Македонија
Гаши за Меѓународниот ден на демократијата: Собранието е вистинската адреса за јакнење на демократската култура
По повод Меѓународниот ден на демократијата да испратиме пораки за наша посветеност за негување на демократските вредности,
како што се човековите права, слободни и праведни избори, еднаквост пред законот, уставни ограничувања на власта, општествен, економски и политички плурализам, толеранција, соработка и компромис, истакна претседателот на Собранието, Африм Гаши.
Тука сме, рече тој, да испратиме порака за поддршка на различностите, за надградување на инклузивноста и праведноста во општеството и, пред сè, за почит кон секоја индивидуа.
„Северна Македонија е сè уште млада демократија, конципирана со Уставот како граѓанска и демократска држава, која ги гарантира човековите права, граѓанските слободи, националната рамноправност и социјалната правда. Во овие 33 години ние практикувавме демократија, паралелно учејќи ги нејзините вредности и осознавајќи го значењето на нејзините принципи. Една од лекциите што ја совладуваме е дека во основата на демократијата е дијалогот, особено меѓу политичките фактори во општеството, пред сè, меѓу пратениците како народни избраници“, рече Гаши.
Според него, нашиот парламент ги има сите потребни алатки за унапредување на политиките и на законските рамки за владеење на правото и за спречување и заштита од дискриминација.
Затоа, како што додаде, треба да работиме заедно за развој на демократијата во државата.
„Верувам дека наша колективна цел е да направиме терен за новите генерации да живеат во средина во која во прв план се идеите, знаењата и интегритетот на личноста и во која различностите се мотор на напредокот, а не причина за поделби. Од тој аспект, преку артикулирање на разните гледишта и интереси на пратениците како народни избраници, Собранието е вистинската адреса за јакнење на демократската култура и за унапредување на политичката дебата“, нагласи Гаши.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Пренџов: На Македонија и требаат промени, граѓаните со право бараат оставки во судството со 2 проценти доверба
„Огромно мнозинство од граѓаните, пратениците во Собранието и сите добронамерни организации кои и мислат добро на Македонија очекуваа од сите вас во советот денес да си поднесете оставки. Требаше да си поднесете оставки бидејќи крајно време е во Република Македонија да создадеме еден нормален правен систем во кој на челото на правда и правичност ќе бидат пресудни во правниот промет кој го имаат граѓаните со институциите“, истакна пратеникот од ВМРО-ДПМНЕ Љупчо Пренџов на денешната собраниска Комисија за политички систем на која дебатираа за Годишниот извештај на Советот за јавни обвинители за 2023 година.
Пренџов додаде: „Ние во Македонија правна држава немаме. Правната држава почива на два столба првата е јавното обвинителство а вториот е судството. Ниту едното функционира, ниту другото функционира. Срамно е никој да не поднесе оставка од функција за која граѓаните кои сите не плаќаат имате 2% рејтинг“.
Пренџов укажа дека во Македонија нема правна држава, право и обвинителски систем.
„Темата право правда и реформи во правосуден систем беше ставен пред изборот на граѓаните, на секоја анкета немањето право и правда е клучен проблем, ама решение на него не е со вие да продолжите со како до сега да бидете судски совет во оваа држава со 2% рејтинг. На Македонија и требаат промени, а не козметика со зборување еден час и при тоа не кажување ништо“, дециден е Пренџов.
Македонија
Панова за работата на Советот за јавни обвинители: Нема позитивна работа
Во Извештајот за работа на Советот за јавни обвинители се вели дека Советот сите обврски ги има завршено успешно, па прашувам успешно ли е кога довербата во правосудството е минорни два посто, праша пратеничката Ели Панова од ВМРО-ДПМНЕ на денешната седница на собраниската Комисија за политички систем на која дебатираа за Годишниот извештај на Советот за јавни обвинители за 2023 година.
„Гледајќи седница на Советот што видов, што заклучив. Советот кој е составен од 11 члена е нем, никој ништо не зборува зарем тоа е транспарентност. Транспарентност ли е да се молчи. Се гледа дека само немо спроведувате одлуки“, рече Панова.
Панова се осврна на делот на Извештајот во кој се зборува за бројки или за статистика.
„Во делот каде зборувате за претставки давате бројки, статистика и кажувате дека најмногу претставки се во ЈО Скопје што е очекувано најголем број предмети се таму, но стои дека има незадоволство од времетраење на постапки што говори за неажурност, укажуваат за брзо решавање на предмети поднесени за луѓето за кои вие не смеете да постапите и најлесно е да ја отфрлите кривичната пријава, помал број биле претставки од незадоволство од застапената застареност. Или ако претставките зборуваат за неажурност, селективност, застареност на пријавите вие говорите дека позитивно работите“, посочи Панова
Македонија
Очигледно раководството на Северна Македонија не сака да продолжи по патот на европската интеграција па ја обвинува Бугарија, вели Ковачев
Во Република Северна Македонија немаат желба за европска интеграција и бараат изговор зошто тоа не може да се случи. Вака европратеникот од ЕПП/ГЕРБ Андреј Ковачев ги коментираше провокациите на РСМ кон Бугарија во последните денови за бугарскиот БНТ.
„Очигледно е дека актуелното раководство на Република Северна Македонија не сака да продолжи по патот на европската интеграција. Тие бараат изговор во својата јавност зошто тоа не може да се случи, а изговорот е, се разбира, со клеветење на Бугарија“, коментира тој.
Ковачев е дециден дека Бугарија не дала повод за вакви провокации:
„Напротив, ние се однесуваме крајно цивилизирано, европско, сакаме добрососедство.
Бугарија мора да го почитува европскиот дух и да очекува странските кандидати да ги исполнат своите обврски“, нагласи Ковачев на прашањето дали неговата земја треба да ја зајакне својата политика во однос на Северна Македонија.
„Не ни преостанува ништо друго освен да инсистираме на нивно спроведување и да побараме од нашите партнери, како и од САД, тоа повеќепати да го повторуваат пред Скопје“, рече европратеникот.