Македонија
Шеесетмина се затруле на Воената академија, Мисајловски, место храна, сега им исплаќа пари
Вкупно 60 луѓе се затруле од храната на Воената академија минатиот месец, извести денес министерот за одбрана, Владо Мисајловски, во отчетот за сработеното во првите 100 дена од новата Влада. Договорот со компанијата што ја обезбедува храната е еднострано раскинат, а вработените добиваат пари место оброк. Министерот Мисајловски вели дека течат законските рокови по раскинувањето на договорот со досегашната компанија, а дали ќе бараат нова или ќе исплаќаат пари место храна, ќе одлучат вработените.
„Се случија овие немили настани, за жал, беа 60 луѓе, ова не би требало да се случува. Јас знам дека во секој договор може да има пропуст, но многу записници стигнаа во кои е потврдена целата постапка дека треба да се раскине договорот. Здравствените власти најдоа бактерии на работните површини. Компанијата при првото предупредување не ги отстранила недостатоците и во овој момент мораше да се раскине договорот. Во согласност со колективниот договор што е донесен, на секој припадник во Армијата и во Министерството му следува надомест за хранарина. Бидејќи договорот е раскинат, секому ќе му бидат исплатени средства. Во делот во Армијата, каде што мораат да имаат оброци, тоа веќе го регулиравме и ќе се готви во Армијата бидејќи така било и пред неколку месеци. Ги имаме продуктите, се разбира, ако нешто недостига, дополнително ќе набавиме“, рече министерот Мисајловски.
Во овој момент Министерство има на располагање две постапки за снабдување со храна. Мисајловски најавува дека вработените ќе изберат која ќе се примени.
„Да се исплаќа целосно хранарина, како што е по колективниот договор, како што многу вработени посакуваат, или да се распише нова постапка за нова компанија што ќе дава оброк, односно кетеринг. Тие средства ги обезбедивме во буџетот. Она што најмногу ќе го бара Армијата и вработените – така ќе постапиме“, рече министерот Мисајловски.
Минатиот месец многумина питомци и офицери во Центарот за обука на питомците на Воената академија „Генерал Михаило Апостолски“ побараа лекарска помош поради мачнина и повраќање, а имаше и хоспитализирани.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Мицкоски: Виновен беше затоа што е мој син, прости ми, Јоване, што сето ова мора да го живееш
Со одлуката на Антикорупциската комисија се потврдија лагите на СДСМ, вели премиерот на Македонија Христијан Мицкоски.
„Го обвинија Јован, му судеа и го осудија без притоа да покажат ниту еден доказ. Виновен беше само затоа што е мој син. Останува горчината за лагите на СДСМ и нивните мегафони, посебно што нападнаа тинејџер кој ќе живее, учи и се гради како личност во средина во која политичките лешинари не бираат средства и начин во политичката арена. И тогаш имате морален хазард, истите градат среќа врз туѓото инволвирање во политика, затоа што со реални факти и аргументи не можат. Но вистината победи. Во моето однесување никогаш не сум прекршил закон, тaка и ќе продолжам“, рече Мицкоски и додаде:
„ А ти синко…, те молам да ми простиш, не си ти виновен што мора сето ова да го живееш. Заедно ќе живееме за да победиме за Македонија и никогаш повторно ова да не му се случува на ниту еден тинејџер во иднина“.
Македонија
Филков: Ќе ги споведеме неопходните реформи за Судскиот совет колку и да се тешки
Министерот за правда Игор Филков присуствуваше на настанот „Судски совет – предизвици и препораки за обезбедување независно судство“. Во своето обраќање Филков посочи дека е потребно да се насочиме кон решавањето на ситуациите, проблемите и да превенираме во иднина да немаме каков било сомнеж, што може да ја доведат во прашање независноста и стручното постапување на Судскиот совет.
„Да не се залажуваме, нема реформа што не е болна, но нема ниту реформа како оваа, што е толку неопходна. Сакам да порачам дека ќе ги спроведеме неопходните реформи колку и да се тешки. И нема да запреме додека повторно не почнат граѓаните да гледаат со полна доверба кон судовите во постапките за заштита на своите права“, рече Филков.
Министерот најави дека од следниот месец ќе почнат јавни дебати за Законот за Судскиот совет да се најде прифатливо решение со цел да се врати довербата на граѓаните во правосудниот систем.
„Веќе од наредниот месец почнуваме со јавни дебати за Законот за Судскиот совет. Дебати што ќе бидат експертски и за кои сум сигурен дека ќе вродат со плод, особено во деловите од законскиот текст, кои се однесуваат на дисциплинската постапка, постапката по жалба, изборот и разрешувањето. Овие три аспекти од законскиот текст ги увидовме како клучни за самиот почетокот за да можеме да одиме понатаму со чекорите кон враќањето на довербата во правосудниот систем“, потенцира Филков.
Според министерот, само со обезбедувањето на независноста и непристрасноста на ова тело ќе успееме да ги вратиме легитимитетот, професионалноста и интегритетот на Судскиот совет, кој треба да преставува пример и да ужива доверба од севкупната фела. Судскиот совет мора да се докаже како стручно тело, кое ќе биде составено од лица со потврдено правничко искуство, а за кои не смее да постои ни најмал сомнеж за нестручност и политичко влијание. Тоа не смееме да го дозволиме во институција што треба да ја штити независноста на судството.
„Да не бегаме од тешките одлуки што ни претстојат. Да се соочиме со неефикасноста и да изградиме правосудство, кое не е само независно и ефикасно, туку и такво во кое граѓаните на Северна Македонија повторно може да веруваат“,порача Филков.
Македонија
Кузеска: Божиновска да поднесе оставка, со недели тврдеше дека се откажала од бугарското државјанство
Министерката за енергетика, Сања Божиновска ја излажа јавноста. Таа со недели тврдеше дека се откажала од бугарското државјанство и пасош, за јавноста да дознае од бугарските медиуми дека не само што не е откажана, туку и целото нејзино семејство поседува бугарско државјанство. Во Македонија е законски да се има повеќе државјанства и се отвара голема дилема, зошто Божиновска лажеше и криеше за ова, вели Богданка Кузеска портпаролка на СДСМ.
„Министерке Божиновска, двојното државјанство не е спротивно на закон, но криењето и лажењето на јавноста од страна на министер е спротивно на сите етички и морални принципи во политиката. Како граѓантие ќе веруваат во вашата работа и во вашите следни изјави ако уште во првата незгодна ситуација избравте да криете наместо да ја кажете вистината?“, прашува Кузеска и додава:
„Министерката Божиновска покрај овој скандал, се уште не даде одговори за долгот од еден милион евра на компанијата која таа ја водела од Бугарија кон Мепсо. Не даде одговор дали е етички друга компанија од дејноста на енергетиката која исто така била под нејзино водство да биде обвинета за „картелско здружување“. Последните информации кои се уште не се потврдени, а СДСМ ги проверува се дека најавената инвестиција од кинсека компанија за ветерниот парк во Штип исто така е на сомнителен начин поврзана до Божиновска и нејзините претходни бизнис партнери“.
Според неа, заради сите овие скандали, јавноста нема доверба во министерката и потребно е таа да се даде оставка.
„Да се повлече од морални причини а сите останати сомнежи да бидат истражени од институциите. ВМРО-ДПМНЕ и Мицкоски донесоа некомпетентни, неморални кадри од чие работење и минато денес ги имаме овие случувања во јавноста“, заврши Кузеска.