Свет
Путин: Западот мислеше дека ќе ја фрли Русија на колена и ќе ја распарчи, но не успеа
Рускиот претседател Владимир Путин се обрати на пленарната сесија на Источниот економски форум во Владивосток.
На панелот со рускиот претседател се и премиерот на Малезија, Анвар Ибрахим, и потпретседателот на Кина, Хан Женг.
Путин зборуваше најмногу за економски теми, но се осврна и на војната во Украина, односно т.н. специјални воени операции. Рускиот лидер, меѓу другото, рече дека што се однесува до потенцијалните преговори со Украина, Русија разбира со кого има работа. „Тие ги прекршуваат обврските. Москва бара форми и гаранции, кои ќе функционираат“, рече тој.
Путин потсети и дека се договорени речиси сите параметри за евентуален мировен договор, но по посетата на Борис Џонсон, Украина се откажа од сѐ. Киев и Западот планираа да ѝ нанесат стратешки пораз на Русија, но не успеаја, додаде тој.
„Елитите на САД и некои европски земји сакаа да ѝ нанесат стратешки пораз на Русија. Мислеа дека тоа ќе се случи бргу. Тогаш ќе ги постигнат своите стратешки цели кон кои се стремат со векови или децении“, рече Путин.
Рускиот претседател рече дека е во постојан контакт со лидерите на Кина, Бразил и Индија, кои искрено сакаат да ја разберат ситуацијата во Украина.
„Западот мислеше дека ќе ја фрли Русија на колена и ќе ја распарчи, но не успеа“, рече рускиот лидер додавајќи дека на власт во Украина се или вонземјани или странци, кои го прават тоа не размислувајќи за државата. „Русија секогаш ќе ги штити интересите на луѓето во Украина, кои се борат за рускиот јазик и традициите“, рече тој.
Тој ги нарече нападите на нуклеарната централа „Курск“ многу опасни терористички напади. „Можете да замислите што ќе се случи во овој дел од Европа ако почнеме да реагираме со иста мерка“, рече претседателот.
Како резултат на нападот врз регионот Курск, руското општество се консолидира, зголемен е бројот на луѓе што потпишуваат договори со вооружените сили, рече Путин и додаде: „Целта на непријателот беше да нѐ направи нервозни, да пренесе војници од една област во друга и да ја запреме нашата офанзива во клучните области, пред сѐ, во Донбас, чие ослободување е наша примарна цел“, рече Путин.
Руската армија ја стабилизира ситуацијата и почна да го турка непријателот од пограничните територии.
„Противникот префрли доста добро обучени единици во нашите погранични области и на тој начин ги ослабна своите сили во клучните насоки. Нашата армија ги забрза офанзивните операции“, рече Путин посочувајќи дека противникот трпи огромни загуби во жива сила и опрема.
Загубите на противникот како резултат на овие дејства може да доведат до губење на борбената способност на целокупните вооружени сили на Украина, што е она што Русија го сака, нагласи Путин.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Марта Кос: Проширувањето е значајно и за Словенија и за Европската Унија
Марта Кос, словенечката кандидатка за еврокомесар денеска изјави дека проширувањето е синоним за ЕУ.
„За мене, проширувањето е синоним за ЕУ, а ЕУ е синоним за мир. Понатаму, мирот претставува стабилност, безбедност, иднина, поврзаност и инклузија“, додаде Кос, претставувајќи ја својата кандидатура за еврокомесар пред Комисијата на националното собрание за ЕУ.
Таа укажа на важноста на портфолиото на проширување и за Словенија и за ЕУ и додаде дека е убедена дека нејзините вештини ќе бидат најочигледни во оваа област.
Кос пред Комитетот, чие мислење не е обврзувачко, изјави дека исполнува три клучни услови за еврокомесар: компетентност, посветеност на ЕУ и независност.
„Вредностите и целите на ЕУ се свети за мене“, рече таа, пренесува агенцијата „СТА“.
Таа посочи дека успешната интеграција на Словенија во ЕУ може да послужи како вреден пример за другите земји од Западен Балкан кои се стремат да се приклучат.
