Македонија
Латифи: Сите информации за наводно потрошени пари се само лажни вести
Познатата јавна набавка за хортикултурно уредување, како постапка, датира многу пред да дојдам јас како раководител на институцијата, кога поранешниот министер на ДУИ во својство на член на управниот одбор на АД МЕПСО, Билен Салији, го потпишал барањето за потребата од хортикултурно уредување, односно цвеќиња, вели Бурим Латифи околу фактичката состојба со набавката за хортикултурно уредување спроведена во АД МЕПСО, коа како што оценува стана дел од дневно-политичките настани.
„Прво, фамозната набавка за хортикултурно уредување е спроведена од претходниот менаџмент составен од луѓе на ДУИ и Зијадин Села.
Второ, утврдување на потреба за ваква набавка во АД МЕПСО е со потпис на поранешниот министер од ДУИ, Билен Салији, тогаш во својство на член на управен одбор на АД МЕПСО.
Трето, изборот на компанија добитник на постапката за набавка на хортикултурно уредување го направи претходниот директор на АД МЕПСО, Зуди Кока, поставен на таа позиција од Европскиот фронт.
Четврто, соочени со ситуација на немање начин и основ согласно закон за поништување на постапката во оваа финална фаза, договорот беше потпишан за да се избегне евентуална тужба и судски процес од претходно избраната компанија од претходниот менаџмент.
Петто, станува збор за рамковна набавка, која има финансиски импликации само доколку се направи нарачка. АД МЕПСО досега не потрошил ниту еден денар за оваа набавка.
Шестто, АД МЕПСО нема ниту во иднина да троши средства за непотребни набавки за АД МЕПСО“, нагласува во реакцијата.
Појаснува дека соочени со таквата ситуација, каде сите рокови за поништување на постапката и жалби биле поминати пред тие да стапат на функција, како ново раководство биле поставени пред свршен чин – или да ја спроведат постапката до крај, или да ризикуваат, како што вели да бидат тужени од компанијата победник избрана од претходниот директор.
„Бидејќи ова е рамковен договор, што значи дека ништо не се плаќа однапред, туку само доколку потенцијално се нарача некој производ, ние го потпишавме предметот за да избегнеме тужба, со силна увереност дека нема да се потроши ниту еден денар од оваа набавка, бидејќи сметаме дека трошоците се непотребни. Значи, сите информации за наводно потрошени пари се само лажни вести“, додава тој
„Ако ДУИ и нејзините „експоненти не бараат извинување за изнесените лаги и обвинувања, ќе бидам принуден да поднесам тужба за клевета и нарушување на углед пред соодветните институции“, потенцира Латифи.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
ЗЕЛС им донираше возила на општините Зрновци и Центар Жупа
ЗЕЛС им донираше возила на општините Зрновци и Центар Жупа. Во просториите на ЗЕЛС, денес градоначалникот на Центар Жупа, г-дин Аријан Ибраим и градоначалникот на Зрновци г-дин Борчо Коцев-градоначалник на Општина Зрновци ги потпишаа договорите за примопредавање на две користени возила на ЗЕЛС.
-Станува збор за возила марка ,,Opel“, од кои едното е караван, што се произведени во 2008 година. Овие возила беа доделени низ транспарентен процес со донесена одлука од членовите на Управниот одбор на ЗЕЛС на последната седница одржана во Кавадарци. На оваа одлука претходеше предлог донесен од формирана Комисија за распределба на двете користени возила на ЗЕЛС, во состав на градоначалниците на општините: Македонски Брод, Жарко Ристески на Студеничани, Азем Садики и на Општина Крива Паланка, Сашко Митовски. За изборот беа утврдени следните критериуми: 1. Општината да ја платила членарината кон ЗЕЛС заклучно со 2023 година; 2. Општината да има реална потреба од возило што ќе се утврди со бројот на возила кој во моментот го има во своја сопственост споредена и дополнително направена проверка на пријавениот број на возила на општините со оној утврден во Државна комисија за спречување со корупција.; 3. Општината да не биде поголема од 10.000 жители; 4. Општината да не припаѓа на скопскиот плански регион-изјави Претседателот на ЗЕЛС Орце Ѓорѓиевски.
