Регион
(Видео) Невреме ја зафати и Грција: на делови од земјата им се заканува бура и грмотевици

Државниот и Генералниот секретаријат за цивилна заштита на Грција се во состојба на готовност поради невремето што веќе почна да ја зафаќа земјата, а кое, според метеоролозите, ќе трае до среда вечер. Имено, вчера беа испратени првите пораки од 112 на мобилните телефони на граѓанита од Западна Грција и Тесалија.
Воедно, итното предупредување за влошување на времето, издадено во неделата, беше засилено и со итното предупредување за опасни временски појави според најновите прогнози. Што се однесува до Атика, се предвидува зголемена облачност, па во вторник во пладневните и попладневните часови ќе има врнежи од дожд и можно невреме.
Невремето најпрвин стигна до областите на Западна Грција носејќи силен дожд и ветер во текот на ноќта.
До 1.000 мм дожд за 12 часа е забележан на подрачјето на Закинтос, а на Јонските Острови од 50 до 70 мм дожд, соопштија метеоролозите.
На Крф паднале 140 мм дожд, пишуваат грчките медиуми.
На Закинтос се урнал дел од ѕидот, во метохијата Агиос Дионисиос во областа Калитеро, на провинцискиот пат Закинтос-Каламаки поради што бил затворен дел од патот.
Најмалку четири пумпи за вода беа распоредени за испумпување вода од куќи и продавници, четири лица беа ослободени од автомобил во селото Махаирадос, а се запали и рефлектор во училиште во селото Литакија.
Лошото време, кое веќе ги зафати Јонските Острови, се предвидува дека ќе предизвика опасно време во Грција до среда на 11 август попладне со пороен дожд и невреме, главно во западниот, централниот и во северниот дел на копното, како и на островите во северниот и источниот дел на Егејското Море.
Појавите ќе бидат придружени со голема фреквенција на грмежи, град и силен ветер.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
(Фото) Пијан Македонец удри во паркиран автомобил во Загреб, казнет е со 4.860 евра

45-годишен државјанин на Северна Македонија бил вклучен во сообраќајна несреќа на улицата Радничка во Загреб околу 6 часот наутро во неделата, објави хрватски Индекс.
Тој управувал со „фолксваген пасат“ со загрепски регистарски таблички и возел југозападно низ паркинг на северната страна од пристапниот пат до ресторан.
Пристигнувајќи до куќата број 27, тој се вратил на пристапниот пат, застанал и возел напред. Во тој момент, предниот лев дел од неговиот автомобил удрил во задниот дел од „рено клио“ со загрепски регистарски таблички, сопственост на 40-годишна жена, кое било паркирано.
Со истрагата и алкотестот е утврдено дека 45-годишниот возач управувал возило со 1,76 промили алкохол во крвта.
Сообраќајната несреќа предизвикала материјална штета. Возачот бил уапсен и сместен во посебни простории додека не исчезнат ефектите од опојната материја. Потоа бил изведен во Општинскиот прекршочен суд во Загреб.
Во обвинителниот акт, полицијата предложила возачот да биде казнет со парична казна од 5.360 евра и затвор, како и да му се изрече заштитна мерка забрана за управување со моторно возило Б категорија во траење од 12 месеци.
Судот го прогласи обвинетиот за виновен, му изрече парична казна од 4.860 евра и му изрече заштитна мерка забрана за управување со моторно возило Б категорија во траење од 12 месеци, објави Индекс.
Регион
Пожар во затвор во Сплит, неколку затвореници хоспитализирани

Неколку затвореници се повредени во пожарот во сплитскиот затвор Билице, кој е изгаснат, соопшти денес Сплитскиот противпожарен оперативен центар.
Како што е наведено, затворскиот персонал го изгаснал пожарот што избувнал синоќа, а пожарникарите ги евакуирале затворениците, од кои неколку побарале медицинска помош поради вдишување чад и биле пренесени во сплитската болница.
„Добивме дојава за пожар во една од ќелиите на затворот околу 21:30 часот, а по пристигнувањето на пожарникарите затворскиот персонал веќе го изгаснал пожарот во најголем дел, а пожарникарите веднаш ги евакуирале затворениците“, изјавиле за Хина од Противпожарниот центар.
Регион
Драма во Црна Гора: две жени од Србија извлечени на брегот од силните морски струи и ветер

Две српски државјанки беа спасени денес во водите на Јадранското Море, откако силни морски струи ги одвлекоа далеку од брегот.
Како што соопшти Управата за поморска безбедност и управување со пристаништата во Црна Гора, двете жени од Србија биле однесени од брегот кај Сутоморе од силните морски струи и ветер.
Управата изјави дека центарот за поморски операции добил повик за помош утрово во 8:33 часот, по што спасувачкиот брод со екипажот испловил кон областа Сутоморе.
„На лице место пронашле две српски државјанки кои биле во морето. Тие веднаш биле извлечени од водата и безбедно транспортирани со брод на Управата за поморска безбедност и управување со пристаништата до брегот, каде што ги пречекала екипата за итни случаи“, се додава во соопштението.
Управата истакна дека акцијата била завршена брзо и ефикасно, а спасувачката екипа била поддржана од брод од Секторот за гранична полиција со екипаж.