Скопје
(Видео) Шутаров: Ова што му се случува на Скопје е најголемата катастрофа по земјотресот
До денеска изминати се точно 1.018 денови од кога ВМРО-ДПМНЕ и Мицкоски ја востоличија Арсовска за градоначалник на Скопје како „најуспешна менџерка“. Над 1.000 денови како ВМРО-ДПМНЕ има мнозинство во Советот, претседател на Советот и бројни членови на управните одбори во градот, изјави советникот во Советот на Град Скопје, Гордан Шутаров.
„За сите изминати катастрофални денови за нашето Скопје, изгубени за скопјани и пропадната шанса за развој и напредок на главниот град виновни се Мицкоски и ВМРО-ДПМНЕ.
Откако им пропаднаа бизнис зделките со Арсовска започнаа да се изживуваат со скопјани. Иако имаат мнозинство во Советот со години и на секаков можен начин ја кочат работата и на јавните претпријатија и на градот воопшто.
Градот Скопје и јавните претпријатија функционираат врз основа на изгласување на Буџет и Програми за работа.
Но советниците на ДПМНЕ не ги гласаа програмите за:
-воведување брз и еколошки транспорт (БРТ)
-програмата за развој
-програмата за превоз на патници
-за изградба и реконструкција на улици
– за субвенции за улици и патишта
-за заштита на животната средина
-инвестиционите програми за јавните претпријатија.
ВМРО-ДПМНЕ намерно не ги гласаа овие програми, само за да прават штета и да се пресметаат со Арсовска. Заедно со неспособноста на Арсовска ДПМНЕ го турна нашиот главен град во пропаст.
Ова што му се случува на Скопје е најголемата катастрофа после земјотресот. Градот никогаш не бил по нечист, полн е со ѓубре, со јавни претпријатија на раб на колапс.
Град во кој нема нови модерни 250 еколошки автобуси и дури воопшто нема автобуси а тие што ги има доцнат, се палат и не се безбедни.
Се уште не може да се поврзат двата нови моста изградени со пари добиени од ТАВ Програмата, мостот Михајло Апостолски во Аеродром и мостот Љубљанска во Карпош.
Има неисчистени диви депонии, нереализираните 5 мега паркови, непостоењето на нов модерен луна парк најголем на овие простори.
Ниту еден капитален проект не е реализиран, ниту пак нешто е направено. Загубени денови, загубени години за Скопје кои граѓаните не ги заслужуваат.
После целиот хаос што го создаде во Скопје вчера слушаме дека на Мицкоски и ВМРО-ДПМНЕ им текнало на Скопје.
Па уште се обидуваат да се прикажат како спасители кои ете ќе ги решеле проблемите во градот.
Касно е дечки. Касните 1.000 денови.
На 400 дена пред локалните избори ова не е ништо друго туку обид за перење на сопствената вина за она што душмански му го направија на Скопје.
Пред било што да направи ВМРО-ДПМНЕ треба да излезе и да им се извини на граѓаните на Скопје и да преземе одговорност.
Бараме првенствено ВМРО-ДПМНЕ да им се извини на сите граѓани на Скопје за ситуацијата во која свесно го донесоа Градот.
Потоа ВМРО-ДПМНЕ треба да одговори што се случува со капиталните проекти:
Зошто нема нови 250 модерни еколошки автобуси ?
Што ќе се случи со проектот на БРТ? За кој со закон во Собранието и потпишан договор помеѓу министерството за финансии, транспорт и врски и ЕБОР се обезбедија 70 милиони евра за нов концепт на јавен превоз во Градот Скопје, за кои на годишно ниво плаќаме камати заради нереализирање на истиот“, рече тој.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Скопје
Над 7.500 ученици во општина Аеродром добија бесплатни училишни униформи
Над 7.500 ученици од сите основни училишта и оваа година добиваат бесплатни училишни униформи составени од две блузи, две маички и дуксер.
В. д. градоначалникот на Општина Аеродром. Дејан Митески денеска присуствуваше на доделувањето на униформите во ООУ „Александар Македонски“ во Реонски центар Аеродром, каде што дечињата со радост ја добија својата нова училишна облека.
Целта на овој проект е да обезбеди подобри и посовремени услови за одвивање на наставата, истовремено водејќи сметка во голема мера да се растовари и буџетот на семејствата кои имаат основци.
Општина Аеродром за набавка на овие униформи издвои речиси 19 милиони денари.
Сакаме сите ученици да имаат еднаков пристап до образованието, а ние како Општина ќе продолжиме да вложуваме во училиштата и во подобрување на условите за наставата, велат од Општината.
Скопје
Стефковски: Градиме нов паркинг во Автокоманда
Градоначалникот на општина Гази Баба Бобан Стефковски утрово беше на терен во Автокоманда каде што направи увид на градежните активности за изградба на нов паркинг простор на улица Габреш.
За посетата, градоначалникот Стефковски информираше на својата официјална страна на фејсбук на која напиша:
Градиме нов паркинг простор на улица Габреш во Автокоманда. Утрово направивме увид на градежните активности за изградба на нов паркинг простор на улица Габреш во Автокоманда. Со реализација на овој проект обезбедуваме 58 нови паркинг места.
Решавањето на проблемот со недостатокот на паркинг места во Автокоманда, останува еден од клучните приоритети на општината.
Заклучно со изградбата на овој паркинг од почетокот на мојот мандат имаме обезбедено повеќе од 150 нови паркинг места за жителите на Автокоманда. Дополнително тим од општината во соработка со надлежните институции посветено работи на реализација на сообраќајната студија со која ќе се воведе ред во сообраќајот во мирување. Како општина работиме и на промена на Деталниот урбанистички план со кој обезбедуваме локации за изградба на катни гаражи. – напиша Стефковски.
Скопје
Општина Центар распиша оглас за доделување стипендии за талентирани ученици од областа на културата, спортот, науката, техниката и посебните вештини
Општина Центар распиша оглас за доделување на стипендии за талентирани ученици од сите осум основни училишта од областа на културата, спортот, науката, техниката и посебните вештини. Заинтересираните ученици кои сакаат да аплицираат за дадените огласи ќе може да поднесат документи само на еден оглас од областа на култура, науки, техника и посебни вештини или спорт. Доколку ученикот поднесе документи во различни категории, истите нема да се разгледуваат. Комисијата при изборот на ученици стипендисти ќе го вреднува успехот постигнат во последните три учебни години.
Стипендиите за учениците од областа на науката, техниката и посебните вештини изнесуваат од 3.000,00 до 3.500,00 денари месечно, за учениците од областа на културата 2.500,00 денари и 3.000,00 денари месечно и за талентираните спортисти стипендијата изнесува од 2.500 до 3.500 денари месечно за осум месеци во текот на учебната 2024/2025 година.
Општина Центар има за цел од секое училиште да се избере најмалку еден ученик, иден стипендист, кој во наведениот период постигнал одредени резултати и ги исполнува условите на огласот. Доколку од некое училиште нема ученик што целосно ги исполнува критериумите и условите, Комисијата ќе избере ученик што покажал највисоки резултати на одредени натпреварувања и својата одлука за тоа му ја доставува на градоначалникот за донесување решение.
Огласите се објавени на веб страната на општината каде се опишани сите услови и потребни документи за учениците кои сакаат да аплицираат и бидат идни стипендисти.
Општина Центар останува отворена за секое прашање на заинтересираните ученици.