Македонија
СДСМ: Мицкоски продолжува со лагите и манипулациите за Коридорот 8
СДСМ ја потсетува јавноста дека Република Северна Македонија и Република Бугарија имаат потпишан Меморандум за разбирање за Коридор 8, исто како што Владата на СДСМ потпиша и договор за брза пруга Ниш – Скопје. Овие документи се клучни за развојот на инфраструктурата и поврзаноста на земјата со соседите и регионот, велат од опозициската партија.
„Сѐ што требаше Христијан Мицкоски да направи е да испрати свој претставник, министерот за транспорт, во Бугарија или да го покани бугарскиот министер во Скопје и да ги расчисти сите дилеми околу проектот. Наместо тоа, Мицкоски продолжува да ги менува своите тези и да манипулира со јавноста.
Ќе признае ли Мицкоски дека беше свесен за ова кога пред две недели отпатува во Брисел на средба со претседателката на Европската комисија, Урсула фон дер Лајен? На оваа средба се разговарало за Планот за раст, кој го предвидува заокружувањето на железничкиот Коридор 8, кој ги поврзува Бугарија, Северна Македонија и Албанија.
Планот за раст, целосно подготвен од Владата на СДСМ, Мицкоски го потврди со само три измени, од кои ниту една не се однесува на проектната листа за Коридор 8. Мицкоски го имал овој документ со себе на 19 септември, но продолжува да ја заблудува јавноста“, истакнуваат од СДСМ.
Дополнително, прашуваат, „дали Мицкоски ќе признае дека СДСМ предложи, а тој се согласи, дека најмалку 400 милиони евра од Планот за раст ќе бидат наменети за пругата? Зошто ја манипулира јавноста дека 500 милиони евра ќе потрошела нашата Влада за проектот? Дали владините претсравници во понеделникот во Брисел ја потврдија финансиката конструкција за пругата кон Бугарија според која државното директно учество е само 18 милиони евра?“
Овој, како што додаваат, капитален проект е од суштинско значење за регионалната поврзаност и економскиот развој на Северна Македонија.
СДСМ, нагласуваат од оваа партија останува посветена на реализација на капиталните инфраструктурни проекти кои ќе ја подобрат поврзаноста и економскиот раст на државата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
ДУИ: Од 34 универзитетски клиники, само три ги водат албански медицински директори, „ВРЕДИ“ уништува се што беше постигнато во здравството
Од доаѓањето на ВРЕДИ на власт до денес, за 100 дена ги демолираа и продолжуват да демолират се што беше постигнато во здравството, оцебуваат од ДУИ.
Додаваат дека од самиот почеток на работа на оваа влада, со длабока загриженост ги набљудуваат промените кои се случуваат во здравствениот сектор, имплементирани од ВЛЕН.
Според ДУИ, во отсуство на легитимитет тие се принудени да го прифатат понижувањето и во исто време да ги прекршат правата на еден цел народ.
„Со многу напорна работа и голема пожртвуваност успеавме да создадеме здравствени кадри од сите профили (медицински техничар, медицински сестри, доктори специјалисти, доктори на науки, универзитетски професори), од трудот на Албанците тие најдоа здравство со застапеност на сите нивоа, раководители на многу здравствени институции, кадри докажани меѓународно.
Албанците раководеа со над 50 здравствени институции, додека кога ВРЕДИ влезе во Влада, без легитимитет од народот и кои без двоумење ги демолираа и продолжуват да го демолират се што беше постигнато“, истакнуваат од партијата на Ахмети.
Денес, како што додаваат, после повеќе од 100 дена нелегитимна влада, во Клиничкиот центар “Мајка Тереза” – Скопје од 34 Универзитетски клиники, само 3 клиники ги водат албански медицински директори. Со тоа, сметаат од ДУИ, се омаловажени над 100 албански специјалисти докажани во нивниот професионален ангажман како во давање услуги во здравствената заштита така и во едукација на нови кадри. Тоа, според нив, се кадри докажани на меѓународно поле со научни трудови, имплементација на нови методи во различни области на медицината.
„Денес овие професионалци не го заслужуваат ова деградирање и омаловажување за овие 100 дена Влада.
Кога нашите соседни земји ќе се отворат за имплементација на иновативни технологии, роботска технологија, вештачка интелегенција, ние се соочуваме со деалбанизација на здравствените установи за 100 дена владеење.
