Свет
Иран и Хезболах му се закануваат на Израел по убиството на лидерот на Хамас
Либанската милитантна група Хезболах објави дека влегува во нова и ескалирачка фаза во војната против Израел, додека Иран рече дека „духот на отпорот ќе биде зајакнат“ по убиството на водачот на Хамас, Јахја Синвар.
Синвар, организаторот на нападот на 7 октомври 2023 година, кој ја започна војната во Газа, беше убиен за време на операцијата на израелските војници во палестинската енклава во средата, клучен настан во едногодишниот конфликт.
Западните лидери рекоа дека неговата смрт нуди можност да се стави крај на конфликтот, но израелскиот премиер Бенјамин Нетанјаху најави дека војната ќе продолжи додека не бидат вратени заложниците земени од милитантите на Хамас. „Денеска ги подмиривме нашите сметки. Денеска на злото му е зададен удар, но нашата задача сè уште не е завршена“, рече Нетанјаху во изјавата снимена откако во четвртокот беше потврдена смртта на Синвар.
„На драгите семејства на заложниците им велам: Ова е важен момент во војната. Ќе продолжиме со полна сила додека сите ваши најблиски, нашите најблиски не се вратат дома“.
יושב רעול פנים ומשליך מקל על רחפן צה"לי | תיעוד רגעיו האחרונים של יחיא סינוואר@ItayBlumental pic.twitter.com/kMdoPBm8hP
— כאן חדשות (@kann_news) October 17, 2024
Синвар, кој беше прогласен за врвен лидер на Хамас по убиството на политичкиот лидер Исмаил Ханија во Техеран во јули, се верува дека се криел во серијата тунели изградени од Хамас под Газа во последните две децении.
Тој беше убиен од израелски војници кои првично не знаеја дека го заробиле најголемиот непријател на нивната земја, изјавија израелските власти.
Војската објави видео од дрон за кое тврди дека го прикажува Синвар како седи во фотелја и покриен со прашина во уништената зграда.
Самиот Хамас не коментираше, но извори во групата рекоа дека индициите што ги виделе сугерираат дека Синвар навистина бил убиен од израелски војници.
Американскиот претседател Џо Бајден, кој телефонски разговараше со Нетанјаху за да му честита, рече дека смртта на Синвар дава можност конечно да се стави крај на конфликтот во Газа и да се вратат израелските заложници дома.
САД сакаат да започнат преговори за предлогот да се постигне прекин на огнот и да се обезбеди ослободување на заложниците, изјави портпаролот на американскиот Стејт департмент Метју Милер, нарекувајќи го Синвар „главна пречка“ за завршување на војната.
Иран, сепак, рече дека нема знаци дека убиството ќе ја промени неговата политика. „Духот на отпорот ќе биде зајакнат“ по смртта на Синвар, соопшти неговата мисија во Обединетите нации.
И Хезболах беше пркосен, најавувајќи „транзиција во нова и ескалирачка фаза во конфликтот со Израел“.
Американскиот државен секретар Ентони Блинкен во четвртокот имаше одвоени телефонски разговори со лидерите на Саудиска Арабија и Катар со цел да се стави крај на конфликтот на Блискиот Исток, соопшти Стејт департментот.
Семејствата на израелските заложници рекоа дека иако убиството на Синвар е значајно достигнување, мисијата нема да биде завршена додека заложниците се уште се во Газа.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Сијарто: Односите меѓу Унгарија и Луксембург се карактеризираат со меѓусебно почитување
Министерот за надворешни работи и трговија на Унгарија, Петер Сијарто, денеска изјави дека односите меѓу таа земја и Луксембург неодамна „повторно“ се карактеризираат со меѓусебно почитување.
„Обеменот на билатералната трговија се зголеми за четири пати во изминатата деценија. Подобрувањето на конкурентноста на ЕУ е заедничка цел, затоа ги поддржуваме мерките неопходни за функционирање на светскиот трговски систем заснован на правила без вештачки бариери“, соопшти Сијарто.
Сијарто го пречека својот луксембуршки колега Ксавиер Бетел во Будимпешта за првпат во неговиот децениски мандат.
Свет
Молдавија: Русите во камповите во БиХ и Србија обучуваа луѓе да предизвикуваат немири
Полицијата на Молдавија извршила рации во кои уапсила лица за кои тврдат дека биле обучени во Русија, но и на територијата на БиХ и Србија, за предизвикување немири, кои би ја дестабилизирале таа земја, а тоа повторно го отворило прашањето за постоењето илегални кампови за обука, што претходно го предупреди министерот за одбрана на Босна и Херцеговина.
На веб-страницата на Министерството за внатрешни работи на Молдавија беше објавена информација во која се вели дека во средата извршиле 88 рации во целата земја откако полициските истражители ги документирале активностите на криминална група од јули 2024 година, чии членови планирале кулминација на масовните немири околу претседателските избори и на уставниот референдум за пристапување во Европската Унија закажан за 20 октомври 2024 година.
При рациите полициските службеници одзеле парични средства во разни валути во износ од над 320 илјади евра, предмети за кои било наведено дека се наменети за организирање масовни немири и списоци на активисти, летоци, лаптопи, телефони, облека со разни натписи, картички на банките на Руската Федерација, како и билети за лет на авионот на релација Кишињев – Истанбул – Москва.
За време на испрашувањето на младите што ги затекнале во рациите, полициските истражители откриле дека тие биле на обука во пансион во предградијата на Москва. Во јуни повеќе од 100 млади од Молдавија учествуваа на ваква обука под изговор дека учествуваат во програма за културен туризам, а во Русија ќе се обучуваат за тактика на национална поделба, како и дестабилизација на уставниот поредок, употреба на оружје и физичка пресметка со полицијата за време на протести, производство и употреба на запаливи предмети и рачно изработени експлозиви и ракување со дронови.
„Типот на обука што им се нуди на граѓаните на Република Молдавија укажува на навредливи акции во контекст на масовни акции насочени кон создавање провокации и паника“, се вели во полициското соопштение.
Тие тврдат дека обуката ја спроведувале странски инструктори поврзани со паравоени групи, како „Вагнер“ и „Ферма“, а во исто време некои учесници биле избрани за понапредна обука во герилските кампови, одржани во Босна и Херцеговина, како и во Србија. Најголемиот дел од таа обука наводно се одржал од почетокот на септември до средината на октомври.
Во моментот четворица молдавски државјани, кои биле обучени во герилски кампови од Босна и Херцеговина, како и од Србија, се во триесетдневен притвор, соопшти молдавската полиција.
Свет
Хезболах: Влегуваме во нова фаза од борбата со Израел
Хезболах вели дека влегува во нова фаза во својата борба против инвазивните израелски трупи додавајќи дека во последните денови почнал да користи ново оружје.
Во соопштението на Хезболах се вели дека борците на групата првпат користеле нови типови на прецизно наведувани ракети и експлозивни беспилотни летала, според медиумите во регионот.
„Почнуваме нова фаза во војната против Израел. Во оваа фаза првпат користиме ракети со прецизно наведување како додаток на нов тип самоубиствен дрон“, се наведува во соопштението.
„Ги лансиравме артилериските гранати на позициите на израелските непријателски војници откога ги забележавме на периферијата на градот Кфар Кила. Вторпат бомбардиравме собир на непријателски војници во близина на градот Аита ал-Шааб додека тие се обидуваа да ги евакуираат мртвите и ранетите“, се додава.
Групата исто така претходно оваа недела објави дека лансирала нов тип ракета наречена „Кадер 2“ кон предградијата на Тел Авив.