Новите израелски напади врз Либан ќе предизвикаат војната да се прошири на целиот регион, изјави турскиот претседател, Реџеп Таип Ердоган.

„Неодамнешните напади врз Либан и неодамнешните изјави на Израел се јасна манифестација на напорите за ширење на војната во регионот“, рече Ердоган посочувајќи дека мирот во регионот е загрозен од геноцидот што Израел го спроведува во палестинските земји, особено во Газa, пренесе агенцијата „Анадолија“.

Говорејќи на настан организиран од Турско-американскиот национален управен комитет (TASC) во Њујорк, Ердоган рече дека глобалните институции и организации не презеле никакви ефективни чекори за да се стави крај на „угнетувањето во Газа или да се спречи масакрот извршен од Израел“.

Најмалку тројца мигранти загинаа, а 25 се водат за исчезнати кога бродот со кој го преминаа Средоземното Море кон Европа денеска потона во близина на грчкиот остров Самос.

Досега се спасени пет мигранти, а во потрагата се вклучени четири брода на крајбрежната стража и еден хеликоптер, која сè уште е во тек, пренесува „Ројтерс“.

Потрагата продолжува во северозападниот дел на островот во близина на населбата Агиос Исидорос.

Папата Франциско ги откажа сите активности поради блага настинка, соопшти денеска Ватикан.

Според извештаите, папата ја донел оваа одлука како мерка на претпазливост пред неговата планирана посета на Луксембург и Белгија на крајот на оваа недела, пренесува „Ројтерс“.

На почетокот на оваа година папата веќе ги откажа своите активности поради настинка и бронхитис, а за време на двонеделната посета на Југоисточна Азија и Океанија беше во добра здравствена состојба – присуствуваше на повеќе од 40 настани и помина речиси 33.000 километри.