Свет
Иранскиот претседател: Подготвени сме да ставиме крај на нуклеарниот конфликт со Западот
Иран е подготвен да стави крај на својот нуклеарен конфликт со Западот, изјави иранскиот претседател Масуд Пезешкијан на Генералното собрание на Обединетите нации, повикувајќи на прекин на руската војна во Украина преку дијалог. Иранскиот клерикален естаблишмент се надева на олеснување на американските санкции кои и наштетија на економијата на земјата.
Во 2018 година, тогашниот американски претседател Доналд Трамп го напушти нуклеарниот договор на Техеран од 2015 година со шест светски сили и повторно воведе строги санкции кон Иран. Напорите за заживување на пактот не успеаја. Односите на Техеран со Западот се влошија откако милитантната група Хамас поддржана од Иран го нападна јужен Израел на 7 октомври и откако Техеран ја зголеми својата поддршка за Русија во војната во Украина.
Пезешкијан, релативно умерен политичар кој ја презеде функцијата во август ветувајќи прагматична надворешна политика, го критикуваше главниот непријател на Иран, Израел за, како што го нарече „неговиот геноцид во Газа“. „Императив е меѓународната заедница веднаш… да обезбеди траен прекин на огнот во Газа и да стави крај на очајното варварство на Израел во Либан, пред да го зафати регионот и светот“, рече тој.
Во израелскиот воздушен напад врз Бејрут вчера беше убиен висок командант на милитантната група Хезболах поддржана од Иран во Либан, додека прекуграничните ракетни напади од двете страни ги зголемија стравувањата од сеопфатна војна.
„Ние бараме мир за сите и немаме намера за конфликт со ниту една земја… Иран се противи на војната и ја нагласува потребата од итен прекин на воениот конфликт во Украина“, рече Пезешкијан. Русија воспостави поблиски врски со Иран од почетокот на нејзината војна со Украина и рече дека се подготвува да потпише сеопфатен договор за соработка.
Иран посредуваше во тековните тајни разговори меѓу Русија и јеменските бунтовници Хути за трансферот на противбродски ракети на милитантната група, рекоа три западни и регионални извори, развој што ги нагласува продлабочувачките врски на Техеран со Москва.
Обраќајќи му се директно на американскиот народ, Пезешкијан наведе низа ирански поплаки – од санкции до убиството на иранскиот генерал Касем Сулејмани во 2020 година во напад со американско беспилотно летало – и потоа ги повика „сите земји кои следат контрапродуктивна стратегија кон Иран“ да „учат од историјата. „..
„Имаме можност да ги надминеме овие ограничувања и да влеземе во нова ера. Оваа ера ќе започне со соработка во решавањето на заедничките предизвици. Се надевам дека оваа порака од Иран денеска внимателно ќе се слушне“, заклучи новиот претседател.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Асанж за прв пат во јавност на 1 октомври: ќе сведочи пред Советот на Европа за својот случај
Основачот на Викиликс Џулијан Асанж на 1 октомври ќе се појави во јавноста за прв пат по неговото ослободување од британскиот затвор. Асанж треба јавно да зборува пред Комитетот за правни прашања и човекови права на Парламентарното собрание на Советот на Европа во Стразбур, соопшти денеска неговата организација.
„Тоа ќе биде извонреден поттик за неговото закрепнување бидејќи (Советот на Европа) го покани Џулијан да сведочи пред Комитетот за неговиот случај и неговите пошироки импликации“, објави Стела Асанж на нејзиниот профил на „Икс“.
Асанж, кој има 53 години, се врати во Австралија во јуни оваа година, откако се изјасни за виновен за прекршување на Законот за шпионажа на САД, што доведе до договор за ослободување и стави крај на неговата 14-годишна правна одисеја во Велика Британија, пишува Ројтерс.
Неговата сопруга Стела, со која се оженил додека бил во затвор во Лондон, изјавила дека ќе му треба време да биде со своите деца, да си го врати здравјето и менталната рамнотежа по долгиот престој во заробеништво.
Свет
Лавров: ОН замижуваат пред упадот на Украина во регионот Курск
Рускиот министер за надворешни работи Сергеј Лавров изјави дека Обединетите нации замижуваат пред ексцесите на украинските сили при нивниот упад во руската област Курск.
Во интервју за ТАСС на маргините на Генералното собрание на ОН во Њујорк, Лавров рече дека украинските „терористички групи“, како што наведе, користат западно оружје за напади на Курск во кои не прават разлика меѓу цели.
„Тие во таа област секојдневно бомбардираат куќи, социјални институции, мирни граѓани кои се засолнуваат на побезбедни места во своите автомобили. Не слушнав ниту еден глас од претставниците на ОН кои се одговорни за човековите права, вклучително и генералниот секретар“, рече Лавров.
Свет
(Видео) Погоден град во северозападен Либан, објави Ројтерс
Нападот го погоди либанскиот шиитски град Маајсра во северозападниот дел на Либан, објави Ројтерс, цитирајќи ги државните медиуми и локален жител.
Israeli Airstrikes have reportedly Targeted the Town of Maaysrah to the North of Beirut, marking the First Israeli Strikes against Northwestern Lebanon. pic.twitter.com/pZl3DdHwW0
— OSINTdefender (@sentdefender) September 25, 2024
Градот лежи во планините на претежно христијанскиот регион Кесерван, северно од главниот град Бејрут.
На социјалните мрежи беше објавено видео на кое наводно се гледа чад од дел од градот по пријавениот напад.
Нема информации за жртви, но ова е првпат областа да биде погодена за време на конфликтот меѓу Израел и Хезболах.