Македонија
Кисела Вода обезбеди 10 нови метларки за почисти улици

Денеска во просториите на општина Кисела Вода се промовираа 10те нови метларки кои се обезбедија преку проект ,,Зајакнување на општинските совети” заедно со поддршка на Швајцарската влада и Министерството за локална самоуправа во соработка со УНДП.
„Се работи за проект кој во целост се совпаѓа со нашите стратешки заложби за подигнување на транспарентноста и зголемување на довербата кај граѓаните преку нивно активно учество во креирањето на приоритетите на Општина Кисела Вода. Нашите жители беа вклучени во целиот процес. Низ пет форумски сесии граѓаните најпрво ја бираа областа, а потоа и го избраа проектот кој веќе е реализиран и кој денес го промовираме. Мнозинството како тема ја избра животната средина и одлучи дека треба да се набават машини за метење кои треба да ни помогнат нам, како локална самоуправа да бидеме поефикасни во одржувањето на чистотата на нашата општина. Преку проектот ,,Зајакнување на општинските совети” што го финансира Швајцарската Влада и Министерството за локална самоуправа, беа обезбедени средства и овие популарно кажано ,,метлачки”, веќе ни стојат на располагање. Воедно, бидејќи во Кисела Вода мислењето на секој наш жител има голема важност, ги разгледавме и прифативме и останатите предлози кои не добија потребен број на гласови, но тие ќе бидат реализирани како наши следни чекори. Од самиот почеток, јас како градоначалник и тимот со кој работам, сме посветени на одговорна и транспарентна работа целосно во служба на граѓаните. И за овој проект, но и за сите други претходно бевме во дослух со нашите жители и нивните потреби. Тоа е наша траекторија по која продолжуваме да се движиме бидејќи сме свесни дека интегрирањето на граѓаните во процесот на донесување одлуки е најправилниот начин со кој може да се унапредат условите за живеење во нашата општина. Сакам да упатам голема благодарност до УНДП, до Швајцарската влада и Министерството за локална самоуправа со кои успешно го спроведовме овој проект, истакна градоначалникот Орце Ѓорѓиевски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Фото) Признанија за најдобрите ученици од општина Илинден

Градоначалникот на општина Илинден Александар Георгиевски приреди прием за учениците од општинските основни училишта кои освоија високи места на државните натпревари и им додели признанија за постигнатите резултати.
Градоначалникот им ги честиташе успесите на учениците и нивните ментори и истакна дека е горд што има голем број наградени ученици од општина Илинден. Тој додаде дека локалната самоуправа посветено цели да ги промовира и поттикнува постигнатите успеси и достигнувања на учениците од општината.
На вкупно 20-тина ученици и нивните ментори и годинава им беа доделени признанија за постигнатиот успех, што претставува признание за трудот на наградените, но и мотив за останатите. Учениците беа наградени за високи достигнувања на државните натпревари по македонски јазик, англиски јазик, биологија, природни науки, како и на натпреварот по Информатичко размислување, велат од Општината.
Македонија
(Фото) Герасимовски: Граѓаните со големи пофалби за новоизградената градинка Пролет

Вчера, во рамки на караванот „Се гледаме во маало“, градоначалникот Горан Герасимовски се сретна со жителите на населбата Пролет, каде пред само еден месец беше отворена најубавата и најмодерната градинка „Пролет“ во Македонија.
Жителите на оваа населба упатија големи пофалби за новоизградената градинка, прва и единствена во Пролет која претставува вистински пример за современа детска заштита. Изградена според највисоки светски стандарди, со целосно нова, безбедна и инклузивна средина, таа денес е гордост на целата општина, велат од Центар.
„Овие маалски средби ни се многу важни, тие се можност директно да го слушнеме мислењето на граѓаните, нивните идеи, предлози и предизвици. Затоа и го правиме овој караван, затоа што општината не треба да чека граѓаните да дојдат кај нас, туку ние треба да одиме кај нив и да работиме исклучиво во нивен интерес“, изјави Герасимовски.
Средбата се одржа на маалско игралиште кое беше опремено од градоначалникот Герасимовски, каде што децата безгрижно растат, учат и се дружат. Центарци го поздравија континуираниот развој на Центар, во изминатиот период беа реконструирани 20 улици, подобрени беа условите во сите градинки и основни општiски училишта, а есенва ќе биде пуштена во употреба и реконструираната спортска сала „Работнички“, уште еден капитален проект во интерес на граѓаните, соопшти Општината.
Македонија
Оставки од Тошковски и Јанев и кривична одговорност, бара СДСМ

Последната акција на ОЈО ГОК потврди сè. СДСМ ја говореше вистината за Кочани од првиот ден.
Уапсените полициски службеници вчера се лица кои СДСМ ги објави во серијалот „Вистината за Кочани“ како директно одговорни за дозволување на нелегалното работење на „Пулс“, велат од опозициската партија.
„Благодарение на објавените факти и притисокот, конечно се постапува. Но, останува фактот дека четири месеци директорот на Бирото за јавна безбедност Александар Јанев, министерот Панче Тошковски и целиот врв на ВМРО-ДПМНЕ се обидуваа да ги заштитат и да ја прикријат одговорноста.
Тие бранеа и криеја свои функционери, ја лажеа јавноста и вршеа притисоци врз Обвинителството за да не се постапува против нивните кадри кои се докажано директно одговрни за пожарот во кој изгореа 62 деца“.
Според СДСМ, Александар Јанев, како прв човек на БЈБ, има директна одговорност за своите подредени. Тој, како што велат, ги поставил, тој давал наредби и затоа додаваат дека мора да понесе оставка и да следи кривична одговорност.
„Истото важи и за Панче Тошковски, кој целиот период ја штитеше структурата во полицијата и тврдеше дека нема вина.
Христијан Мицкоски, пак, со недели ја користеше трагедијата за политички напади, обвинувајќи ги сите, освен оние што ги поставил на функција. Ги лажеше родителите, ја манипулираше јавноста и се обидуваше да ја задуши вистината.
Без одговорност за Јанев, Тошковски и Мицкоски, нема целосна правда. А правда за Кочани мора да има“, потенцираат од СДСМ.