Скопје
Ѓорѓиевски: Владата да ги одземе ингеренциите на Град Скопје за „Комунална хигиена“ и „Паркови и зеленило“
Денес, на иницијатива на градоначалникот Орце Ѓорѓиевски, во просториите на Општина Кисела Вода се одржа координатива средба со скопските градоначалници, на кои се дискутираа актуелните проблеми со кои се соочуваат жителите на Скопје. Соочени и загрижени поради нефункционалноста на јавните претпријатија, кои се под надлежност на Град Скопје, едногласно донесоа одлука да се предложи до Владата и Министерството за животна средина да ги одземат ингеренциите на јавните претпријатија „Комунална хигиена“ и „Паркови и зеленило“.
„Ние имаме чести средби со моите колеги градоначалници, на кои ги евидентираме проблемите и предизвиците со кои се соочуваме и заеднички бараме решенија. Денешната координативна средба ја иницирав токму поради вакви многубројни наталожени проблеми, со кои се соочува главниот град и она што како приоритетно сите го издвоивме е нашето незадоволство и загриженоста за состојбата со јавните претприја ‘Комунална хигиена’ и ‘Паркови и зеленило’. Негрижата и неработењето на овие претпријатија резултираа со преполни контејнери, наталожен отпад насекаде и создадени депонии низ главниот град на државата. Во услови на летни температури од над 40 степени ова повеќе не е само естетски проблем туку претставува сериозна закана за здравјето и животот на нашите сограѓани. Преплавени сме од поплаки, од барања ние да направиме нешто кога веќе Градот Скопје не се грижи. И верувајте, нашата борба трае веќе долго. Нема да говорам за константните јавувања, дописи до ЈП Комунална хигиена и до ЈП Паркови и зеленило и до нивната шефица, градоначалничката Данела Арсовска. Ќе потсетам дека во повеќе наврати се самоорганизираме за чистење, што верувајте не е едноставно бидејќи немаме механизација, ниту човечки ресурси, а најиронично во целата ситуација е тоа што моравме да водиме и војна со градоначалничката Данела Арсовска која, замислете, минатото лето, не ни дозволи да го фрлиме собраниот отпад во Дрисла. Значи не само што јавното претпријатие во нејзина надлежност не си ја работеше работата, туку и не попречуваше нас да си ги исчистиме општините и да ги заштитиме нашите граѓани од зарази“, рече Ѓорѓиевски.
„Пред неколку седмици, јас, како градоначалник на Општина Кисела Вода и неколку други градоначалници од Скопје поднесовме прекршочни пријави против ЈП Комунална хигиена. Меѓутоа, очигледно и тоа не допира до нив бидејќи градот сѐ уште тоне во ѓубре и смрдеа. Сите сме согласни дека се потребни подрастични мерки.
Оттука, денес, едногласно одлучивме да побараме одземање на ингеренциите на ЈП Комунална хигиена I JП “Паркови и зеленило” од Град Скопје и нивно предавање на централната власт, односно на Владата. Предлогот, кој го поддржаа сите градоначалници, е назначување на владин претставник кој ќе ги управува претпријатијата, а потоа и целосно трансформирање на истите. Вработените и механизацијата да бидат распределени на општините, кои сами ќе се грижат за хигиената во своите заедници.
Не смееме да дозволиме вакво неодговорно однесување, ниту од страна на раководството на Град Скопје, ниту од Комуналнa хигиена. Градот Скопје не е полигон за детска игра каде што некој ќе тера инает и ќе ги казнува скопјани од само нему познати причини.
Повеќе не нѐ интересира дали се работи за некадарност, мрзеливост, неспособност или што и да е причината што нашата метропола е доведена во алармантна состојба. Нашите граѓани плаќаат за услуга што не ја добиваат и тоа мора да престане. Секој граѓанин има право на чист и здрав животен простор, а ние како градоначалници сме должни да го обезбедиме тоа“, истакна градоначалникот Орце Ѓорѓиевски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Скопје
Герасимовски: Личните асистенти се веќе во училиштата, продолжуваме со инклузивниот пристап
Општина Центар обезбеди лични асистенти за 23 ученици со посебни образовни потреби, со што во целост им одговори на барањата на основните општински училишта за овој вид инклузивна поддршка. Од општинските служби најавуваат дека по адаптацијата на првачињата, можно е да се јави потреба од зголемување на бројката на лични асистенти за што локалната самоуправа има обезбедено средства во буџетот. Потенцираат дека повеќето ангажирани асистенти имаат долгогодишно искуство во оваа проблематика, а меѓу нив има лиценцирани и стручни лица.
