Скопје
„Сѐ што треба Мицкоски да направи за да го деблокира Градот е да им испрати СМС-порака на своите експоненти“, велат од Град Скопје

„Мицкоски нема кредибилитет да зборува за кадровска политика. Особено не откако назначи бивш затвореник за заменик-директор на затвор. Или кога назначи главен ревизор за ЕУ-фондови, па го разреши за неколку дена. Мицкоски нема кредибилитет да зборува за ветувања, особено не откако го призна преспанскиот договор за реалност иако три години ветуваше дека кога ќе дојде на власт, ќе го врати името“, соопштуваат од Град Скопје.
„Мицкоски повеќе од 2 години е власт во Град Скопје, а сега и во Македонија, затоа наместо да нарачува и да се крие зад партиски соопштенија полни со клевети, уште еднаш го повикуваме да престане со две и полгодишната деструктивна политика на целосна блокада на главниот град преку неговите управни одбори и советниците. Ако толку се грижи за градот и за скопјани, на следниот совет, наредбата, наместо да се блокира, да биде да гласаат за спроведување на проектите што Арсовска и Мицкоски заедно ги ветија на граѓаните.
Мицкоски можеше и сѐ уште може, ако сака, да им овозможи на скопјани нови автобуси, нови контејнери, нови машини за собирање смет, повеќе комунални работници, нови зелени површини. Сѐ што треба да направи за да го деблокира Градот е да испрати СМС-порака на своите експоненти во Градот од денес да работат во корист на граѓаните, а не на партијата.
И за крај, Владата четврта година по ред ја нема платено обврската кон ЈСП за студентскиот стандард. Наместо тоа, еве сега има можност да плати рата за автобусите на Шилегов за кои ВМРО-ДПМНЕ гласаше тој да ги набави“, се додава во соопштението на Град Скопје.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Фото) Пуштени во употреба спортските игралишта во училиштето Гоце Делчев во општина Илинден

Со одржување на спортски натпревари во фудбал и кошарка беа пуштени во употреба спортските игралишта за фудбал, ракомет и кошарка во ООУ Гоце Делчев, во Илинден, кои во изминатиот период беа целосно реконструирани, извести општина Илинден.
Градоначалникот на општина Илинден, Александар Георгиевски присуствуваше на свеченото пуштање во употреба на игралиштата и истакна дека учениците од ова училиште добија комплетно реконструиран и убаво уреден спортски простор, наменет за квалитетно и безбедно одржување на часовите по физичко и здравствено образование.
„Во рамки на реконструкцијата поставена е заштитна ограда и метални столбови за осветлување. На игралиштето за мал фудбал, ракомет и одбојка поставени се нови голови, вештачка трева, а на игралиштето за кошарка нови табли и обрачи за кош, додека подот е поплочен со гумирана подлога. Исто така во рамки на спортските терени поставени се клупи, корпи за отпадоци, просторот е партерно уреден, со што овие спортски игралишта добија комплетно нов лик.
Средствата за реализација на овој проект се целосно обезбедени од Буџетот на општина Илинден, а во наредниот период ќе се продолжи со изградба на нови и реконструкција на постоечките спортски терени и во останатите населени места, со цел да се добие уреден простор, но и безбеден за рекреација и забава на жителите во Општината“, се додава во соопштението.
Македонија
Без вода дел од Центар

Од ЈП Водовод и канализација Скопје известуваат дека денеска поради уличен водоводен дефект од ф 150мм на улицата Самоилова бр.50 во Центар, со прекинато водоснабдување ќе бидат корисниците од улицата Самоилова, улицата Јоаким Крчовски и улицата Банатска.
Водоснабдувањето ќе биде прекинато од 08:40 часот до завршување со санирање на дефектот.
Македонија
Дел од Карпош и Аеродром денеска без струја

Од ЕВН Македонија АД известуваат дека денеска без електрична енергија ќе останат:
– во периодот од 08.30 до 15.30 часот, корисниците од улицата Франце Прешерн, општина Карпош;
– во периодот од 09.00 до 13.00 часот, корисниците од улиците Симеон Кавраков, Петар Ацев и Анастас Митрев, општина Аеродром.