Свет
Семеjна драма на Сардинија: ги убил сопругата и двете деца, ја застрелал мајка си во главата
Семејна драма се случи утрово на Сардинија кога мажот Р. Г. (52) ги убил сопругата и двете деца, а ранил уште три лица.
Според медиумите, мажот отворил оган во две куќи во Нуор по што се самоубил.
Првин ги застрелал сопругата (43) и ќерката (26), а потоа пиштолот го насочил кон уште две деца (9 и 14). Тој пукал и ранил и сосед.
Мажот потоа отишол во куќата на својата мајка и пукал во неа, при што тешко ја ранил во главата. По тоа, извршил самоубиство.
По неколку часа во болница, починало уште едно од неговите деца (9).
Според медиумите, тој и неговата сопруга биле разделени. Живеел во куќата на мајка си.
Полицијата и брзата помош бргу пристигнале на местото на настанот. Истрагата продолжува, соопшти полицијата, а оружјето со кое е извршен масакрот сè уште не е пронајдено.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Зеленски и Столтенберг во Њујорк разговараа за украинските амбиции за членство во НАТО
Украинскиот претседател Володимир Зеленски разговараше со генералниот секретар на НАТО Јенс Столтенберг за потребата од зајакнување на украинската воздушна одбрана и за патот на Украина кон членство во Алијансата.
Зеленски на својот канал „Телеграм“ објави дека на состанокот одржан на маргините на Генералното собрание на Обединетите нации, му се заблагодарил на Столтенберг за неговата поддршка на Украина за време на неговиот мандат како генерален секретар на Алијансата, како и за напорите за обединување на светот да му помогне на Киев и да ја зајакне украинската армија, пренесе Укринформ.
Украинскиот претседател изјави дека на средбата се разговарало и за фактот дека Украина треба што поскоро да добие покана за членство во НАТО, како и за важноста од навремено спроведување на сите договори од самитот на Алијансата одржан во јули во Вашингтон, oдносно дека земјите-членки ги исполнуваат своите обврски во врска со издвојувањето на 40 милијарди евра за следната година.
За време на самитот на НАТО во Вашингтон, кој се одржа од 9 до 11 јули, лидерите на САД, Холандија, Германија, Италија и Романија најавија трансфер во Украина на пет стратешки системи за воздушна одбрана „патриот“, како и десетици тактички системи за противвоздушна одбрана.
Зеленски присуствува на 79. сесија на Генералното собрание на ОН во Њујорк, а денеска треба да се обрати пред учесниците на сесијата.
САД и многу други членки на НАТО не сакаат Украина да се приклучи на Алијансата, изјави турскиот претседател Реџеп Таип Ердоган. Тој за медиумскиот сервис „NBC News“ рече дека е неопходно да се донесе одлука за ова врз основа на „актуелните реалности“.
– САД, пред се, не сакаат да ја гледаат Украина како членка на НАТО, ниту многу други членки на Алијансата, – рече Ердоган.
Свет
Зеленски во Белата куќа ќе му го претстави својот план на Бајден
Украинскиот претседател Володимир Зеленски треба да му го открие својот план за победа на американскиот претседател, Џо Бајден. Киев очекува силна поддршка од американскиот лидер пред Зеленски да ја напушти Белата куќа.
Како што пренесува Би-би-си, висок функционер во Киев изјавил дека сакаат „Бајден да испише историја“ во неговите последни месеци на функцијата.
Иако Киев сè уште ги чува деталите од планот во тајност, стратегијата, најверојатно, ќе вклучува молби за понатамошна воена и финансиска поддршка, како и безбедносни гаранции за иднината. Зеленски вели дека планот е дизајниран како мост за ставање крај на војната за која верува дека може да заврши побргу отколку што мислат луѓето.
Доколку Западот ја зајакне позицијата на Украина, тврди Зеленски, рускиот претседател Владимир Путин би можел да биде принуден на дипломатско решение на конфликтот.
„Оваа војна не може да се реши со преговори. Потребна е акција“, рече Зеленски доцна синоќа пред Советот за безбедност на ОН.
Украинскиот претседател исто така има цел да се соочи со критичарите во САД, кои ја доведуваат во прашање одлуката да се даваат дополнителни пари во Украина и да се промовира план за конечен мир.
Зеленски почна голема дипломатска офанзива во изминатите неколку дена во Обединетите нации. Така зборуваше завчера на дебатата за реформирање на ОН. Тој вчера се обрати пред Советот за безбедност, а денеска ќе одржи говор на Генералното собрание.
Во меѓувреме, тој се среќава со светски лидери и американски политичари. Ја посети фабриката за муниција во Скрентон, родниот град на Џо Бајден во Пенсилванија, која произведува гранати за украинската артилерија.
Тој е многу јасен за една работа – времето е кратко. Во едно од своите многубројни интервјуа Зеленски рече дека планот за победа мора да се прифати, а Украина мора да зајакне, и тоа во следните три месеци.
„Овој план е дизајниран првенствено имајќи ја предвид поддршката на Бајден“, изјави тој за „Њујоркер“. Таа поддршка во никој случај не е загарантирана, но Зеленски ги фрли сите карти на неа, посочува Би-би-си во анализата.
Причината е едноставна – ситуацијата значително ќе се промени доколку Доналд Трамп победи на изборите. Поранешниот претседател на предизборна средба пред неколку дена го исмејуваше Зеленски како „најголемиот бизнисмен во историјата“ затоа што „секогаш кога ќе дојде во оваа земја, си заминува со 60 милијарди долари“.
Трамп го повтори својот став дека ќе ги покани Русија и Украина на договор за ставање крај на војната за која Киев стравува дека ќе ги натера да прифатат територијални загуби, без да добијат никакви гаранции против натамошната руска агресија.
Свет
Американските разузнавачи го информирале Трамп за закани за атентат од Иран
Врвните функционери на американската разузнавачка заедница го информирале републиканскиот кандидат и поранешен американски претседател Доналд Трамп за закани за атентат од Иран, изјави портпаролот на кампањата на Трамп.
„Трамп претходно беше информиран од Канцеларијата на директорот на националното разузнавање за реални и конкретни закани за атентат од Иран во обид да ги дестабилизира САД и да предизвика хаос“, изјави портпаролот Стивен Чеунг, а пренесува „Еб-би-си њуз“.
Се додава дека претставниците на разузнавањето заклучиле дека овие постојани и координирани напади се зголемиле во текот на изминатите неколку месеци и дека службениците од сите агенции работат на тоа да обезбедат Трамп да биде заштитен и дека претседателските избори се слободни и спроведени без мешање.
Постојаната мисија на Иран во Обединетите нации во Њујорк не одговори веднаш на барањето за коментар на оваа информација.