Скопје
Општина Карпош: Ранец и училиштен прибор за секое прваче

Членовите на Советот на Општина Карпош, на денешната 51. седница, едногласно ја изгласаа предлог-одлуката за прифаќање донација за бесплатни ранчиња со училиштен прибор за сите новозапишани ученици во прво одделение во учебната 2024/2025 година во сите десет основни училишта што се наоѓаат на територијата на општина Карпош. Оваа година првпат во училишните клупи ќе седнат околу 720 првачиња. Притоа беше усвоен и предлог-заклучокот за усвојување на кварталниот извештај за извршување на буџетот на Општина Карпош за извештајниот период (кумулативно), за кварталот од 1.1.2024 до 30.6.2024 година, извести Општината.
На оваа седница Комисијата за прашања на верификација, мандатни прашања, избори и именувања на Советот на Општина Карпош го констатира престанокот на функцијата советник во Советот на Општина Карпош на членот Роберт Велјановски, а новоизбраниот советник од редовите на ВМРО-ДПМНЕ и коалицијата „Обнова на Македонија“ е Предраг Станковски, кој даде свечена изјава/заклетва, со која се обврза дека „чесно, транспарентно и достојно ќе работи во интерес на граѓаните на општина Карпош“.
На оваа седница беа усвоени годишните извештаи за работата на четирите јавни установи – општинските детски градинки „Мајски цвет“, „Распеана младост“, „Пролет“ и градинката „Орце Николов“ за 2023/2024 година, како и се усвоија годишните програми за работата на овие градинки за 2024/2025 година. Исто така, денеска советниците ги усвоија и годишните програми за работата на десетте основни училишта што се наоѓаат на територијата на општина Карпош, односно за „Аврам Писевски“, „Братство“, „Владо Тасевски“, „Петар Поп Арсов“ и „Димо Хаџи Димов“, како и за училиштата „Јан Амос Коменски“, „Христијан Тодоровски-Карпош“, „Војдан Чернодрински“, „Вера Циривири-Трена“ и за „Лазо Трповски“, соопшти Општината.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Арсовска: Висар Ганиу фатен со криминално легализирање дивоградби со фалсификат, документи се доставени до обвинителство

„Висар Ганиу фатен со криминално легализирање дивоградби со фалсификат, за што документи се доставени до обвинителство и има изјави кои сведочат за начинот на кој ги спроведувал овие незаконски постапки, институциите уште се мислат кога да ПОЧНАТ да постапуваат“, вели градоначалничката на Град Скопје, Данела Арсовска.
„Во меѓувреме Висар си брише имотни листови од Катастар, замислете овие луѓе кои до вчера имале имот, денес немаат, поради неговите фалсификати.
Фалсификатот го запишувал во Катастар на 20.03.2025 година сред денови на жалост за трагедијата во Кочани, користејќи период кога мислел дека нема никој да примети што прави.
1. Барање за упис во катастар
2. Решение за упис во катастар со фалсификат документи
3. Барање за бришење имотен лист од катастар
4. Решение за бришење да може да го уништи досието со фалсификатите
5. Катастар за 24 часа го брише досието со што директно овозможува да можат да се уништат докази за делото
Зошто само 2% доверба имаат граѓаните во правосудството? Во моментов во затвор лежат луѓе за влез во Собранието на 27 април и за 100 ќебапи. Таму се постапило веднаш! Во Чаир кај Висар Ганиу ќе влезат да обезбедат докази за некоја година, нека троши кеш и нека ужива до тогаш!“, додаде Арсовска.
Македонија
Пожарот во Вардариште е во голема мера изгаснат, полека се враќа протокот на струјата

Пожарот во Вардариште е во голема мера изгаснат, но БППЗ Скопје во моментот се уште вршат догаснување, извести Центарот за управување со кризи.
„ЕВН дел по дел полека го враќаат протокот на струјата во нисконапонскиот дел во нормала. За краток период се очекува целосно нормализирање на состојбите“, соопшти ЦУК.
Македонија
Герасимовски: Зелениот регистар е гаранција за зачувување на урбаното зеленило

Градоначалникот на Општина Центар, Горан Герасимовски, информира дека секој граѓанин, јавно и без никакво најавување, може да има целосен увид во Зелениот регистар преку ГИС платформата на Општината.
„Секое дрво е важно. Создаваме општина во која секој граѓанин има пристап до податоци за состојбата на зеленилото. Воведуваме поголема контрола и транспарентност во урбаното планирање“, изјави Герасимовски.
Досега се регистрирани над 10.000 дрвја, од кои 8.000 се листопадни и 2.000 зимзелени. Секое е мапирано со фотографија, состојба и латинско име. Најзастапени видови се липа, јавор, костен и јасен.
„Зелениот катастар ни овозможува реална слика за тоа што го имаме и што ни недостига. Тоа е суштинска алатка за долгорочна заштита на зеленилото“, додаде градоначалникот.
Покрај Зелениот регистар, преку ГИС платформата се достапни и други услуги – електронски упис на првачиња, увид во урбанистички планови и јавни површини. Општина Центар е првата општина која го воведе ГИС системот и од тогаш континуирано работи за надградба и усовршување на оваа дигитална технологија, се со цел поголема транспарентност пред граѓаните, побрз пристап до информации, подобро управување со истите и поголема ефикасност во оперативното работење на секторите, велат од Општината.