Свет
(Видео) Њу Орлеанс се подготвува за ураганот Франсин
Ураганот Франсин денеска им се заканува на Њу Орлеанс и на пошироката област на Мексиканскиот Залив, од Луизијана до Флорида и Алабама, што запре четвртина од капацитетот за производство на нафта и гас таму.
Гувернерот на Луизијана, Џеф Ландри, прогласи вонредна состојба пред бурата, која се очекува да го погоди делот западно од Њу Орлеанс попладне. Се очекуваат пороен дожд, ветрови, а можно е и торнадо.
Американскиот претседател Џо Бајден исто така прогласи вонредна состојба за таа сојузна држава на федерално ниво, што ќе ги забрза неопходните операции за помош или спасување.
Неколку окрузи во близина на Заливот издадоа наредби за евакуација, а државниот Оддел за транспорт објави мапи за евакуација на областа. Градот Њу Орлеанс дистрибуира вреќи со песок на пет локации.
„Денеска се очекуваат деструктивни и опасни за животот урагански ветрови во делови од јужна Луизијана, каде што е во сила предупредувањето за урагани“, соопшти американскиот Центар за урагани.
Центарот вчеравечер ја зголеми предвидената сила на претстојната временска непогода од тропска бура на ураган. Центарот верува дека на скалата Сафир-Симпсон, Френсин ќе остане во првата категорија на најслаби урагани, но приватната метеоролошка компанија „Аку ведр“ верува дека и тој ќе премине во втората категорија со максимална брзина на ветерот од 154 до 177 километри на час.
Бурата ќе се движи блиску до брегот на Тексас, така што многу производители на нафта и гас ги напуштија своите платформи во Мексиканскиот Залив запирајќи една четвртина од производството на енергија во областа.
Најавата за моќни бури во Луизијана ги враќа сеќавањата на разорниот ураган Катрина од 2005 година, кој го опустоши Њу Орлеанс и околните области убивајќи речиси 1.400 луѓе и предизвика штета од 125 милијарди долари.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Германија го суспендираше новиот извоз на воено оружје во Израел
Германија го суспендираше новиот извоз на оружје за Израел додека се справува со правните предизвици, според анализата на податоците на Ројтерс и извор близок до Министерството за економија.
Извор близок до министерството цитираше висок владин функционер дека работата за одобрување дозволи за извоз на оружје во Израел е стопирана поради правниот и политичкиот притисок од правните случаи кои тврдат дека таквиот извоз од Германија го прекршува хуманитарното право.
Министерството за економија соопшти дека нема и нема да има забрана за извоз на оружје во Израел, а одлуките се носат од случај до случај по внимателно разгледување, додавајќи дека меѓународното право, надворешната и безбедносната политика се клучни фактори во нивните оценки.
– Нема бојкот на германскиот извоз на оружје против Израел – изјави владиниот портпарол во средата, коментирајќи го извештајот.
Минатата година Германија одобри извоз на оружје за Израел во вредност од 326,5 милиони евра, вклучувајќи воена опрема и воено оружје, што е десеткратно зголемување во споредба со 2022 година, покажуваат податоците на Министерството за економија, кое одобрува извозни дозволи.
Но, годинава одобренијата паднаа, а од јануари до 21 август се дадени само 14,5 милиони евра, покажуваат податоците на Министерството за економија како одговор на пратеничко прашање.
Регион
Вархеји: Добра средба со Вучиќ за спроведување на следните чекори, планот за раст во полн ек
Европскиот комесар за соседска политика и проширување Оливер Вархеји денеска изјави дека имал добра средба со српскиот претседател Александар Вучиќ во Брисел за да ги подготви следните чекори во време кога се започнуваат „амбициозните реформи засновани на реформската агенда на Србија“.
Вархеји на социјалната мрежа Х оцени дека новиот План за раст на Западен Балкан вреден шест милијарди евра е во полн ек.
„На маргините на состанокот на лидерите од Западен Балкан, имав добар состанок со претседателот Александар Вучиќ за да ги подготвам следните чекори додека започнуваме амбициозни реформи врз основа на реформската агенда на Србија. Новиот план за раст од 6 милијарди евра е веќе во полн ек. Повеќе реформи, повеќе поддршка!“, рече Вархеји.
Свет
Фолксваген сака да укине до 30.000 работни места во Германија и да ги намали инвестициите
Производителот на автомобили Фолксваген сака да укине до 30.000 работни места во Германија и да ги намали инвестициите, објави германскиот деловен портал Менаџер.
Како што се наведува, поддржувачите на радикалните мерки во менаџментот на Фолксваген очекуваат бројот на работници да се намали од сегашните 130.000 за речиси една четвртина.
Се најавува дека и Фолксваген поради заштеди ќе ги намали инвестициите за речиси 20 милијарди евра, а можни се отпуштања и во одделот за истражување и развој, пренесува Bild.