Според неа, напредокот на Словенија и ЕУ е меѓусебно поврзан со напредокот и развојот на нејзините соседи.
Кос повика и на поблиска соработка со Националното собрание и предложи годишно обраќање до парламентот, кое ќе следи по говорот на претседателката на Европската комисија, Урсула фон дер Лајен, за состојбата на Унијата во Европскиот парламент, пренесува Танјуг.
Свет
Нетанјаху вети дека ќе ги врати жителите на северот во нивните домови
Израелскиот премиер Бенјамин Нетанјаху вети дека ќе ги врати во своите домови десетиците илјади жители евакуирани од северната погранична област со Либан.
„Реков претходно, ќе ги вратиме жителите на северот во нивните домови безбедно и токму тоа ќе го направиме“, објави Нетанјаху во кратката видео порака.
Тој не ги спомна експлозиите насочени кон Хезболах во Либан во изминатите два дена, пренесоа агенциите.
Во меѓувреме, бројот на жртвите од денешните најнови експлозии на комуникациски уреди низ Либан се зголеми од девет на 14, а повеќе од 450 луѓе се ранети, соопшти либанското Министерство за здравство.
Началникот на израелската армија, генерал-полковник Херзи Халеви изјави подоцна оваа вечер дека Израел подготвил дополнителни планови против Хезболах и е подготвен да нападне.
Израел има „многу повеќе опции“ кои се уште не се искористени во борбата против Хезболах, објави „Тајмс оф Израел“.
„Имаме многу можности кои се уште не се активирани, видовме некои од овие работи и ми се чини дека сме добро подготвени и се подготвуваме да ги реализираме овие планови“, рече Халеви и додаде дека во секоја фаза цената за Хезболах треба да биде висока, пренесе медиумот.
Свет
Уште една жртва од поплавите во Чешка, Полска и Унгарија ги зајакнуваат насипите околу реките
Чешката Република соопшти дека бројот на жртвите од катастрофалните поплави во земјата, кои ја погодија централна Европа, се искачи на четири, додека во Полска и Унгарија волонтери и персонал за итни случаи брзаат да ги зајакнат заштитните насипи околу реките, бидејќи нивото на водата почна да расте, пренесува Ројтерс.
Најлошите поплави што ја погодија централна Европа во најмалку две децении оставија зад себе трага на уништување што се протега од Романија до Полска, оставајќи затрупани градови во кал и урнатини, уништени мостови и потонати автомобили.
Домаќинствата и владите на погодените земји се соочуваат со штети кои можат да се измерат во милијарди долари, пренесува медиумот.
Со пријавена нова жртва во Чешка, бројот на загинати во Европа од поплавите се искачи на 23.
Според официјалните податоци, по седум лица загинале во Романија и Полска, а уште пет во Австрија.
Новооткриената жртва во Чешка, 70-годишна старица од село, била пронајдена на 20 метри од нејзината куќа. Таа била евакуирана во саботата, но следниот ден го напуштила центарот за евакуација за да се врати дома, објави чешката телевизија.
Во таа земја водата главно се повлекува, но нивото на водата се уште е на својот врв во некои делови на јужна Бохемија.
Во Вроцлав, Полска, голем број луѓе редат вреќи со песок од рака на рака за да се зацврстат бреговите на реката Одра. На југ од таму, тоа го прават полските војници. Највисок водостој во Вроцлав се очекува утре.
Во Унгарија, властите отворија брана во северозападниот дел на земјата за да ја пренасочат водата од реката Лејте во еден резервоар и да ги заштитат градовите.
Во Будимпешта, Дунав се очекува да се искачи на највисокото ниво – над 8,5 метри, во петок или сабота.
Во исто време, силно невреме и се заканува на Италија.
Предупредувања за силен дожд, ветрови и поплави се издадени во поголемиот дел од Италија, јавува Би-Би-Си.
Веќе се објавени извештаи за поплави во Пескара во централна Италија, додека италијанската метеоролошка служба предупредува дека невремето ќе го погоди северниот брег на регионот Емилија-Ромања.
На поплави во наредните денови предупредуваат и властите во Хрватска, Унгарија, Словачка и Полска, јавува Танјуг.