Свет
Фон дер Лајен: Смртта на Синвар значително го ослабува Хамас
Претседателката на Европската комисија, Урсула фон дер Лајен, оцени дека убиството на лидерот на Хамас, Јахја Синвар, кој се смета за еден од главните организатори на нападите врз Израел минатата година, значително ќе го ослаби Хамас.
„Неговата смрт сигурно значително го ослабува Хамас“, изјави Фон дер Лајен на прес-конференција по самитот на лидерите на ЕУ во Брисел.
Таа го опиша Синвар како водач на терористичката организација, кој бил мозокот на нападот на Хамас врз Израел на 7 октомври минатата година, пренесува „Политико“.
Претседателот на Европскиот совет, Шарл Мишел, рече дека Синвар е „одговорен за страдањата на луѓето во Газа поради неговите постапки“ како еден од главните организатори на нападот на Хамас врз Израел минатата година.
Фон дер Лајен и Мишел повикаа и на прекин на огнот во Појасот Газа, каде што, според процените на ОН, речиси два милиона луѓе се соочуваат со екстремно критични нивоа на глад како резултат на израелската воена офанзива.
Неколку западни лидери во четвртокот, по убиството на Синвар, повикаа на ослободување на заложниците и крај на војната во Појасот Газа и повторно го осудија нападот врз Израел на 7 октомври минатата година.
Генералниот секретар на НАТО, Марк Руте, изјави дека нема да му недостига водачот на милитантите, а францускиот претседател Емануел Макрон рече дека земјата бара ослободување на сите заложници, кои сè уште се во Газа, пренесува „Танјуг“.
Потпретседателката на САД и демократска кандидатка за претседател на САД, Камала Харис, оцени дека овој момент нуди шанса да се стави крај на војната во Појасот Газа.
Хамас уби приближно 1.200 луѓе во нападот врз Израел на 7 октомври 2023 година и зеде речиси 250 заложници во Појасот Газа по што Израел почна офанзива во која загинаа повеќе од 40.000 Палестинци, според Министерството за здравство на Газа.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Захарова: Роднините на нацистите се враќаат на власт, Русија и Србија ги продолжуваат делата на своите предци
Роднините на нацистичките криминалци и соработници доаѓаат на власт во земји како Канада или Германија без да се чувствуваат виновни, со разбирање дека им е моментот да ги рехабилитираат своите предци, додека Србите и Русите, како и многу други народи, ги продолжуваат делата на нашите предци, изјави портпаролката на Министерството за надворешни работи на Русија Марија Захарова.
Захарова за РТ Балкан истакна дека нејзините предци се бореле на страната на победникот.
„Двајцата мои дедовци се бореа во Црвената армија. Се бореа против нацизмот и фашизмот. И двете мои баби работеа во фабрики за време на Големата патриотска војна, покрај нормалниот цивилен живот, работеа и во име на победата. Сеќавањето на тие времиња во мене се живи не само поради учебниците, туку, пред се, поради историјата на моето семејство“, рече Захарова, која присуствуваше на приемот по повод 80-годишнината од ослободувањето на Белград во Втората светска војна во Амбасадата на Република Србија во Москва.
Регион
Јотова: Лично ги видов документите на Божиновска во кои таа изјавува дека има бугарска самосвест
Потпретседателката на Бугарија Илијана Јотова тврди дека лично ги видела документите на министерката за енергетика, рударство и минерални суровини, Сања Божиновска во кои таа изјавува дека има бугарска самосвест и потекло, јавува БТА.
Илијана Јотова во обраќање од Ќустендил ги повика и своите македонски колеги со поголемо разбирање да ги читаат европските вредности.
Таа кажа дека почитувањето на човековите права е клучно во преговорите за членство во ЕУ, особено во првото поглавје.
Јотова рече дека ако една земја членка смета дека од страна на земјата кандидат не се почитуваат човековите права и правата на малцинствата, процесот кон ЕУ не може да продолжи.
Свет
Сијарто: Односите меѓу Унгарија и Луксембург се карактеризираат со меѓусебно почитување
Министерот за надворешни работи и трговија на Унгарија, Петер Сијарто, денеска изјави дека односите меѓу таа земја и Луксембург од неодамна повторно се карактеризираат со меѓусебно почитување.
„Обеменот на билатералната трговија се зголеми четирипати во изминатата деценија. Подобрувањето на конкурентноста на ЕУ е заедничка цел, затоа ги поддржуваме мерките неопходни за функционирање на светскиот трговски систем заснован на правила, без вештачки бариери“, соопшти Сијарто.
Сијарто го пречека својот луксембуршки колега Ксавиер Бетел во Будимпешта првпат во неговиот децениски мандат.