Свет
Бајден планира да прими 125.000 бегалци во САД следната година
Администрацијата на американскиот претседател Џо Бајден има намера да ја одржи својата цел за прифаќање 125.000 бегалци следната година, според интерниот извештај до американските пратеници, до кој увид имал Ројтерс, а во кој се сугерира дека бројот на бегалци ќе продолжи да се зголемува доколку Камала Харис ја преземе Белата куќа.
Администрацијата на Бајден е на пат да донесе 100.000 луѓе преку американската програма за бегалци во фискалната 2024 година, која завршува на 30 септември, според досега необјавениот документ. Доколку програмата биде успешна, таа ќе доведе до највисоко ниво на примени бегалци во изминатите три децении.
Имиграцијата е главен проблем за гласачите пред изборите на 5 ноември, на кои Харис, демократот и кандидат на Бајден, ќе се соочи со републиканецот Доналд Трамп.
Трамп значително го намали приемот на бегалци додека беше претседател помеѓу 2017 и 2021 година и вети дека ќе ја заузда имиграцијата доколку биде реизбран.
Стејт департментот, Белата куќа, предизборните тимови на Харис и Трамп не одговорија веднаш на барањето за коментар.
Американската програма за бегалци е достапна за луѓе кои се изложени на ризик од прогон врз основа на нивната раса, религија, националност, членство во одредена социјална група или поради нивните политички ставови. Поединците мора да се наоѓаат надвор од Соединетите Држави за да аплицираат за програмата.
Бајден првично сакаше да постигне 125.000 приеми на бегалци во фискалната 2022 година, амбициозна цел што остана неостварлива.
Над 16.000 бегалци од Латинска Америка и Карибите влегоа во САД од 1 октомври 2023 година до 31 јули 2024 година.
Администрацијата на Бајден, исто така, го зголеми пристигнувањето на бегалци од Латинска Америка, како дел од стратегијата да обезбеди повеќе легални патишта во земјата во услови на рекордно ниво на раселување.
Повеќе од 16.000 бегалци од Латинска Америка и Карибите влегле во САД од 1 октомври 2023 година до 31 јули 2024 година, според податоците на Стејт департментот.
Стејт департментот и другите агенции во извештајот до пратениците рекоа дека планот за бегалци „се надоврзува на долгата, издржлива историја на американските заедници кои ги пречекуваат оние кои бегаат од прогонство“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Марта Кос: Проширувањето е значајно и за Словенија и за Европската Унија
Марта Кос, словенечката кандидатка за еврокомесар денеска изјави дека проширувањето е синоним за ЕУ.
„За мене, проширувањето е синоним за ЕУ, а ЕУ е синоним за мир. Понатаму, мирот претставува стабилност, безбедност, иднина, поврзаност и инклузија“, додаде Кос, претставувајќи ја својата кандидатура за еврокомесар пред Комисијата на националното собрание за ЕУ.
Таа укажа на важноста на портфолиото на проширување и за Словенија и за ЕУ и додаде дека е убедена дека нејзините вештини ќе бидат најочигледни во оваа област.
Кос пред Комитетот, чие мислење не е обврзувачко, изјави дека исполнува три клучни услови за еврокомесар: компетентност, посветеност на ЕУ и независност.
„Вредностите и целите на ЕУ се свети за мене“, рече таа, пренесува агенцијата „СТА“.
Таа посочи дека успешната интеграција на Словенија во ЕУ може да послужи како вреден пример за другите земји од Западен Балкан кои се стремат да се приклучат.
Според неа, напредокот на Словенија и ЕУ е меѓусебно поврзан со напредокот и развојот на нејзините соседи.
Кос повика и на поблиска соработка со Националното собрание и предложи годишно обраќање до парламентот, кое ќе следи по говорот на претседателката на Европската комисија, Урсула фон дер Лајен, за состојбата на Унијата во Европскиот парламент, пренесува Танјуг.
Свет
Нетанјаху вети дека ќе ги врати жителите на северот во нивните домови
Израелскиот премиер Бенјамин Нетанјаху вети дека ќе ги врати во своите домови десетиците илјади жители евакуирани од северната погранична област со Либан.
„Реков претходно, ќе ги вратиме жителите на северот во нивните домови безбедно и токму тоа ќе го направиме“, објави Нетанјаху во кратката видео порака.
Тој не ги спомна експлозиите насочени кон Хезболах во Либан во изминатите два дена, пренесоа агенциите.
Во меѓувреме, бројот на жртвите од денешните најнови експлозии на комуникациски уреди низ Либан се зголеми од девет на 14, а повеќе од 450 луѓе се ранети, соопшти либанското Министерство за здравство.
Началникот на израелската армија, генерал-полковник Херзи Халеви изјави подоцна оваа вечер дека Израел подготвил дополнителни планови против Хезболах и е подготвен да нападне.
Израел има „многу повеќе опции“ кои се уште не се искористени во борбата против Хезболах, објави „Тајмс оф Израел“.
„Имаме многу можности кои се уште не се активирани, видовме некои од овие работи и ми се чини дека сме добро подготвени и се подготвуваме да ги реализираме овие планови“, рече Халеви и додаде дека во секоја фаза цената за Хезболах треба да биде висока, пренесе медиумот.
Свет
Уште една жртва од поплавите во Чешка, Полска и Унгарија ги зајакнуваат насипите околу реките
Чешката Република соопшти дека бројот на жртвите од катастрофалните поплави во земјата, кои ја погодија централна Европа, се искачи на четири, додека во Полска и Унгарија волонтери и персонал за итни случаи брзаат да ги зајакнат заштитните насипи околу реките, бидејќи нивото на водата почна да расте, пренесува Ројтерс.
Најлошите поплави што ја погодија централна Европа во најмалку две децении оставија зад себе трага на уништување што се протега од Романија до Полска, оставајќи затрупани градови во кал и урнатини, уништени мостови и потонати автомобили.
Домаќинствата и владите на погодените земји се соочуваат со штети кои можат да се измерат во милијарди долари, пренесува медиумот.
Со пријавена нова жртва во Чешка, бројот на загинати во Европа од поплавите се искачи на 23.
Според официјалните податоци, по седум лица загинале во Романија и Полска, а уште пет во Австрија.
Новооткриената жртва во Чешка, 70-годишна старица од село, била пронајдена на 20 метри од нејзината куќа. Таа била евакуирана во саботата, но следниот ден го напуштила центарот за евакуација за да се врати дома, објави чешката телевизија.
Во таа земја водата главно се повлекува, но нивото на водата се уште е на својот врв во некои делови на јужна Бохемија.
Во Вроцлав, Полска, голем број луѓе редат вреќи со песок од рака на рака за да се зацврстат бреговите на реката Одра. На југ од таму, тоа го прават полските војници. Највисок водостој во Вроцлав се очекува утре.
Во Унгарија, властите отворија брана во северозападниот дел на земјата за да ја пренасочат водата од реката Лејте во еден резервоар и да ги заштитат градовите.
Во Будимпешта, Дунав се очекува да се искачи на највисокото ниво – над 8,5 метри, во петок или сабота.
Во исто време, силно невреме и се заканува на Италија.
Предупредувања за силен дожд, ветрови и поплави се издадени во поголемиот дел од Италија, јавува Би-Би-Си.
Веќе се објавени извештаи за поплави во Пескара во централна Италија, додека италијанската метеоролошка служба предупредува дека невремето ќе го погоди северниот брег на регионот Емилија-Ромања.
На поплави во наредните денови предупредуваат и властите во Хрватска, Унгарија, Словачка и Полска, јавува Танјуг.