Свет
Истурил врело кафе врз бебе и побегнал: во тек е меѓународна потера во Бризбејн
Австралиската полиција работи со меѓународни колеги за да лоцира маж за кој веруваат дека избегал од земјата откако истурил врело кафе врз бебе во Бризбејн.
Бизарниот напад, ја шокираше нацијата, а остави деветмесечно момче со сериозни изгореници на лицето и екстремитетите. Полицијата распиша потерница по 33-годишен маж кој се бара за сторено дело со намера за нанесување тешка телесна повреда, за кое е предвидена доживотна казна затвор.
Меѓутоа, денес тие рекоа дека главниот осомничен заминал од аеродромот во Сиднеј шест дена по инцидентот и само 12 часа пред да успеат да го потврдат неговиот идентитет.
Деветмесечното момче на 31 август било на пикник со семејството во приградски парк, кога очевидци рекоа дека се приближил „чуден човек“, кој му истурил шише со врело кафе на детето пред да побегне.
На бебето веднаш му била укажана прва помош. Медицинска сестра која не била на должност го однела во нејзиниот близок стан за да му ги санира изгорениците со ладна вода. Сепак, детето се здобило со драматични повреди за кои веќе биле потребни повеќе операции, а неговите родители велат дека му претстои повеќегодишен пат до закрепнување.
Мотивот за инцидентот сè уште не е познат, изјави за медиумите детективот Пол Далтон, опишувајќи го случајот како еден од „најкомплексните и најфрустрирачките“ со кои се занимавал.
Тој потврди дека полицијата ја знае земјата во која побегнал осомничениот, како и неговото име, но рече дека откривањето на информациите во овој момент може да ја загрози нивната истрага.
Човекот е „работник“ кој патувал во Австралија повеќе пати од 2019 година и имал адреси во Нов Јужен Велс и Викторија, соопшти полицијата. Детективот рече дека осомничениот знаел за „полициската методологија“ и „спровел контранадзорни активности“ за да ги избегне.
Родителите на бебето денеска за медиумите изјавија дека биле „скршени“ кога дознале дека осомничениот ја напуштил државата, но и дека им олеснало што заминал.
„Изгледа дека беа многу, многу блиску да го добијат, а тоа очигледно значи дека ќе треба да чекаме којзнае колку долго за да ја добиеме правдата за нашиот син“, изјави неговата мајка за Австралиската јавна телевизија.
Момчето е „во добро расположение“, додаде неговиот татко, но можеби ќе треба дополнителни операции за пресадување на кожата. Досега се собрани повеќе од 150.000 австралиски долари (100.000 американски долари) на страницата за групно финансирање „GoFundMe“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Марта Кос: Проширувањето е значајно и за Словенија и за Европската Унија
Марта Кос, словенечката кандидатка за еврокомесар денеска изјави дека проширувањето е синоним за ЕУ.
„За мене, проширувањето е синоним за ЕУ, а ЕУ е синоним за мир. Понатаму, мирот претставува стабилност, безбедност, иднина, поврзаност и инклузија“, додаде Кос, претставувајќи ја својата кандидатура за еврокомесар пред Комисијата на националното собрание за ЕУ.
Таа укажа на важноста на портфолиото на проширување и за Словенија и за ЕУ и додаде дека е убедена дека нејзините вештини ќе бидат најочигледни во оваа област.
Кос пред Комитетот, чие мислење не е обврзувачко, изјави дека исполнува три клучни услови за еврокомесар: компетентност, посветеност на ЕУ и независност.
„Вредностите и целите на ЕУ се свети за мене“, рече таа, пренесува агенцијата „СТА“.
Таа посочи дека успешната интеграција на Словенија во ЕУ може да послужи како вреден пример за другите земји од Западен Балкан кои се стремат да се приклучат.
Според неа, напредокот на Словенија и ЕУ е меѓусебно поврзан со напредокот и развојот на нејзините соседи.
