Разбивањето на меѓународните криминални организации, особено оние што се занимаваат со трговија со дрога е еден од нашите највисоки приоритети. Оваа штетна појава го загрозува поредокот и нормалното функционирање на системот, анимира и генерира многу нелегални активности и во администрацијата и кај обичниот граѓанин, затоа мораме да дејствуваме решително.“

Ова, денес, меѓу другото, го истакна директорот на Бирото за јавна безбедност при МВР, Александар Јанев во неговото обраќање по повод работилница што во охридскиот хотел Метропол во рамки на ИЦИТАП програмата на амбасадата на САД во РСМ денес и утре ќе се одржува со претставници на Министерството за внатрешни работи, и со обвинители и истражители од Јавно обвинителство за гонење на организиран криминал и корупција (ЈОГОКК) и Јавното обвинителство Скопје, со судии од Основниот кривичен суд Скопје, како и судии и обвинители од обвинителствата и судовите кои ги покриваат граничните премини и рутите на организиран крминал – Охрид, Струга, Ресен, Битола, Велес, Гевгелија, Струмица, Штип, Делчево, Крива Паланка, Тетово, Гостивар и Куманово.

Говорејќи, во контекст на насловната тема на работилницата „Разбивање на меѓународни криминални организации и мрежи на трговија со дрога“, директорот Јанев потенцираше дека со заеднички напори, со заедничко работење како агенции за спроведување на законот, со нашите меѓународни партнери одлучно и ефикасно ќе можат да се надминат препреките поврзани со транснационалниот криминал и разбивањето на мрежите на ваков тип криминалци.

„Секој обезбеден доказ против овие криминални групи е производ на нашата макотрпна, чесна и посветена работа, потрошено многу време, многу човечки и финансиски ресурси, затоа потребата од нивно објективно валоризирање од сите чинители на системот е клучно во градењето на довербата и испорачување и осигурување на безбедноста на нашите граѓани и граѓаните на САД“, нагласи директорот Јанев особено апострофирајќи ја заедничка одговорност и обврска да се работи во откривање и спречување на националниот и транснационалниот криминал, бидејќи, според Јанев, тоа пред се го заслужуваат нашите граѓани, даночните обврзници, за кои постоиме и работиме како институции.

Покрај ова директорот Јанев се осврна и на предизвиците и заканите во борбата против мрежите за трговија со наркотици, како и за американските најдобри практики коишто може да ни помогнат во нашата решителна борба за справување со овој вид на криминал. Притоа тој истакна дека еден од суштинските фактори секако претставува и имплементирањето на неопходните реформи, дигитализацијата, како и следните чекори што треба да се преземат за поуспешни резултати од овие активности.

Претседателот на Собранието, Африм Гаши, го презентира пред новинарите Извештајот за првата година од мандатот, испраќајќи порака до граѓаните дека Собранието не е храм на власта, туку дом на секој граѓанин.

Почнувајќи од 28 мај минатата година, кога беше избран на функцијата, претседателот Гаши посочи дека во својата работа се води од шест стратешки столба:

– Ефикасност и ефективност, така што Собранието за една година одржа 50 пленарни седници и 332 седници на комисии. Усвои околу 280 законски акти, што претставува околу 50% повеќе од годишниот просекво претходниот мандат, а само четири закони беа усвоени со ознака на ЕУ – знамето.

– Транспарентноста и дигитализација, така што, со поддршка на нашите партнери, пуштени во употреба три нови дигитални платформи: „Е-регистар“, „Прашај го Собранието“ и „Веб-платформа за канцеларии за контакт со граѓаните“.

– Отчетност и надзор – одржани се седум седници со пратенички прашања од опозицијата – нова практика што ја зајакнува надзорнатаулога. Истотака, беа разгледани 12 интерпелации, наспроти 8 во текот на целиот претходен мандат. Во меѓувреме, беа одржани околу десет јавни дебати и две надзорни дебати, овозможувајќи директен фокус врз формалните механизми за институционална контрола.

– Парламентарна дипломатија – реализирани се 14 официјални посети во најважните светски и европски престолнини. Исто така, во текот на оваа година, во Собранието се одржаа шест свечени приеми на шефови на држави и 178 официјални средби со делегации и амбасадори

– Отвореност и пристап до работата на Собранието, така што во текот на една година е забележан најголемиот број посетители досега – 10.741 посетител. Отворени се 50 од вкупно планираните 75 канцеларии за контакт со граѓаните, а Собранието организираше и околу 63 јавни настани.

– Подигнување на политичката култура, која претставува суштински и човечки принцип што треба да биде водилка во работата на пратениците за достоинствено претставување на граѓаните.

На прес-конференцијата, по повод годишнината од преземањето на функцијата. Претседателот Гаши истакна дека од првиот ден работи посветено на изградба на цврста комуникациска врска меѓу институцијата и народот.

„Оваа година не беше едноставна и лесна, но преземајќи го мандатот ја прифатив одговорноста и можноста да се реализира една јасна визија – создавање народно Собрание кое е отворено, транспарентно и ефикасно, секогаш во служба на граѓаните. Мој приоритет беше, секако, остварувањето на законодавната функција, преку редовно свикување на седници, воспоставување праведни и правични практики, вклучувајќи го и спречувањето на злоупотребата на ЕУ-знамето, како и координацијата и развојот на конструктивен дијалог со пратениците и институционалните актери со цел постигнување консензус во донесувањето одлуки“, истакна претседателот Гаши, Тој се осврна и на преземените активности во насока на зајакнување на парламентарната дипломатија и зголемување на влијанието на Собранието на меѓународната сцена, со цел да се позиционира како кредибилен партнер и да обезбеди поддршка за нашите европски аспирации.