Македонија
Тошковски на средба со Транспаренси Интернешнл: МВР ги насочува сите свои капацитети во борба со корупцијата
Министерот за внатрешни работи Панче Тошковски денеска (08.10.2024) оствари работна средба со претседателот на невладината организација „Транспаренси Интернешенл – Македонија“, Благоја Пандовски.
Средбата доаѓа во време кога Министерството за внатрешни работи се залага максимално и ги става на располагање сите свои капацитети за бескомпромисна борба против корупцијата на високо ниво и оттука и двете страни ја оценија како навистина потребна и продуктивна.
За време на средбата беше претставен извештајот насловен како Национален систем за интегритет, во кој детално се разгледува работењето и функционалноста на 15 државни институции во периодот од 2022-2023 година. Воедно разговарано беше и за зајакнување на интегритетот на полициските службеници, како и на сите останати вработени во Министерството за внатрешни работи, а предложени беа и модалитети за остварување на таа цел. Во таа насока, двете страни разговараа за потпишување на Меморандум за соработка преку кој би била олеснета натамошната соработка од заеднички интерес.
Македонија
Врховниот суд: Државата е должна да обезбеди здрава животна средина, а непреземањето дејствија е повреда на правата на граѓаните
Општата седница на Врховниот суд на Република Северна Македонија денеска утврди начелен став за правото на здрава животна средина и загадувањето на воздухот.
Во Начелниот став се утврдува дека државата согласно националната и меѓународната правна регулатива, е должна да обезбеди здрава животна средина и дека со непреземањето дејствија од страна на надлежните јавни органи се повредува уставно загарантираното право на здрава животна средина.
„Согласно националната и меѓународна правна регулатива, Државата е должна да обезбеди здрава животна средина, меѓу кои и правото на чист воздух, како поединечно право на граѓаните, кои како странка во управна постапка, можат да бараат да се задолжат надлежните органи, да ги донесат Основните плански документи, од член 23 од Закон за квалитет на амбиенталниот воздух, како Општи акти“, се наведува во Начелниот став.
Претседателката на Врховниот суд на Република Северна Македонија, Беса Адеми, истакна дека правото на здрава животна средина е фундаментално граѓанско и човеково право и непосредно поврзано со унапредувањето на здравјето на граѓaните и со законски пропишаните обврски и должности за заштита на животната средина.
„Една од темелните вредности на уставниот поредок на Република Северна Македонија е уредувањето и хуманизацијата на просторот и заштитата и унапредувањето на животната средина и на природата. Пристапот до здрава животна средина е основно човеково право, на што упатува и Советот за човекови права на Обединетите нации“, истакна претседателката на Врховниот суд, додавајќи дека прашањето е важно и од аспект на Европската конвенција, Советот на Европа, Европскиот суд за човековите права и Европскиот суд на правдата.
Професорот д-р Борче Давитковски истакна дека судската власт е коректив на другите власти и дека преку својата отвореност кон јавноста, Врховниот суд дава исклучителен придонес за јакнење на јавната доверба, особено што Општата седница расправа за прашања кои се од интерес на граѓаните и човековите права.
Професорот Давитковски нагласи дека правото на здрава животна средина е уставно загарантирано право и дека секој има право на информации за здравата животна средина, односно за загадувањето на воздухот, согласно конвенциското право и домашното законодавство.
Во таа насока, професорот истакна дека согласно Уставот, секој може да бара заштита на своето право, посебно во ситуација кога јавните органи не ги презеле дејствијата кои согласно законот биле должни да ги преземат и дека од големо значење е што судската власт застанува во одбрана на правата и интересите на граѓаните.
Судијата Џемали Саити истакна дека секој човек има право на здрава животна средина и дека во остварувањето на правото на здрава животна средина се применуваат и одредбите од Законот за управните спорови, кои обезбедуваат судска заштита од незаконити акти и дејствија. На тоа се надоврза судијата Анита Бошковска, која нагласи дека утврдувањето на начелниот став е од големо значење како за граѓаните и јавниот интерес, така и за судството.
Судијата Мирјана Лазарова Трајковска подвлече дека најзначајниот аспект е дека не секогаш со чинење се повредуваат правата, туку може многу поголеми повреди да бидат извршени со не чинење. Во оваа насока, судијата Лазарова Трајковска потенцираше дека правото на здрава животна средина, а во смисла на судската заштита подразбира и право на пристап до суд.