Македонија
Перински во посета на Босилово и Ново Село: Подобрени се условите за настава во село Секирник, Смоларските водопади и Пирго бележат зголемен број на туристи
Министерот за локална самоуправа, Златко Перински, денеска ги посети општините Босилово и Ново Село во кои се реализираат проекти за унапредување на југоисточниот дел од земјава, финансиски поддржани од Министерството преку Бирото за регионален развој.
На подрачје на Општина Босилово, во село Секирник, се подобруваат условите за следење на настава во подрачното основно училиште „Кирил и Методиј“, а во Ново Село, Смоларските водопади и излетничкото место Пирго кај Мокриево, веќе бележат зголемен број на туристи како резултат на изградените нови содржини на двете дестинации.
Министерот во посета на струмичкиот регион беше заедно со директорот на Бирото за регионален развој, Даут Мемиши, директорот на Центарот за развој на југоисточен плански регион, Ѓоко Камчев и градоначалниците на Босилово и Ново Село, Ристо Манчев и Ѓорѓе Божинов.
Од посетата на училиштето во село Секирник, беше констатирано дека во завршна фаза е реконструкцијата и адаптацијата на училишната зграда, преку проектот „Подобрување на енергетската ефикасност на јавни објекти во Југоисточниот регион“. На објектот е поставен нов кров, нова фасада, фотоволтации, реновирани се санитарните јазли.
„Сето ова ќе овозможи учениците и наставниот кадар да имаат соодветни услови за следење и реализација на наставата, а истовремено ќе се намалат трошоците за одржување на објектот. Ова училиште ќе биде одличен пример за енергетско ефикасен објект и искористување на соларната енергија како обновлив извор на енергија. Со ова истовремено придонесуваме и за подигнување на јавната еколошка свест,“ истакна министерот Перински, по посетата на училиштето во Секирник, чија инвестиција чини околу 7.200.000 денари, од кои нецели 5.600.000 денари се обезбедени преку Бирото за регионален развој, а останатите од страна на локалната самоуправа.
Оттаму, министерот се упати кон Ново Село, кај Смоларските водопади и излетничкото рекреативно место Пирго кај Мокриево, каде неодамна заврши имплементацијата на проектот „Југоисточниот регион – можност за нови туристички авантури“ преку партерно уредување и изградба на нови содржини на двете локации.
Кај Смоларските водопади неодамна се санирани постојните патеки, дрвените огради, изграден е нов пешачки мост пред водопадите.
„Со оглед на тоа дека особено во последните години туристичкиот развој има потенцијал да придонесе значително за економскиот раст и развој на земјата, реализацијата на ваков тип на проекти е од голема важност особено за промовирање на регионот. Важноста на овој проект лежи и во можноста за искористување на природните убавини, историските локалитети и културното наследство на државата со цел привлекување туристи. Ваквите проекти не само што го зголемуваат туристичкиот потенцијал на одреден регион, туку и придонесуваат за балансиран развој на целата земја, поттикнувајќи рамномерен раст и создавање на нови можности во помалку развиени области,“ истакна директорот на Бирото, Мемиши.
На излетничко-рекреативен локалитет Пирго изградена е патека до кулата, поставени се летниковци, проширен е капацитетот на постојниот амфитеатар, а просторот се збогати и со одбојкарско игралиште на песок, како и детско катче со десетина реквизити.
„Неизбежно беше да се подобри постоечката инфраструктура, но и да се збогатат содржините и на двата локалитети. Благодарение на реализираниот проект, веќе бележиме зголемен бројот на посетители, како од регионот, така и на странски туристи. Ова значително влијае и на условите за поттикнување на туризмот во Општина Ново Село и регионот,“ истакна директорот на Центарот за развој на југоисточниот плански регион, Камчев. Тој посочи дека сега и двете излетнички локации станаа полесно достапни и за лицата со посебни потреби.
Според министерот Перински, несомнено е дека сега со реализираниот проект „Југоисточниот регион – можност за нови туристички авантури“ создадени се услови за зголемен број на туристи и подобрување на туристичката понуда, што има и економски придобивки за локалното население.
