Свет
Иран ја предупреди Русија да не застане на страната на Азербејџан во граничниот спор
Новата реформска влада на Иран ја предупреди Русија да не оди на страната на Азербејџан во граничниот спор. Иранскиот министер за надворешни работи, Саид Абас Арагчи, го презеде невообичаениот чекор да ја прекори Русија. Забелешките на Арагчи беа јасна референца за одлуката на Москва да го поддржи повикот на Азербејџан за отворање на коридорот исток – запад во Ерменија до ексклавата Нахчиван на западот од земјата.
„Регионалниот мир, безбедноста и стабилноста не се само приоритет туку и столб на нашата национална безбедност. Секоја закана од север, југ, исток или од запад за територијалниот интегритет на нашите соседи или прекројување на границите се целосно неприфатливи и црвено линија за Иран“, рече Арагчи.
Овој конфликт би можел да има пошироки геополитички импликации, односно да послужи како доказ дека новоизбраната иранска влада е подготвена да заземе построг став кон Москва како дел од нејзините напори за ребалансирање на нејзината надворешна политика.
Русија и Иран треба да потпишат нов договор за стратешка соработка, но содржината е сѐ уште отворена за разговор, а во иранската влада има тензии за дипломатската цена за продлабочување на воениот сојуз со Русија, пишува „Гардијан“.
Иран исто така го повика рускиот амбасадор Алексеј Дедов претходно оваа недела за да го изрази своето незадоволство од позицијата на Москва велејќи дека не сака конфликт на нејзините граници со поттик од Москва. Иран се граничи со Ерменија и Азербејџан на север.
Мохсен Резаи, поранешен врховен командант на Корпусот на Исламската револуционерна гарда и секретар на Советот за целисходност, рече:
„Однесувањето на рускиот државник не беше прифатливо и јасно е во спротивност со нивната декларација за пријателство со Иран, овие нејасности треба да се решат“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Марта Кос: Проширувањето е значајно и за Словенија и за Европската Унија
Марта Кос, словенечката кандидатка за еврокомесар денеска изјави дека проширувањето е синоним за ЕУ.
„За мене, проширувањето е синоним за ЕУ, а ЕУ е синоним за мир. Понатаму, мирот претставува стабилност, безбедност, иднина, поврзаност и инклузија“, додаде Кос, претставувајќи ја својата кандидатура за еврокомесар пред Комисијата на националното собрание за ЕУ.
Таа укажа на важноста на портфолиото на проширување и за Словенија и за ЕУ и додаде дека е убедена дека нејзините вештини ќе бидат најочигледни во оваа област.
Кос пред Комитетот, чие мислење не е обврзувачко, изјави дека исполнува три клучни услови за еврокомесар: компетентност, посветеност на ЕУ и независност.
„Вредностите и целите на ЕУ се свети за мене“, рече таа, пренесува агенцијата „СТА“.
Таа посочи дека успешната интеграција на Словенија во ЕУ може да послужи како вреден пример за другите земји од Западен Балкан кои се стремат да се приклучат.
Според неа, напредокот на Словенија и ЕУ е меѓусебно поврзан со напредокот и развојот на нејзините соседи.
Кос повика и на поблиска соработка со Националното собрание и предложи годишно обраќање до парламентот, кое ќе следи по говорот на претседателката на Европската комисија, Урсула фон дер Лајен, за состојбата на Унијата во Европскиот парламент, пренесува Танјуг.
Свет
Нетанјаху вети дека ќе ги врати жителите на северот во нивните домови
Израелскиот премиер Бенјамин Нетанјаху вети дека ќе ги врати во своите домови десетиците илјади жители евакуирани од северната погранична област со Либан.
„Реков претходно, ќе ги вратиме жителите на северот во нивните домови безбедно и токму тоа ќе го направиме“, објави Нетанјаху во кратката видео порака.
Тој не ги спомна експлозиите насочени кон Хезболах во Либан во изминатите два дена, пренесоа агенциите.
Во меѓувреме, бројот на жртвите од денешните најнови експлозии на комуникациски уреди низ Либан се зголеми од девет на 14, а повеќе од 450 луѓе се ранети, соопшти либанското Министерство за здравство.
Началникот на израелската армија, генерал-полковник Херзи Халеви изјави подоцна оваа вечер дека Израел подготвил дополнителни планови против Хезболах и е подготвен да нападне.
Израел има „многу повеќе опции“ кои се уште не се искористени во борбата против Хезболах, објави „Тајмс оф Израел“.
„Имаме многу можности кои се уште не се активирани, видовме некои од овие работи и ми се чини дека сме добро подготвени и се подготвуваме да ги реализираме овие планови“, рече Халеви и додаде дека во секоја фаза цената за Хезболах треба да биде висока, пренесе медиумот.
Свет
Уште една жртва од поплавите во Чешка, Полска и Унгарија ги зајакнуваат насипите околу реките
Чешката Република соопшти дека бројот на жртвите од катастрофалните поплави во земјата, кои ја погодија централна Европа, се искачи на четири, додека во Полска и Унгарија волонтери и персонал за итни случаи брзаат да ги зајакнат заштитните насипи околу реките, бидејќи нивото на водата почна да расте, пренесува Ројтерс.
Најлошите поплави што ја погодија централна Европа во најмалку две децении оставија зад себе трага на уништување што се протега од Романија до Полска, оставајќи затрупани градови во кал и урнатини, уништени мостови и потонати автомобили.
Домаќинствата и владите на погодените земји се соочуваат со штети кои можат да се измерат во милијарди долари, пренесува медиумот.
Со пријавена нова жртва во Чешка, бројот на загинати во Европа од поплавите се искачи на 23.
Според официјалните податоци, по седум лица загинале во Романија и Полска, а уште пет во Австрија.
Новооткриената жртва во Чешка, 70-годишна старица од село, била пронајдена на 20 метри од нејзината куќа. Таа била евакуирана во саботата, но следниот ден го напуштила центарот за евакуација за да се врати дома, објави чешката телевизија.
Во таа земја водата главно се повлекува, но нивото на водата се уште е на својот врв во некои делови на јужна Бохемија.
Во Вроцлав, Полска, голем број луѓе редат вреќи со песок од рака на рака за да се зацврстат бреговите на реката Одра. На југ од таму, тоа го прават полските војници. Највисок водостој во Вроцлав се очекува утре.
Во Унгарија, властите отворија брана во северозападниот дел на земјата за да ја пренасочат водата од реката Лејте во еден резервоар и да ги заштитат градовите.
Во Будимпешта, Дунав се очекува да се искачи на највисокото ниво – над 8,5 метри, во петок или сабота.
Во исто време, силно невреме и се заканува на Италија.
Предупредувања за силен дожд, ветрови и поплави се издадени во поголемиот дел од Италија, јавува Би-Би-Си.
Веќе се објавени извештаи за поплави во Пескара во централна Италија, додека италијанската метеоролошка служба предупредува дека невремето ќе го погоди северниот брег на регионот Емилија-Ромања.
На поплави во наредните денови предупредуваат и властите во Хрватска, Унгарија, Словачка и Полска, јавува Танјуг.