Нагласи и дека транспарентноста и дигитализацијата се темелот на неговиот лидерски пристап, така што во текот на оваа година се лансирани три дигитални платформи, кои ја олеснуваат пристапноста до информациите и ја зголемуваат инклузивноста.

Зборувајќи за комуникацијата со медиумите и јавноста, Гаши посочи на бројните интервјуа, изјави, како и редовните средби со новинарите, со цел работата на Собранието да биде што е можно повидлива и потранспарентна.

Претседателот на Собранието, во оваа прилика, освен до новинарите изрази благодарност и до сите пратеници, членовите на кабинетот, вработените во Службата на Собранието, како и до меѓународните партнери, кои, како што рече придонесоа во исполнување на визијата за пофункционално, потранспарентно и попочитувано Собрание – дома и во странство.

ЛИНК до извештајот.

Давам јавна поддршка на она што го прави градоначалничката на Скопје, Данела Арсовска. Ние може нејзе да не ја сакаме, може да бидеме незадоволни од одредени нејзини постапки, меѓутоа овие активности кои таа во моментов ги презема не можеме како одговорни лица да не ги поддржиме – истакна првиот човек на Општина Карпош, Стевчо Јакимовски.

– Практично таа документирано и покажа на целата македонска јавност, пред сите надлежни институции, она што веќе го знаат милион и осумстотини и шеесет илјади граѓани, каде во оваа држава се гради на „диво“, каде се узурпира градежно државно земјиште, каде се легализира колективно, деловно и индивидуално земјиште сé по едно евро и каде се злоупотребува законот за легализација на бесправно изградени објекти – посочи Јакимовски.

Тој изрази загриженост од односот на премиерот Мицковски, како и од министрите Тошковски и Николовски.

– Замислете, претседателот на Владата употребува еден многу интересен термин. Тој вели: градоначалничката Арсовска нека постапува по дивоградбите. Меѓутоа, градоначалничката на Скопје нема никакви ингеренции да постапува по однос на дивоградбите. Веројатно премиерот добро знае дека таму треба да постапуваат истражните органи. А всушност самиот премиер кој во оваа држава се закануваше дека ќе не влече за уши, дека дури и брат да му е доколку е некој виновен, ќе одговара кривично. Овде имаат среќа луѓето што не му се браќа и очигледно дека тој никого не влече за уши, туку целиот македонски народ го влече за нос. Зошто? Затоа што овде исклучително тој и неговите институции имаат надлежност. На локациите кои ги посочува тој е узурпирано градежно земјиште за коешто не е платено ниту денар а истото е во државна сопственост и тоа земјиште на само една локација чини 2 милиони евра. Не се платени ниту комуналиите кои чинат 1 милион евра. Не постои никаков урбанистички план ниту пак било каква градежна маркичка а министерот за „заеми“ господинот Николовски којшто е надлежен за оваа работа, вели дека во општина Карпош нема да дозволува да се одобруваат урбанистички планови од причина што тука имало хаос, а замислете во Чаир имало ред и поредок“, рече Јакимовски.

Според Јакимовски министерот за транспорт и врски е целосно отсутен и покрај тоа што овие случаи се исклучително негова надлежност.

– Да не зборувам пак за министерот за внатрешни работи, Тошковски кој му поднесе кривична пријава на градоначалникот на Крива Паланка за урбана опрема. А овде каде што има стотици дивоградби и каде што државата се оштетува за милијарди евра, воопшто не се постапува и очигледно дека за нив законите се применуваат според нивен терк. Само во Карпош, во Крива Паланка, во Струмица и во општина Центар важат поинакви правила. Она што премиерот Мицковски го најавуваше за пресметка со ДУИ, очигледно дека тој се пресметува само со некои крила од таа партија, односно со тие што не се со него во власт и коалиција. И можете да ја замислите, таа нивна строгост и „правна“ држава ја гледаме само ние од Карпош. Имено, за овие бараки кои ги направила Општината која е сместена веќе 12 години, актуелната власт ќе носи одлука за конфискација на нешто што е направено во интерес на државата. Очигледно онаму каде што некој гради во интерес на сопствениот џеб и го краде народот и својата држава, истите се амнестирани. Во случајов претседателот на Владата лаконски ќе ви каже: градоначалничката на Скопје нека си постапува, а самиот тој ќе се заканува на сите останати кои работат според законот“, додаде Јакимовски.

Градоначалникот на Карпош ја посочи непренципиелната политика на Власта, која, како што вели, не постапува според начелата на демократијата и има селективен пристап кон правдата.

– Премиерот Мицковски тренира строгост над оној кој продавал карти во Кочани и на сите нас што не сме дел од неговата коалиција, а сé останато нека биде хаотично во Македонија. Јас го кревам гласот затоа што нивната „правна држава“ сме ја осетиле на своја кожа, затоа што правото го прават не-право и бидејќи со своите постапки ги поттикнуваат криминалот и корупцијата. Мене ме зачудува односот на меѓународната јавност и нашите правосудни органи. Јас сум осуден на три ипол години затвор, замислете во завршниот збор, обвинителот вели дека постапката што ја водела Општина Карпош била според законот. Нас не судат затоа што работиме по закон, а овие кои работат незаконски, каде што не плаќаат земјиште, комуналии, не постои урбанистички план, за нив никому – ништо“, истакна Јакимовски.