„Развојот на Југоисточниот регион не застанува тука. Наша стратешка определба е рамномерен развој на сите региони. Тоа го ветивме на граѓаните, тоа и го остваруваме,“ истакна министерот Перински.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Андоновски го презентираше стратешкиот план на активности на Министерството за дигитална трансформација пред партнерските организации за следните четири години
Министерот за дигитална трансформација, Стефан Андоновски, во соработка со УСАИД организираше презентација на стратешките приоритети и идни планови на министерството за дигитална трансформација пред меѓународните партнери и меѓународната заедница.
Министерот на потенцијалните проектни донатори на самиот почеток од средбата, им се заблагодари за континуираната поддршка која ја даваат на земјата, потенцирајќи ја важноста со која придонесуваат за развојот на државата.
Андоновски со присутните ја сподели својата визија за Македонија, која ја гледа како земја во која дигиталните иновации го зајакнуваат секој граѓанин, ја поттикнуваат антикорупцијата, привлекуваат странски инвестиции и поттикнуваат одржливо и правично дигитално општество.
Тој додаде и дека негова главна мисија е во 4-годишниот мандат да ја води македонската дигитална трансформација преку иновативни политики, стратешки инвестиции како и партнерства за соработка, зајакнување на граѓаните, бизнисите и институциите со дигитални алатки и знаење, поттикнувајќи технолошки напредно, инклузивно и општество без корупција.
Македонија
Петрушевски: Љупчо Дон Николовски потрошил 976.199 денари на кафеани и ресторани како министер за земјоделие, се однесувал како Бисера Антоанета
„Денес и во наредните неколку дена ќе обелодениме како Љупчо Дон Николовски покрај тоа што исплаќал милионски субвенции на фирми блиски до СДС без основ, и раскалашено трошел народни пари на лични задоволства и нему блиски луѓе“, вели Бране Петрушевски, пратеникот од ВМРО-ДПМНЕ.
„Љупчо Дон Николовски за три ипол години колку што бил министер за земјоделство потрошил 976.199 денари во кафеани и ресторани. Раскалашеноста е заштитен знак на СДС. 976.199 денари кога ќе го поделиме на 42 месеци, доаѓаме до сума од 23.400 денари, пари кои Дон Николовски ги трошел на кафеани. Ова го презентираме вака за и самиот Дон Николовски да сфати дека месечно во кафеани трошел по една плата, со која во државава живеат цели семејства. Првата година од своето министерување Дон Николовски потрошил 294.780 денари народни пари на кафеани и ресторани, а последната предизборната 2023 година цели 377.700 денари“, посочува Петрушевски и додава:
„На масата на Дон Николовски често се наоѓале јадења како телешки мускул, чаден лосос, ракчиња и разни морски плодови, а се пиеле и скапи вина како Алшар од по 3500 денари шише. Дон Николовски се однесувал како Бисера Антоанета и без пардон трошел народни пари на кафанско седенки, додека од друга страна лицемерно зборувале дека работат за народот. Ова е таа раскалашеност и лицемерие на СДС. Утре и во наредните неколку дена целосно ќе го разоткриеме Дон Николовски и неговиот раскошен начин на живеење и патување“.
Македонија
Мажот од Кочани кој почина од западно нилска треска дал податок дека не патувал никаде
Мажот од Чешиново-Облешево кој почина од западно нилска треска во Македонија, до Инситутот за јавно здравје (ИЈЗ) дал податок дека претходно немал патувано во друга држава.
Директорката на ИЈЗ, Марија Андоновска, објави дека 78-годишниот којшто почина на 16 септември чувствувал вознемиреност, губиток на свеста, температура и малаксаност.
Првите симптоми кај пациентот се појавиле на 9 септември. Следниот ден бил пренесен во Клиничката болница во Штип, каде по дијагнозата уште истиот ден бил препратен на Инфективната клиника во Скопје.
Покрај него, регистрирани се уште три случаи на западно нилската треска во земјава, од вкупно 30 тестирања.
„Првиот случај е тестиран во април и човекот е од Струмица, импортиран од Кенија. Вториот е човек од Кочани, импортиран од Тунис, во јули тестиран во ИЈЗ. Третиот случај е тестиран во август. Човекот е од Тетово и не изјавува дека имал патување“, рече Андоновска.
Објасни дека Западно нилската треска кај 80 посто од случаите не покажува симптоми, 20 отсто се со благи симптоми на грип, а кај помалку од 1 отсто може да биде зафатен централниот нервен систем.
ИЈЗ поседува тетсови за детектирање на западно нилска треска во моментов.