Спорт
Варан: 11 години играв со едно колено
Францускиот дефанзивец Рафаел Варан на крајот на септември објави дека се повлекува од фудбалот на 31 година. Тој ја заврши својата успешна кариера по тешката повреда на коленото. Варан откри и дека ќе продолжи да игра фудбал, само што повеќе нема да игра професионално.
Варан ќе остане во Комо, но во поинаква улога која не ја дефинира целосно. Францускиот стопер се откажа поради чести повреди и здравствени проблеми.
„Кога се повредив на 11 јули, сфатив дека е готово. Фактот дека тоа беше моето лево колено беше знак. Моето лево колено мораше да го компензира десното од 2013 година, и благодарение на него успеав да најдам рамнотежа. Кога твоето лево колено ќе ти каже дека доста е да го носиш товарот, мора да го послушаш“.
Во текот на кариерата не сакал да зборува за споменатите проблеми: „Понекогаш си велев: „како ќе беше да играм со двете нозе…Сето тоа го сфаќам лесно, но поради овој проблем создадов еден вид уметност. Со години не практикував лизгачки стартови, го чекав вистинскиот момент за да влезам во дуел, кога да застанам или да забрзам или да почнам да трчам пред напаѓачот.
Немаше да успеам да не беше ова колено. Од мојата 20-та година играм така. Десното колено стана силно со текот на времето, но помалку подвижно, а моето лево колено правеше се што имаше врска со силата. Како играв со едно колено? Со многу напорна работа, пожртвуваност, грижа и учење како да се контролира рамнотежата“
Тој забележа 93 настапи за Франција од 2013 до 2022 година, имаше една од клучните улоги во походот на светската титула во Русија во 2018 година, четири години подоцна освои сребрен медал во Катар.
Варан ја започна својата клупска кариера во Ленс, пред да се приклучи на Реал Мадрид во 2011 година.
Тој играше 360 пати за „кралскиот клуб“ и освои три титули во Ла Лига и четири трофеи во Лигата на шампионите. На Манчестер јунајтед му се приклучи во 2021 година, забележа 95 настапи во сите натпреварувања за англискиот клуб. Со Јунајтед го освои Лига купот во 2023 година и ФА Купот во 2024 година, пред да се пресели во Комо во Серија А во јули, каде што доживеа повреда на коленото на неговото деби.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Спорт
Најбогатиот Европеец и Ред Бул ќе го купат ФК Париз
Францускиот милијардер Бернар Арно во заеднички проект со компанијата Ред Бул се согласи да го купи фудбалскиот клуб Париз, кој во иднина би можел да ја промени фудбалската мапа на оваа земја и Европа.
Париз моментално е лидер во Лига 2 и единствена цел му е да влезе во елитните редови на францускиот фудбал.
Помалку познатиот клуб од „градот на светлината“ почна да се издигнува откако во него инвестираше Кралството Бахреин.
Но, сега купувањето на клубот наводно го договориле Арно и Ред Бул, компанија која веќе го промени односот на силите во Европа со фудбалските проекти од Салцбург и Лајпциг.
Интересно, веста за преземањето на Париз доаѓа неколку дена откако Ред Бул го назначи Јирген Клоп за директор за фудбалски операции.
Како што пренесува „Лекип“, актуелниот сопственик Пјер Фераси (72) се согласил да го продаде мнозинскиот пакет акции во клубот, но ќе задржи 30 отсто од акциите до 2027 година, по што целосно ќе се пензионира.
Арно ќе има 55 % од акциите и ќе биде мнозински сопственик на клубот, додека Ред Бул откупува 15% од акциите, додека не го откупи остатокот од акциите на Фераси до 2027 година.
Арно е најбогатиот Европеец чие богатство се проценува на 191 милијарда долари. Сопственик е на мултинационалната компанија Moët Hennessy Louis Vuitton (LVMH).
Договорот може да биде од големо значење за францускиот фудбал бидејќи може да ја загрози долгогодишната доминација на Пари Сен Жермен, што ќе му даде моќен градски ривал, особено во годините кога вредноста на медиумските права на Лига 1 е значително намалена.
Инаку, ФК Париз е основан пред 55 години (1969), а следната година со Стад Сен Жермен го формира Пари Сен Жермен.
Но, веќе во 1972 година се одвои од ПСЖ и остана во сегашната форма, без значителни резултати.
Тренер на Париз е Стефан Жил, а клубот игра на стадионот „Себастиен Шерлети“, изграден во 1939 година, со капацитет од 20.000 седишта.
Спорт
Пешиќ останува селектор на Србија
Светислав Пешиќ ќе остане селектор на Србија уште една година.
Како што дознава „Меридијан спорт“, новиот претседател на Кошаркарскиот сојуз на Србија (КСС), Небојша Човиќ успеал да се договори со Пешиќ за продолжување на соработката.
Искусниот селектор претходно изјави дека не планира да продолжи да ја води машката селекција, но Човиќ по доаѓањето на чело на КСС изјави дека примарна цел му е да го задржи популарниот Кари.
Споменатиот портал додава дека Човиќ имал двајца одлични кандидати во случај да не биде постигнат договор со селекторот кој освои бронзен медал на Олимписките игри.
На крајот сепак беше постигнат начелен договор со Пешиќ да ја води Србија до крајот на Европското првенство во 2025 година.
Ваквиот исход ќе им даде повеќе време на Човиќ и неговите соработници да ја најдат најдобрата можна замена за Пешиќ по ЕП, а таа личност ќе има доволно време да се подготви за новата функција.
Спорт
Тухел: Сакам со Англија да освојам голем трофеј
Новиот селектор на Англија, Томас Тухел се надева дека ќе освои голема титула со „Гордиот Албион“.
На воведната прес-конференција по најавата дека токму Тухел ќе биде наследникот на Саутгејт, Германецот беше прашан дали ќе живее во Англија кога ќе стане селектор на 1 јануари.
„Сакам да живеам во Англија и со нетрпение очекувам повторно да живеам во Англија. Сакам да бидам блиску до Премиер лигата. Сакам да бидам блиску до повеќето играчи, но секако распоредот ќе ми овозможи да бидам блиску до семејството и децата во Германија. Но, да, поголемиот дел од времето ќе го минуван тука во Англија“, изјави Тухел и додаде:
„Ја сакам оваа земја, нејзиниот хумор, начинот на живот овде, односот на навивачите кон самата игра, како и она што го бараат од играчите. И како што многупати кажав, мислам дека тоа го обликува карактерот на играчите, како ја живеат својата професија, како пристапуваат кон тренинзите или тимскиот дух. Мислам дека е уникатен. Тоа беше уникатно искуство за мене (кога раководев со Челзи). Да можам повторно да го доживеам сето тоа е голема привилегија и јас сум многу горд, почестен и среќен што се вратив, сега во толку важна улога, уште подобро”.
На прашањето како сака да игра неговата Англија, 51-годишникот одоговори.
„Нашиот стил на игра мора да ни донесе резултати. Ги имаме најдобрите фудбалери од најдобрата лига, ја имаме најголемата конкуренција во светот. Имаме група млади и гладни за успех фудбалери. Очајни сме да освоиме трофеј. Ги имаме сите потребни состојки и мислам дека треба да се обидеме да го имплементираме тоа во нашиот стил на игра. Мислам дека треба да играме напаѓачки, да се обидеме да ја истакнеме физичката страна на фудбалот, бидејќи тоа е суштината на англискиот фудбал“.
Англија чека на голема титула од 1966 година.