Македонија
Перински во Белград: Позитивните практики од соседна Србија, се применливи и кај нас со цел подобрување на јавните услуги

Министерот за локална самоуправа, Златко Перински, на покана и во организација на Програмата за развој на Обединетите нации (УНДП), учествува на дводневниот тематски дијалог „Од замисла до реалност: Спроведување инвестициски проекти“ кој од денеска се одржува во Белград.
На дијалогот, се презентираат практики и методологии од различни земји со цел нивна примена и унапредување на идни инфраструктурни проекти, се разгледуваат заедничките предизвици при планирањето и спроведувањето проекти. Целта на дијалогот е и поттикнување на соработката меѓу земјите и меѓународните финансиски институции со цел искористување на ресурсите и разгледување на различните видови механизми за финансирање инфраструктурни проекти.
Во рамки на посетата на Белград, Перински одржа и билатерални средби со министерката за јавна администрација и локална самоуправа, Јелена Жариќ Ковачевиќ и со градоначалникот на Град Белград, Александар Шапиќ.
И двете средби, Перински ги искористи за размена на искуства за начинот на организација на локалната самоуправа во Република Србија, за законската регулатива која ја применува северниот сосед за функционирање на единиците на локалната самоуправа, како и за начинот на нивно финансирање, процесот на децентрализација и фискалната децентрализација.
„Ме радуваат добрососедските односи и билатералната соработка која е на високо ниво, но постои расположение и услови тие да се продлабочат, пред сѐ во однос на системските реформи за функционирање на системот на локалната самоуправа и развој на општините. Споделивме и разменивме искуства за начинот на организационата поставеност и функционалност на локалната самоуправа, а разговаравме и за суштинските законски решенија кои ги применуваме во таа област“, изјави Жариќ Ковачевиќ, која истакна дека регионалната соработка е еден од приоритетите на Република Србија во насока на зачувување на стабилноста во регионот и целосна ориентација кон поинтензивна партнерска соработка во сите области. Таа изрази задоволство и од досегашната соработка меѓу двете земји, од користењето на ИПА Програмата за прекугранична соработка.
„Со министерката Жариќ Ковачевиќ разговаравме за предизвиците со кои се соочуваат општините во Србија и системските решенија кои ги користат за нивно надминување. Разменивме мислења и за легислативата која ја применуваат, како и за продлабочување на соработката. Чест ми беше да ѝ презентирам како ние, како Влада, ќе помогнеме на општините за нивен развој со директната финансиска помош во висина од 250 милиони евра за реализација на инфраструктурни проекти“, истакна Перински.
На средбата со првиот човек на српската метропола, Александар Шапиќ, се разговараше за системската организираност на Град Белград и седумнаесетте градски општини, поделбата на ингеренциите меѓу нив, начинот на нивното финансирање, како и за функционалноста на јавните претпријатија.
„На министерот му ги презентирав и нашите проекти со кои успеваме да го подигнеме квалитетот на живот на нашите граѓани, а го информирав и за начинот на управување со најбројната белградска општина, Нови Београд и со Град Белград, со оглед на моето повеќегодишно искуство како дел од раководењето со двете локални единици“, изјави градоначалникот Шапиќ, по средбата со Перински во Стари двор. И двајцата беа согласни дека Скопје и Белград се братски градови, уште пред нивното формално збратимување во 2012 година и токму тој факт треба да се искористи за продлабочување на соработката, ако се има во предвид и територијалната близина и пријателски настроениот народ.
„Сакав изворно да се информирам како Белград функционира без поголеми проблеми и успешно се справува со секојдневните ситуации од областа на јавниот превоз, јавната хигиена, воопшто, со сите услуги кои има обврска да ги испорачува на граѓаните. Разговаравме и за начинот на организација на комуналната полиција во Белград, ингеренциите кои таа ги има и бенефитите од нејзиното постоење“, изјави Перински, по средбата со градоначалникот Шапиќ.
Според Перински, и двете одржани средби се од големо значење, бидејќи се запознал со позитивните практики на функционирање на локалната самоуправа во Србија и на српската престолнина и законите со кои тие се уредени, а истите ќе можат да се презентираат на планираните јавни дебати со сите засегнати страни, за законските измени од областа на локалната самоуправа во Македонија, кои ќе се адаптираат на потребите на граѓаните и за поефикасно функционирање на сите општини во земјава.
Во таа насока, Перински позитивно ги оцени и поздрави доставените измени на Законот за локална самоуправа со цел да се избегнат предвремените локални избори во општините кои останаа со в.д градоначалници.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Земјотресот на Света Гора почувствуван и во Македонија

