече дека вчерашната пресуда не е правда, туку станува збор за потфрлање на системот по сите основи.

„Вчера, јавноста најново се згрози за случајот во Тетово. По сообраќајната несреќа во август 2022 година, на првото судење во ноември 2023 година, по признавањето вина, сторителот кој одзеде млад живот беше осуден на три години и шест месеци затвор. По жалбата, Апелациониот суд ја намали казната, повторувам, Апелациониот суд ја намали казната на две години затвор за Врховниот суд да ги укине двете пресуди на Основниот и на Апелациониот суд и предметот го врати на повторно судење. Судот во Тетово вчера му досуди две години затвор на сторителот, кој смртно одзеде недолжен човечки живот, 22-годишната Теодора Ристевска. Повторувам, судот во Тетово му досуди две години затвор на сторителот што смртно ја прегази 22-годишната Теодора Ристевска. Јавно да прашам, има ли некој во државава кој смета дека тука имаме задоволена правда?! Јас не само што не сметам дека правдата е задоволена, но и како претседател на Владата, како човек и родител на две деца сум силно разочаран. Ова не е правда и тука имаме потфрлање на системот по сите основи. Знам дека некој ќе ми се налути, ќе излезат и такви полноглавци што ќе ме критикуваат по ова што ќе го кажам, но јавно барам од Судскиот совет да се преразгледа работењето на овој судија и уште еднаш да се реализира оваа пресуда“, изјави Мицкоски.

Премиерот истакна дека ова не е партиска борба, ова е битка за вистината, за одговорноста, за правдата.

„Затоа што ова е борба меѓу луѓе и нелуѓе. И луѓето мора да победат. Само така можеме заедно да победиме. Ако овој систем не се ресетира сега, ако не се преземат мерки сега, тогаш бадијала ни е сè. Ова не е прашање на политика, ова е прашање на иднината. Кој бил дел од ова, кој дозволил, кој гледал настрана – ќе одговара. И институциите, и одговорните лица, и сите што на кој било начин придонеле за оваа трагедија да се случи. Секој што ја злоупотребил својата моќ, секој што го ставил својот интерес пред безбедноста на граѓаните – ќе се соочи со правдата“, рече Мицкоски.

Премиерот уверува дека ова нема да биде уште еден случај што ќе се затвори без одговорност.

Тој додаде дека лично ќе го следи случајот и вети дека правдата ќе биде истерана до крај.

„Ова е моментот кога мораме да покажеме дека законите важат за сите. Затоа што можна следна жртва е секој од нас. Секој што ја злоупотребил својата моќ, секој што го ставил својот интерес пред безбедноста на граѓаните – ќе се соочи со правдата. Ова е моментот кога мора да покажеме дека законите важат за сите“, рече Мицкоски.