Спорт
Денот „Д“ за Ерик Тен Хаг

Раководството на Манчестер јунајтед во текот на денот ќе одржи клучен состанок на кој ќе се одлучува за иднината на тренерот Ерик тен Хаг, пренесува „Гардијан“.
Одлуката за судбината на холандскиот стручњак ќе биде донесена во присуство на еден од косопствениците на клубот Џим Ретклиф, директорот за фудбалски операции Омар Берада, спортскиот директор Ден Енсворт и техничкиот директор Џејсон Вилкокс.
Британските медиуми шпекулираат дека во случај Тен Хаг да добие отказ, функцијата привремен тренер би можел да ја преземе неговиот сегашен помошник и поранешен напаѓач на Јунајтед, Руд ван Нистелрој.
Ретклиф минатата недела изјави дека „го почитува Тен Хаг“, но и дека нема директно влијание врз неговата судбина во клубот.
Сепак, по ремито со Астон Вила во последното коло, Јунајтед има само осум бода од седум натпревари, што е најлош старт на сезоната во историјата на клубот, во Премиер лигата.
Тен Хаг требаше да добие отказ и минатата сезона, но го освои ФА Купот со победата над Манќестер сити во финалето и успеа да ја задржи работата.
Во случај клубот сепак да одлучи да го отпушти поранешниот тренер на Ајакс, Манчестер јунајтед ќе биде обврзан да му плати 19 милиони евра.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Спорт
Ленгле како слободен играч потпиша со Атлетико

Францускиот фудбалер Клеман Ленгле потпиша договор со Атлетико Мадрид до јуни 2028 година.
Ленгле беше член на Барселона, а минатата сезона ја помина на позајмица во Атлетико.
Францускиот фудбалер го раскина договорот со Барселона порано денес, а потоа потпиша тригодишен договор со Атлетико Мадрид како слободен агент. Минатата сезона, Ленгл одигра 34 натпревари за мадридскиот клуб и постигна три гола.
Покрај Барселона и Атлетико, дефанзивецот играше и за Астон Вила, Тотенхем, Севиља и Нанси.
Спорт
Киву го презеде Интер

Романскиот фудбалски стручњак Кристијан Киву (44) е назначен за нов тренер на Интер од Милано.
Киву потпиша договор со тимот од „Џузепе Меаца“ до 30 јуни 2027 година.
Тој го наследи Симоне Инзаги на клупата на вицешампионите на Европа и Италија. Инзаги минатата недела поднесе оставка и замина во Ал Хилал.
Киву поднесе оставка од тренерската позиција на Парма пред да биде назначен во Милано.
Романецот беше тренер на младинските категории на Интер од 2018 до 2024 година, а како играч беше член на клубот од Милано од 2007 до 2014 година.
Спорт
Започна чистката на „Олд Трафорд“, први на удар ветераните

Данскиот фудбалер Кристијан Ериксен (33), шведскиот дефанзивец Виктор Линделоф (30) и поранешниот репрезентативец на Северна Ирска Џони Еванс (37) ќе го напуштат Манчестер Јунајтед на 30 јуни, објави англискиот клуб.
Во соопштението се наведува дека договорите на тројцата фудбалери со Манчестер Јунајтед истекуваат на 30 јуни и дека англискиот тим не смета на нив следната сезона, бидејќи клубот од „Олд Трафорд“ одлучил да не ја продолжи соработката со Ериксен, Еванс и Линделоф.
Еванс беше член на Манчестер Јунајтед од 2006 до 2015 година, а се врати во клубот од „Олд Трафорд“ во 2023 година. Ирецот и претходно објави дека ќе се пензионира.
Ериксен пристигна во Манчестер Јунајтед во 2022 година, додека Линделоф е член на „Црвените ѓаволи“ од 2017 година.