Силниот земјотрес на Света Гора почувствуван и во југоисточниот дел на Македонија.
„Телеметриската сеизмолошка мрежа на Република Северна Македонија, на сеизмолошките станици инсталирани ширум нашата територија, одржувани од Сеизмолошката опсерваторија при Природно-математичкиот факултет во Скопје, денес 7 јуни 2025 година регистрираа серија на земјотреси чии епицентри потекнуваат од соседна Република Грција.
Според досегашните податоци со кои располага опсерваторијата, почувствуван е земјотресот во 14 часот и 46 минути чиј епицентар се наоѓа 290 km југоисточно од Скопје, со Рихтерова локална магнитуда M L 5.2.
Земјотресот беше почувствуван во југоисточниот дел на Републиката со интензитет од III степени според Европската макросеизмичка скала“, известија од Сеизмолошката опсерваторија.
Македонија
АХВ го одбележа 7 Јуни – Светски ден на безбедна храна

Aгенцијата за храна и ветеринарство и оваа година се приклучи и ја поддржува глобалната иницијатива и го одбележа 7 јуни, Светски ден на безбедна храна. Со едукативен и спортско рекреативен настан наменет за граѓаните и децата, денес, во паркот Авионче во скопската населба Ново Лисиче на присутните им беа поделени едукативни флаери за безбедноста на храната, а за најмалите се одржаа спортско-рекреативни игри преку кои се афирмираше безбедноста на храната и нејзиното значење.
На 10 јуни, во вторник, со поддршка и во соработка со Европската агенција за безбедност на храната – ЕФСА, Агенцијата за храна и ветеринарство ќе одржи настан за подигнување на јавната свест за безбедноста на храната на која ќе учествуваат реномирани претстставници од EFSA, од научните и други институции поврзани со прашпања кои се однесуваат на производството на храна и нејзината безбедност.
Годинашното мото на Светскиот ден на безбедна храна – 7 јуни е „Науката во акција“ и тоа денес не потсетува на важноста на науката како основна алка од синџирот на безбедна храна. Едноставно, тоа е дел без кој не се може и кој ги создава основите за креирање на политиките за безбедност на храната од страна на институциите, како што е и Агенцијата за храна и ветеринарство.
Преку едукативниот спортско рекреативен настан кој се одржа денес и настанот кој во соработка со EFSA ќе се одржи во вторник, АХВ и годинава активно работи на подигнување на свеста на граѓаните за важноста на безбедноста на храната и за превенирање и управување со ризиците со цел унапредување на нивното здравје.
Македонија
(Видео) Василевски: Нула нови градинки за 4 години во Аеродром, околу 700 деца чекаат за запишување секоја година

Изминаа речиси 4 години откако ВМРО-ДПМНЕ ја освои локалната власт. И По 4 години, ВМРО-ДПМНЕ во Општина Аеродром не изгради ниту една од ветените 4 нови градинки, рече денеска на прес-конференција Бојан Василевски, ОО СДСМ Аеродром.
„Овиe градинки беа првиот од 7-те топ приоритети на Муцунски и Митески во програмата со кои ја освоија довербата на нашите сограѓани од Аеродром. Митески и Муцунски ветија целосно нови градинки во Острово, Мичурин, Лисиче и Долно Лисиче, но еве, четири години подоцна, ниту една од овие ветени градинки до денес не е ни започната со градба“, вели Василевски.
Според него, околу 700 дечиња годишно се на листа за чекање за упис во градинка, заради недостатокот на места во градинките во Аеродром.
„ВМРО-ДПМНЕ во Аеродром покажа целосна незаинтересираност за решавање на овој проблем. Единствениот објект на градинка кој се гради во моментов во Стар Аеродром е со 70.000.000 денари, средства обезбедени од Владата на СДСМ во 2024 година. Само за споредба, кога со Општина Аеродром управуваше СДСМ се изградија 2 нови градинки со вкупен капацитет од 400 деца. Целосно нов објект Црвенкапа во Стар Аеродром со капацитет од 200 деца и целосно нов објект Буба Мара во Ново Лисиче со капацитет од исто така 200 деца“, кажа Василевски.