Скопје
Зелени контејнери во училиштата, едукации и еко линија за е-отпад во Општина Центар
По повод Меѓународниот ден на електронскиот отпад, Општина Центар во соработка со „Нула Отпад“ успешно ја спроведе еко акцијата „Пренеси ја пораката, одиме во лов на електронски отпад“. Целта на акцијата беше подигнување на свеста за важноста на правилното управување со електронскиот отпад и заштита на животната средина, особено меѓу најмладите.
Низ сите основни училишта во општината се поставени зелени контејнери за ситен електронски отпад и батерии, а беа организирани и училишни работилници во периодот од 1 до 14 октомври. Децата се едуцираа за собирање и селектирање на овој вид отпад, при што младите еко-амбасадори ја пренесуваа пораката за одржливост во своите домови и меѓу другарчињата.
Активна е и „Еко линијата“ на бројот 070 236 000 граѓаните можат да пријавуваат поголем е-отпад, кој бесплатно се собира и правилно третира.
Градоначалникот на Општина Центар, Горан Герасимовски, се заблагодари на сите учесници на акцијата и ја истакна нејзината важност: „Оваа иницијатива е одличен пример за тоа како сите заедно, преку мали чекори, можеме да придонесеме во зачувување на животната средина. Младите ни покажаа дека со ентузијазам и одговорност можеме да постигнеме значајни резултати. Воедно ги повикувам жителите на Центар да ја искористат еко линијата за бесплатно превземање на непотребната и нефункционална електроника од нивните домови или работни места.”
Општина Центар и „Нула Отпад“ ќе продолжат со активности посветени на подигање на свеста и одржливото управување со отпадот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Скопје
6800 ученици од Гази Баба добија бесплатни училишни униформи
Општина Гази Баба успешно го реализираше проектот за обезбедување на бесплатни училишни униформи за сите ученици кои го следат образовниот процес во општинските основни училишта на нејзината територија.
Од општината информираат дека со проектот се опфатени 6800 ученици кои добиваат сет на бесплатни училишни униформи кој содржи две поло маици, една блуза со долг ракав и еден дуксер.
Вредноста на проектот е 14.000.000 денари, средства обезбедени од буџетот на општина Гази Баба.
Овој проект за првпат се имплементираше во општина Гази Баба минатата година и истиот претставува реализирано ветување од изборната програма на актуелниот градоначалник Бобан Стефковски.
За реализираниот проект, градоначалникот Стефковски истакна дека истиот е од голема важност за општината и е посебно среќен бидејќи учениците се ослободени од предрасудите и на сите нив им останува единствено обврската да се посветат на совладување на материјалот кој им се предава од страна на наставниот кадар.
Општина Гази Баба продолжува со реализација на проекти кои ќе обезбедат поквалитетно образование и воспитание на децата.
Скопје
Граѓаните на општина Ѓорче Петров вклучени во креирањето на буџетот на нивната општина
Општина Ѓорче Петров повторно ги вклучува граѓаните во изготвување на буџетот. Како и минатите две години, жителите на оваа општина повторно ќе имаат можност да учествуваат во креирање на буџетската каса за 2025 година.
-Целта е сите заедно да ги испланираме и реализираме приоритетите кои ќе ја направат нашата општина подобро место за живеење. Мислењето на граѓаните е особено важно – соопштуваат од Општината.
Во периодот што следува, граѓаните ќе имаат можност преку прашалник на следниот линк да го споделат своето мислење.
Оваа активност е веќе воспоставена пракса во Општина Ѓорче Петров. И изминатите две години, односно од почетокот на мандатот на градоначалникот Александар Стојкоски, граѓаните на повеќе начини активно учествуваат со свои идеи, предлози и сугестии во изготвување на буџетот за следната година.
Скопје
Отстранети десетина диви депонии во скопските општини Аеродром, Центар, Карпош и Чаир
Во текот на празничниот продолжен викенд, екипите на ЈП Комунална хигиена-Скопје подигнаа и транспортираа приближно 70 кубни метри отпад од десетина диви депонии лоцирани во скопските општини Аеродром, Центар, Карпош и Чаир.
Отстранети се автомобилски гуми, стар и неупотреблив мебел, градинарски отпад и градежен шут што беа непрописно одложени на јавни и сообраќајни површини на улиците Февруарски поход – во општината Аеродром, Орце Николов и Народен фронт – во општината Центар, Вуковарска – во општината Чаир, улиците Јуриј Гагарин и Париска, како и булеварот Метрополит Теодосиј Гологанов – во скопската општина Карпош.
Во текот на викендот беше извршено и целосно расчистување на теренот по сообраќајната незгода што се случи на аголот меѓу булеварите Србија и Трета македонска бригада, во скопската општина Аеродром.