„Запознаен сум со профилот на личните асистенти со кои ги потпишавме договорите за работно ангажирање во проектот ‘Образование за сите’. Можам да кажам дека и годинава имаме квалитетен кадар. Асистентите се од голема помош за севкупниот наставен процес. Со нивна поддршка на учениците им се обезбедува полесен пристап и движење во училишните простории, совладување на образовните содржини и адаптација и прифаќање во средината“, посочува градоначалникот на општина Центар, Горан Герасимовски.
Личните асистенти се ангажирани со скратено време од 20 работни часа неделно, во период од 9 месеци.
За ангажманот добиваат паричен надоместок во висина од 15.000,00 денари (нето-износ), со вклучен данок на личен доход и осигурување за инвалидност и телесно оштетување предизвикано од повреда на работа и професионална болест.
Општина Центар е една од ретките општини во државата, која години доследно и со свои сопствени сили го финансира проектот „Образование за сите“.
Скопје
(Видео) Мицкоски од Аеродром: Доградбата на ООУ „Блаже Конески“ од 200.000.000 денари ќе овозможи децата да се образуваат во современи услови
„Денеска сме овде во Општина Аеродром да означиме почеток на уште еден проект којшто значи пред сѐ за жителите во Општина Аеродром. 200 милиони денари е навистина огромна капитална инвестиција со којашто ќе се овозможи да децата се образуваат и да го стекнуваат своето знаење во услови коишто ќе бидат современи, би рекол европски. Како Влада ќе продолжиме и во иднина да ги продолжуваме ваквите иницијативи, ваквите проекти“, рече премиерот Христијан Мицкоски.
„Морам да напоменам дека заврши Јавниот повик којшто го објави Министерството за локална самоуправа во којшто беа повикани општините да поднесат предлог проекти. Општина Аеродром, исто така, поднесе свои проекти. Истото тоа ќе го сториме на почетокот на следната година, така што сето она коешто е ветено ќе биде испорачано. Можам да кажам дека повеќе од 21 милијарда денари ќе бидат реалоцирани од централниот буџет кон општините за капитални инвестиции, за нови булевари, улици, водоводи, канализации, училишта, градинки итн.. Нешто што досега не се случило“, посочи Мицкоски и додаде:
„Сепак, тоа е една огромна инвестициска активност. Целта на оваа Влада е да поддржува капитални инвестиции, да поддржува проекти коишто ќе значат додадена вредност во квалитетот на живот на македонските граѓани. Јас како претседател на Владата можам да кажам дека многу работи недостасувале изминативе години да се направат во Македонија. Нашиот мотив и инспирација се граѓаните. Така беше овие нецели три месеци откако сме Влада, така ќе биде и во иднина. Има многу да се направи, имајќи ја предвид катастрофалната ситуација којашто ја затекнавме оној 24 јуни, но тоа е што е. Ние мораме да го испорачаме тоа коешто сме го ветиле и тоа од ден на ден го испорачуваме. Ова е дел од тие ветувања и многу сум радосен што ете отпочнува со реализација овој капитален проект, бидејќи бев информиран од градоначалникот дека доколку ова не се случеше постоеше можност тука да се воведе и трета смена, нешто што не треба да го дозволиме, а ние сме за едносменско работење. Така што ова драматично ќе ја олесни работата“.
Скопје
Ѓорѓиевски: По четири децении, нов асфалт на краците 1, 7, 9 и 11 од улицата ,Христо Татарчев
Се реконструираат краците на улицата „Христо Татарчев“ во Кисела Вода.
Според она што го изјави градоначалникот Орце Ѓорѓиевски, се работи за улици кои не биле реконтруирани четири децении. Реконструкцијата на овој дел од општината опфаќа 3500м2 површина, а обновата на целата патна инфраструктура продолжува и понатаму.
– Она за кое со доаѓањето на градоначалничката функција дадов збор пред мојот народ, а тоа е дека до крајот на мандатот нема да има неасфалтирани улици во Кисела Вода, се остварува според утврдениот план. Се работи за реконструкција улицата „Христо Татарчев“ со вкупна површина од 3500 метри квадратни, односно краците 1, 7, 9 и 11 кои со децении биле заборавени од минатите локални власти.
Реконструкцијата на целата патна инфраструктура во Кисела Вода беше голем предизвик. И денес, со гордост можам да кажам дека направивме повеќе од предвиденото, си поставивме цел и докажавме дека со многу труд, посветеност и желба за работа се стигнува до целта.
Нашата цел е населбите во општината да бидат модерни и да ги нудат сите потребни услови за живеење“, истакна Ѓорѓиевски.