Иранската државна телевизија објави дека 80 отсто од околу 200 проектили истрелани кон Израел ги погодиле нивните цели.

Израелските одбранбени сили велат дека засега немаат информации дали некој е повреден во нападот и ја проценуваат штетата.

Се верува дека израелската противвоздушна одбрана – таканаречената Железна купола – пресретнала голем број балистички ракети.

Сириски воени извори соопштија дека израелската противвоздушна одбрана исто така соборила десетици проектили кои летале над јужна Сирија.

Даниел Хагари, портпарол на израелската војска, потврди дека во моментов нема дополнителни закани против Израел од Иран, што укажува дека ракетниот напад е завршен.

Жителите биле известени дека можат да ги напуштат прифатилиштата.

„За време на одбраната направивме многу пресретнувања. Има одредени последици во централниот и јужниот дел на земјата“, рече тој.

„Во оваа фаза се уште го проценуваме нападот, но немаме информации за жртви“, додаде тој.

Најави дека Израел ќе одговори на ирански ракетен напад.

„Ние сме во состојба на зголемена одбранбена и офанзивна подготвеност, ќе ги заштитиме граѓаните на Израел. Овој напад ќе има последици. Имаме планови, ќе дејствуваме во времето и местото што ќе го избереме“, истакна тој.

Осум лица загинаа, а уште осум се повредени во пукање во Тел Авив, соопшти израелската служба за итни случаи.

Полицијата соопшти дека ги неутрализирала двајцата напаѓачи, кои ги опишаа како „очигледни терористи“.

Националната служба за итни случаи на Израел извести дека инцидентот се случил во близина на железничката станица во Јафа.

На вознемирувачките снимки кои се појавија на социјалните мрежи, може да се видат луѓе како лежат безживотно на станицата, додека се уште се слушаат истрели.

Израелските лекари претходно рекоа дека на местото на несреќата зеле најмалку седум повредени лица.