Македонија
Левица: Ситно политичките размислувања го дотолчуваат високото образование

Место да вложува во образованието, Владата на ДПМНЕ и ВРЕДИ ги намали средствата за научно – истражувачка дејност. Ова се потврдува со Програмата за изменување на Програмата за научноистражувачка дејност за 2024 година, донесена од новата Влада, а стапува на сила од 24. август 2024.
Македонските истражувачи го постигнуваат максимумот во условите во кои работат, а Владата место да ги стимулира, крати онаму каде што е тенко. За дополнително профилирање на македонските научници и кадри во високото образование, а со тоа и создавање предуслови за високо рангирање на македонските универзитети на ,,светските листи”, потребни се што повеќе трудови во највлијателните и најсилните списанија. Такви резултати може да се очекуваат само ако системски се вложува во современа опрема и во кадарот и, секако, ако се вложува во меѓународната соработка – нешто за што и оваа власт, очигледно, нема слух, истакнуваат од Левица.
Падот во квалитетот на високото образование кое го испорачува државата, според нив, е последица на ситно-политичките размислувања на владејачките елити.
„Годините претходно проследени со непотизам, коруптивни скандали и клептократија, како и премалите буџети за образование и наука го испорачуваат цехот, чија колатерална штета ја плаќаат младите, но и иднината на државата.
Сведочиме за потребата на младиот човек од квалитетно образование. Ова е една од основните причини поради која студентите се почесто се запишуваат на универзитетите надвор од Македонија. Несомнено, девастираното образование е еден од клучните фактори кои го принудуваат младиот човек да ја напушти државата!
Освен образовниот процес, студентите се оставени да живеат во домови кои немаат елементарни услови, моментално под закана дека ќе им биде укинат бесплатниот превоз, а потсетуваме дека минатата година Владата се обиде да им го одземе и оној премал додаток за студентски оброк.
Образованието има потреба од итна и сеопфатна реформа, но и изработка на национална стратегија за која се залага Левица!
Македонија има капацитети кои не се искористени. Убедени сме дека како земја поседуваме одлични кадри кои можат да го предадат своето знаење, стручност и вештина, но и да придонесат за целосно унапредување на образовниот систем“, според Левица.
Наместо воведување на меритократски ситем во образованието и насочување на најдобрите кадри во добробит за студентите и државата, партизираната држава, додаваат од Левица, создадена од ДПМНЕ, СДСМ и ДУИ, преферира да користи поинакви методи, кои дефинитивно се покажаа како погубни за образованието, но и севкупно за државата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
За три дена, 109 повредени од Кочани доставиле барања и предлози на телефонската линија на Владата

109 граѓани за три дена од пуштање на телефонската линија за повредените лица и нивните семејства, која е во директна комуникација со Канцеларијата на Ппретседателот на Владата, ја искористиле можноста и доставиле свои барања и предлози, соопштија од Владата.
Од таму велат дека тоа покажува дека оваа телефонска линија дава резултат и дека Владата е отворена за секаква сугестија и идеја.
„Како Влада преку низа на мерки помагаме за помош на повредените и нивните семејства. Ова е заедничка борба и нема да отстапиме од неа, бидејќи секој граѓанин има право на соодветна здравствена заштита и медицинска нега, токму поради тоа како Влада донесовме одлука за рехабилитација во Пониква на повредените лица кои се во стабилна здравствена состојба, но им е потребна дополнителна медицинска услуга. Тим на лекари од 10 јуни до 20 август во рехабилитацискиот центар Пониква на сите лица ќе им пружат дополнителна медицинска грижа, но и психолошка поддршка“, велат од Владата.
Од таму ги повикуваат и ги охрабруваат сите повредени лица кои се засегнати да се јават на телефонскиот број 070/355-526 и да ги изразат своите барања и потреби.
Македонија
Сончево време, попладне локален дожд

Времето денеска ќе биде сончево со мала до умерена облачност. Попладне ќе има услови за локален развој на нестабилна облачност со пороен дожд и грмежи. Ќе дува слаб ветер од променлив правец. Минималната температура ќе биде во интервал од 12 до 20, а максималната ќе достигне од 26 до 35 степени.
Во Скопје, сончево со мала до умерена облачност. Ќе дува слаб ветер од северен правец. Минималната температура ќе се спушти до 17, а максималната ќе достигне до 34 степени.
Од денеска следува период на стабилно и сончево време со мала до умерена локална облачност. Дневните температури ќе бидат без значителни промени.
Македонија
Мурал од балкански рис исцртан на фасадата на Театар Комедија

Со мурал од балкански рис и мала прослава, Македонското еколошко друштво вчера го прослави Светскиот ден на рисот.
„Конечно најдовме дом за муралот, најдовме и артист кој го нацрта, и најдовме човек кој има визија и кој е отворен за соработка, а тоа е директорот на Театар Комедија – Дарко Спасов. Целта ни е со овој мурал да ја подигнеме јавната свест, не само на рурално туку и на урбано ниво. Кога работите ќе згуснат ни треба секаква поддршка, од секоја популација“, изјави раководителот на Програмата за закрепнување на балканскиот рис, Диме Меловски.
Тој се заблагодари на поддршката од Театар Комедија и директорот Дарко Спасов.
„Велат исти птици во исто јато летаат“, вели директорот Спасов, кој го изрази своето задоволство од соработката со Македонското еколошко друштво.
Освен муралот на фасадата на Театар Комедија, пред објектот поставена е и инфо табла со основните податоци за рисот, како и QR код кој води до новата интернет страница посветена на балканскиот рис: balkanlynx.com.
По поздравните обраќања, присутните членови и соработници на МЕД, се упатија кон Бистро Комедија каде што во неформална атмосфера имаа прилика да поразговараат за досегашните постигнувања, но и да разменат идеи и предлози за идни активности.