Кос повика и на поблиска соработка со Националното собрание и предложи годишно обраќање до парламентот, кое ќе следи по говорот на претседателката на Европската комисија, Урсула фон дер Лајен, за состојбата на Унијата во Европскиот парламент, пренесува Танјуг.
Свет
Нетанјаху вети дека ќе ги врати жителите на северот во нивните домови
Израелскиот премиер Бенјамин Нетанјаху вети дека ќе ги врати во своите домови десетиците илјади жители евакуирани од северната погранична област со Либан.
„Реков претходно, ќе ги вратиме жителите на северот во нивните домови безбедно и токму тоа ќе го направиме“, објави Нетанјаху во кратката видео порака.
Тој не ги спомна експлозиите насочени кон Хезболах во Либан во изминатите два дена, пренесоа агенциите.
Во меѓувреме, бројот на жртвите од денешните најнови експлозии на комуникациски уреди низ Либан се зголеми од девет на 14, а повеќе од 450 луѓе се ранети, соопшти либанското Министерство за здравство.
Началникот на израелската армија, генерал-полковник Херзи Халеви изјави подоцна оваа вечер дека Израел подготвил дополнителни планови против Хезболах и е подготвен да нападне.
Израел има „многу повеќе опции“ кои се уште не се искористени во борбата против Хезболах, објави „Тајмс оф Израел“.
„Имаме многу можности кои се уште не се активирани, видовме некои од овие работи и ми се чини дека сме добро подготвени и се подготвуваме да ги реализираме овие планови“, рече Халеви и додаде дека во секоја фаза цената за Хезболах треба да биде висока, пренесе медиумот.
Свет
Уште една жртва од поплавите во Чешка, Полска и Унгарија ги зајакнуваат насипите околу реките
Чешката Република соопшти дека бројот на жртвите од катастрофалните поплави во земјата, кои ја погодија централна Европа, се искачи на четири, додека во Полска и Унгарија волонтери и персонал за итни случаи брзаат да ги зајакнат заштитните насипи околу реките, бидејќи нивото на водата почна да расте, пренесува Ројтерс.
Најлошите поплави што ја погодија централна Европа во најмалку две децении оставија зад себе трага на уништување што се протега од Романија до Полска, оставајќи затрупани градови во кал и урнатини, уништени мостови и потонати автомобили.
Домаќинствата и владите на погодените земји се соочуваат со штети кои можат да се измерат во милијарди долари, пренесува медиумот.
Со пријавена нова жртва во Чешка, бројот на загинати во Европа од поплавите се искачи на 23.
Според официјалните податоци, по седум лица загинале во Романија и Полска, а уште пет во Австрија.
Новооткриената жртва во Чешка, 70-годишна старица од село, била пронајдена на 20 метри од нејзината куќа. Таа била евакуирана во саботата, но следниот ден го напуштила центарот за евакуација за да се врати дома, објави чешката телевизија.
Во таа земја водата главно се повлекува, но нивото на водата се уште е на својот врв во некои делови на јужна Бохемија.
Во Вроцлав, Полска, голем број луѓе редат вреќи со песок од рака на рака за да се зацврстат бреговите на реката Одра. На југ од таму, тоа го прават полските војници. Највисок водостој во Вроцлав се очекува утре.
Во Унгарија, властите отворија брана во северозападниот дел на земјата за да ја пренасочат водата од реката Лејте во еден резервоар и да ги заштитат градовите.
Во Будимпешта, Дунав се очекува да се искачи на највисокото ниво – над 8,5 метри, во петок или сабота.
Во исто време, силно невреме и се заканува на Италија.
Предупредувања за силен дожд, ветрови и поплави се издадени во поголемиот дел од Италија, јавува Би-Би-Си.
Веќе се објавени извештаи за поплави во Пескара во централна Италија, додека италијанската метеоролошка служба предупредува дека невремето ќе го погоди северниот брег на регионот Емилија-Ромања.
На поплави во наредните денови предупредуваат и властите во Хрватска, Унгарија, Словачка и Полска, јавува Танјуг.