Поранешниот сноубордер Рајан Вединг го бара ФБИ во операцијата Слалом. Имено, ФБИ има издадено потерница по 43-годишникот и нуди награда од 50.000 долари за информација која ќе доведе до негово апсење.

Вединг се бара поради наводно водење и учество во транснационална операција за шверц на стотици килограми кокаин од Колумбија, преку Мексико и јужна Калифорнија, во Канада и остатокот од САД.

Во налогот за апсење се наведува дека Вединг бил вмешан во организирање на повеќе убиства поврзани со дрога. Американските медиуми пишуваат дека Вединг е познат во шверцерскиот свет по прекарите Шефот, Гигант и Јавен Непријател и дека е дел од криминална организација која работи под заштита на озлогласениот мексикански картел Синалоа.

Мартин Естрада, федералниот обвинител за Калифорнија, потврди дека Вединг е обвинет за водење на транснационална организирана криминална група која била вклучена во шверц на кокаин и убиства на невини цивили. Локалните власти уапсија повеќе од десет лица во рамките на операцијата Слалом, но Вединг и уште тројца се уште се во бегство.

Полицијата заплени повеќе од еден тон огнено оружје и муниција, 250.000 долари во кеш и 3,2 милиони евра во криптовалути.

Американските власти тврдат дека обвинетите поседувале кокаин вреден меѓу 23 и 25 милиони долари.

Поранешниот олимпиец може да биде осуден на доживотен затвор. Само по обвиненијата за трговија со дрога, доколку биде осуден, Вединг се соочува со минимум десет години затвор.

Обвиненијата за убиство и злосторничко здружување, носат доживотна казна во федерален затвор.

Вединг учествуваше на Зимските олимписки игри 2002 во Солт Лејк Сити како член на канадската репрезентација, со која заврши на 24. место во слалом.

Фенербахче и Жозе Мурињо го раскинаа договорот со 27-годишниот Рајан Кент.

Како што информираат од турскиот клуб, Кент добил спогодбен раскин на договорот, што фудбалерот во јануари ќе може да се пресели во друг клуб. Прогнозите се дека ќе се врати во Велика Британија.

Сето ова се случи пред викендот и мечот со Самсун и натпреварот на Фенербахче во Лига Европа против поранешниот клуб на Мурињо, Манчестер јунајтед наредниот четврток.

Кент во Фенербахче помина само 16 месеци. Тој во Истанбул пристигна во 2023 година и потпиша четиригодишен договор.

Сепак, минатата сезона одигра само 18 натпревари во сите натпреварувања, додека ксј Мурињо имаше само еден настап, во квалификациите за Лигата на шампионите.

Инаку, Кент летово имаше неколку понуди, пред се од Лацио и уште неколку клубови од Англија и Саудиска Арабија, а се верува дека Лидс се уште е заинтересиран за него.

Единицата за интегритет на спортовите во вода (AQIU) го суспендираше италијанскиот машки ватерполо тим на шест месеци поради вербални и физички напади на официјални лица по поразот од Унгарија во четвртфиналето на Олимписките игри во Париз.

Ватерполо сојузот на италија доби и парична казна од 100.000 долари, од кои 50.000 долари мора да се платат во рок од 90 дена, додека 50.000 долари се условни и ќе бидат активирани во случај на ново прекршување на Кодексот до 17 октомври 2026 година.

Во четвртфиналето на олимпискиот турнир, Италија загуби од Унгарија по изведувањето на пенали. Еден од клучните моменти се случи на крајот на втората четвртина кога судиите го исклучија Франческо Кондеми поради брутален фаул.

Италијанецот шутираше кон голот и откако ја испушти топката, со раката по главата го удри Јаншик. На Италијанците им беше поништен голот, останаа со играч помалку во следните четири минути, а Унгарците добија и пенал.

Италијанците полудеа по судиската одлука, а правдата ја бараа по мечот.

„Италијанскиот тренер Сандро Кампања и дел од играчите вербално и физички ги нападнаа судиите и делегатите на паркингот пред базенот по натпреварот“, соопшти АQIU.

Интересно, AQIU потврди дека потегот на Франческо Кондеми е легитимен и не требало да биде исклучен. Сепак, AQIU потенцира дека однесување на Италијанците е неприфатливо во кој било спорт и особено му штети на глобалниот имиџ на ватерполото.

Раководството на Ватерполо сојузот на Италија призна дека играчите и тренерите го прекршиле Кодексот за интегритет на спортовите во вода, кој забранува насилничко однесување, како и непослушност или нарушување на настаните.

Селекторот Кампања, исто така, напиша писмо до судиите и официјалните лица во кое се извинува за инцидентот, наведува AQIU.

Суспензијата започнува на 17 октомври, што значи дека Италијанците нема да можат да настапат на Светскиот куп. Сепак, ќе имаат право на настап на Светското првенство во водени спортови закажано за јули.