Македонија
Муцунски со почесните конзули на странските земји: државата има цел да биде силен, кредибилен и одговорен субјект во меѓународните односи
Министерот за надворешни работи и надворешна трговија Тимчо Муцунски денеска оствари работна средба со Почесните конзули на странски земји.
На средбата Муцунски се заблагодари за плодната соработка, комуникација и успешно изградените односи во изминатиот период, што несомнено имало силен придонес кон унапредувањето на односите со државите чии интереси тие ги претставуваат.
Говорејќи за новите надлежности на Министерството за надворешни работи и надворешна трговија, како и реорганизацијата на постојниот систем за привлекување и управување со странските инвестиции, Муцунски изрази надеж дека почесните конзули како наши државјани, ќе дадат силен придонес во економијата, засилувањето на процесот на привлекување на странските инвестиции, поттикнување на нашата надворешно трговската размена, засилување на заемните туристички понуди, како и друг вид на промоции со цел зголемување на сите видови соработка.
Муцунски се осврна и геополитичките случувања во регионот и во Европа, нагласувајќи дека нашата држава има цел да биде силен, кредибилен и одговорен субјект во меѓународните односи и земја која активно придонесува за стабилноста, безбедноста, сигурноста и економскиот просперитет на регионот и пошироко.
„Нашата влада целосно е свесна за сите проблеми со кои веќе се соочува и во таа насока ги препознаваме сите позначајни предизвици, барајќи брзи и ефикасни решенија и користејќи ги сите возможни алатки во прилог на одговорно надминување на пречките кои ќе ни помогнат да бидеме далеку поодговорни, потранспарентни и ангажирани”, додаде Муцунски во своето обраќање.
Во рамки на своето обраќање тој ја нагласи и посветеноста на почесните конзули во промовирањето на богатата македонска култура и наследство, што како активност секако помага за зголемен степен на меѓусебното препознавање и запознавање и истовремено придонесува за поголемо зближување и доверба меѓу нашата држава и оние државите кои тие ги претставуваат.
На крајот од обраќањето министерот Муцунски ја нагласи подготвеноста за соработка во иднина на чие продлабочување треба заемно да се работи, потенцирајќи дека Министерството за надворешни работи и надворешна трговија останува отворено подготвен да потребна помош и поддршка за сите протоколарни прашања и услуги, а кои како такви ќе го олеснуваат нивното идно работење.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Меџити-Спиропали: во фокусот актуелните случувања
Градоначалникот на Општина Чаир, Изет Меџити ја пречека Елиса Спиропали, министерка за Европа и надворешни работи на Република Албанија, која престојува во официјална посета во Скопје.
Средбата се одржа во пријателска и конструктивна атмосфера, при што беа разгледани актуелните регионални случувања, улогата на албанската дипломатија во зајакнувањето на сеалбанските врски, како и значењето на продлабочувањето на меѓуинституционалната соработка во функција на заедничките интереси на двете држави.
Спиропали и Меџити положија цвеќиња пред споменикот на националниот херој Ѓерѓ Кастриоти Скендербег, во знак на почит кон визијата на овој историски водач за европската ориентација на Албанците, соопштија од кабинетот на Меџити. По тој повод, беше повторно нагласено дека иднината на Албанците е во Европската Унија, како заедница на демократски вредности и успешен модел на институционална, културна и политичка интеграција на сите народи.
„Присуството во Чаир дополнително испрати јасна порака на политичка блискост, институционална поддршка и директно внимание на државата Албанија кон Албанците во Северна Македонија.
Оваа средба го потврди заедничкиот интерес за зајакнување на соработката и институционалната координација, со фокус на развојот, интеграцијата и зачувувањето на вредностите што нè поврзуваат како држави и како народ“.
Македонија
Ѓорѓиевски: Подаривме радост на 100 дечиња од згрижувачките семејства од Скопје и од организационите единици при ЈУ Детски дом „11 Октомври“
Вечерва, срцето на градот чукаше најсилно токму таму каде што се најчистите насмевки.
Со организација на кино-проекцијата на филмот „Биби и Боби“, им подаривме радост на 100 дечиња од згрижувачките семејства од Скопје и од организационите единици при ЈУ Детски дом „11 Октомври“, истакна скопскиот градоначалник Орце Ѓорѓиевски, откако беше организирана посебна вечер наменета за децата од згрижувачките семејства и од ЈУ Детски дом „11 Октомври“.
„Сала исполнета со смеа, возбуда и детска искреност, моменти што нè потсетуваат колку малку е потребно за голема среќа, а колку многу значи вниманието.
По завршувањето на филмот, поделивме новогодишни пакетчиња за сите дечиња.
Како градоначалник, но пред сè како човек, останувам цврсто посветен на создавање можности, поддршка и сигурност за најмладите, особено за децата кои се дел од системот на социјална заштита.
Нивната радост е нашата најголема обврска.
Секое дете заслужува внимание, љубов и убави празнични денови“.
Македонија
Намалена видливост поради појава на магла на неколку патни правци
Сообраќајот на државните патишта се одвива непречено, по наместа влажни коловози.
Намалена видливост поради појава на магла од 50 – 70 метри има на патниот правец Дебар – Струга, од 100 – 150 метри на патниот правец Куманово – Крива Паланка и од 50 – 100 метри на патниот правец Велес – Катланово.
Од 15.11.2025 година започна законската обврска за задолжително поседување на зимска опрема во возилата, без оглед на моменталната временска состојба. Оваа обврска ќе трае до 15.03.2026 година. Повеќе информации може да прочитате на овој линк.
Интензитетот на сообраќај на патните правци надвор од градските средини е умерен. На граничните премини од македонска страна, нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Фото: депозитфотос