Денес сите Универзитетски клиники во состав на ТОАРИЛУЦ се предводени од македонски кадар, 1 медицински директор и 4 македонски клинички директори. Денес ФЗОРСМ за прв пат е предводен од 2 македонски директори, знаејќи ја важноста на оваа институција, институција која го составува буџетот за сите здравствени установи, институција од која целото население добива услуги, во овие 100 дена се промени во сите нивоа: Од 3 директори на албански сектор, денес само 1 директор на албански сектор“.
Предлагаме итно министерот Таравари да ја повлече одлуката за прекин на сите конкурси објавени за вработување на 1117 здравствени работници, одлука која беше одобрена од претходната Влада, исто така промовирана како големо достигнување на поранешниот министер за здравство Ф. Меџити, напоменуваат од оваа партија.
Предлагаат и со „заштедените“ средства од разрешувањето на организационите директори да се предвидат вработувања на сите приватни специјалисти.
„Предлагаме да се почитува Колективниот договор за зголемување на платите. Предлагаме министерот за здравство да биде ажуриран со информации за стратешките програми, стратешките планови за постојното здравство кои се одобрени и од европските комисии. Да не се формираат непотребни комисии за залажување и замолчување на незадоволните гласови“, велат од ДУИ.
Македонија
Мицкоски: Владата врши редовна исплата на субвенциите и враќа наследени заостанати долгови од претходната влада на СДСМ
Претседателот на Владата на Република Северна Македонија, Христијан Мицкоски при посета на ООУ „Крсте Мисирков“-Скопје, Општина Гази Баба одговарајќи на новинарско прашање за тоа каква е состојбата во земјоделието дали е катастрофална како што посочуваат од опозициската СДСМ и млекарите се пред банкрот, изјави дека и покрај наследените, заостанати субвенции, сега има редовна исплата на тековните субвенциите и враќање на стари долгови.
„Во земјоделието наследивме исклучително тешка слика и големи долгови. Покрај редовната исплата на субвенциите имаме досега околу, близу или нешто над една милијарда денари стари долгови, вратени. Очекуваме во следниот буџет уште една, и веќе во 2026 година да се изедначиме со тековната исплата на субвенциите“, изјави премиерот.
Премиерот подвлече дека пораките коишто доаѓаат од опозициската СДСМ се од незнаење, а тој е шокиран од истите.
„Јас навистина повторно ќе кажам, шокиран сум од овие пораки коишто се темелат на незнаење, коишто доаѓаат од СДСМ, но повторно ќе кажам, тие одбрале таква политика да водат, на нив е. Нашата политика е оваа којашто е портретирана со дела, со проекти, со реформи, со развој“, истакна премиерот Мицкоски.
Приоритет на Владата е поддршка на македонското земјоделство, затоа носиме мерки и проекти со кои ја враќаме надежта кај земјоделците.
Македонија
Андоновски во ЕК во Брисел: Дигиталната трансформација е приоритет на новата Влада во Македонија
Министерот за дигитална трансформација се обрати на 3-ти регулаторен дијалог меѓу Европската Унија и Западен Балкан, на кој присуствуваат Генралниот директор на Директоратот за поврзување (DG Connect), Роберто Виола, како и министрите задолжени за дигитализација од Србија, Црна Гора, Албанија, Босна и Херцеговина и Косово.
Андоновски ја истакна важноста на формирањето на новото Министерство за дигитална трансформација во Македонија.
„Неодамнешното формирање на нашето Министерство за дигитална трансформација означува значајна пресвртница во патот на Македонија кон безбедна и сеопфатна дигитална трансформација. Ова министерство го нагласува огромното значење што нашата влада и го придава на дигиталната трансформација како клучен приоритет за напредокот на државата.“ истакна Андоновски.
Андоновски ги подвлече најзначајните достигнувања на Владата во поглед на дигиталната трансформација во првите 100 денови од мандатот.
„Во првите 100 дена објавивме 80 нови електронски услуги, со што бројот од 120 се зголеми на 200 е-услуги. Очекуваме 100 нови е-услуги во наредната година, што ќе значи 100% зголемување во однос на претходниот 4-годишен период. Во првите 100 дена од новата влада го редизајнираме порталот за национални услуги, со цел да биде полесен пристапен, со подобро корисничко искуство, достапен за лицата со попреченост, потранспарентен и општоприфатен.“
Регулаторниот дијалог се фокусира на новите правила на Европската унија во врска со прифаќањето на вештачката интелигеција, законите за употребата на електронски документи и дигиталната економија, како и сајбербезбедноста. На маргините на регулаторниот дијалог, Андоновски оствари средби со Роберто Виола, како одговорен од Европската комисија за процесите на дигитализација, Валентина , директор на Директоратот за проширување.