Спорт
Ред Бул мора да го смени болидот во Остин
Ред Бул потврдија дека ќе мора да направат корекции на нивниот болид пред Американското ГП во Остин, бидејќи тоа од нив го побарале од ФИА. Ова е само продолжение на проблемите со кои се соочува тимот во вториот дел од сезоната, чиј прв возач е Макс Ферстапен, трикратен последователен светски шампион и актуелен лидер во шампионатот.
Ривалските тимови ја предупредија ФИА дека Ред Бул има уред во кокпитот со кој може да ја прилагоди висината на подот на болидот. Тие сметаа дека тимот може да направи одредени промени во поставеноста помеѓу квалификациите и трката, што не е дозволено.
„Точно е дека го имаме тој уред, но не може да се користи за време на трката. Ја информиравме ФИА за ова и ни беше кажано дека можеме да го развиеме“, велат од Ред Бул.
Светската автомобилска федерација (ФИА) има друга верзија на приказната.
„Не сакаме некој да биде фаворизиран. Не се дозволени какви било промени помеѓу квалификациите и трката. Правилата важат за сите тимови“.
Макс Ферстапен смета дека оваа одлука на ниту еден начин не му штети на неговиот тим.
„Кога го прочитав, мислев дека се работи за друг тим, а потоа сфатив дека се работи за нас. Никогаш не разговаравме за тоа на тимските состаноци, бидејќи тој уред не може да се користи кога болидот е подготвен за трка. Сето ова нема да има никакво влијание врз моето возење“, изјави Макс.
Свое мислење за целиот случај имаше и неговиот најголем ривал во борбата за тронот, Британецот Ландо Норис.
„Едно е да имаш уред, друга работа е колку го користиш, за што немаме поим. Можно е нешто такво да ви помогне да бидете побрзи десетинка или две во квалификациите, што може да одлучи дали ќе бидете на пол-позицијата или на второто место“.
Тимовите сакаат болидот да биде понизок во квалификациите и повисок за време на самата трка. Во секој случај, оваа предигра ќе ја направи трката во Остин уште поинтересна.
Ферстапен води во шампионатот со 52 бода разлика пред Ландо Норис, но Холанѓанецот нема победа од јуни. Остануваат уште шест трки до крајот на оваа сезона, вклучувајќи ја и оваа во Тексас.
Целата акција во Остин, започнува во петок во 19:30 часот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Спорт
Лазаров ги испофали Литванците: Постигнуваат многу голови, тие се опасен тим
Извор/ rkalkaloid.mk
РК Алкалоид ја почнува својата втора европска сезона. По ланскиот настап во Лига Европа во која ја запиша својата историска прва победа, а и првиот освоен бод на гости, сезонава РК Алкалоид ќе се натпреварува во ЕХФ Европскиот куп.
РК Алкалоид има амбиции да стигне колку што може подалеку во овие нокаут дуели, а прв противник на избраниците на Кире Лазаров ќе им биде литванскиот вицепрвак Клаипеда Драгунас. Тоа е клуб што годинава има шампионски амбиции, за таа цел ангажираше и тренер од Шпанија, а во ЕХФ Европски Куп исто така има амбиции да стигне што подалеку.
„Се наоѓаме пред еден нов предизвик во Европскиот куп. Конкретно, имаме еден ривал кој што можеби е неатрактивен за нас, но е доста опасен. Се работи за незгодна школа, тим кој оваа година е воден од шпански тренер и полека од материјалите се гледа напредокот на Клаипеда. Ако направиме споредба, мислам дека, да не претерам, тие се подобри за 35% и затоа сум доста внимателен во најавите, заедно со мојот тим и со моите играчи, затоа што системот на играње е дома-гости, не е групна фаза и треба да се биде доста претпазлив. Од она што го имаме како информација, се работи за тим кој дава многу голови, над 40 гола во поголемиот дел од натпреварите. Ривалот игра во силен ритам, без разлика на противникот. Ние сме цврсто на земја заедно со играчите, добро се подготвуваме и можам да ветам дека нема да го потцениме противникот. Очекувам квалитетен меч, убав ракомет за око. Испраќам покана до навивачите, да дојдат во салата Автокоманда и да бидат поддршка на овој млад и македонски тим“, изјави тренерот Лазаров.
Алкалоид има брилијантен старт во новата сезона, го освои Суперкупот на Македонија, а во првенството има седум победи во исто толку натпревари.
Натпреварот Алкалоид-Драгунас Клаипеда се игра утре во 19 часот во салата во Автокоманда.
Спорт
Џовани Симеоне: Нема разлика меѓу Конте и мојот татко, опседнати се со фудбалот
Фудбалерот на Наполи, Џовани Симеоне за италијанските медиуми го спореди тренерот Антонио Конте со неговиот татко, тренер на Атлетико Мадрид, Диего Чоло Симеоне..
„Тренерот е 100% посветен на Наполи, полн со концентрација. Тој навистина ме потсетува на мојот татко Диего. Во главата ја има страста кон фудбалот. Тој гледа сè, тој чувствува, а тоа доаѓа од неговото искуство и гледање натпревари о часови. Така знаете кога да напаѓате, кога да се браните, тоа се квалитети на големите тренери“, изјави младиот Симеоне.
Синот на славниот Чоло проговори и за конкуренцијата во нападот, не му пречи што предност има Ромелу Лукаку.
„Импресиониран сум од Лукаку како личност. Тој е многу интелигентен и одличен соиграч, им помага на другите. Тоа го става во позиција на лидер, покрај тоа што е одличен играч”, изјави Симеоне.
Наполи моментално е на првото место на табелата во Серија А со 16 освоени бодови од седум натпревари.
Спорт
ФБИ лови поранешен олимпиец за дилање дрога и убиство
Поранешниот сноубордер Рајан Вединг го бара ФБИ во операцијата Слалом. Имено, ФБИ има издадено потерница по 43-годишникот и нуди награда од 50.000 долари за информација која ќе доведе до негово апсење.
Вединг се бара поради наводно водење и учество во транснационална операција за шверц на стотици килограми кокаин од Колумбија, преку Мексико и јужна Калифорнија, во Канада и остатокот од САД.
Во налогот за апсење се наведува дека Вединг бил вмешан во организирање на повеќе убиства поврзани со дрога. Американските медиуми пишуваат дека Вединг е познат во шверцерскиот свет по прекарите Шефот, Гигант и Јавен Непријател и дека е дел од криминална организација која работи под заштита на озлогласениот мексикански картел Синалоа.
Мартин Естрада, федералниот обвинител за Калифорнија, потврди дека Вединг е обвинет за водење на транснационална организирана криминална група која била вклучена во шверц на кокаин и убиства на невини цивили. Локалните власти уапсија повеќе од десет лица во рамките на операцијата Слалом, но Вединг и уште тројца се уште се во бегство.
Полицијата заплени повеќе од еден тон огнено оружје и муниција, 250.000 долари во кеш и 3,2 милиони евра во криптовалути.
Американските власти тврдат дека обвинетите поседувале кокаин вреден меѓу 23 и 25 милиони долари.
Поранешниот олимпиец може да биде осуден на доживотен затвор. Само по обвиненијата за трговија со дрога, доколку биде осуден, Вединг се соочува со минимум десет години затвор.
Обвиненијата за убиство и злосторничко здружување, носат доживотна казна во федерален затвор.
Вединг учествуваше на Зимските олимписки игри 2002 во Солт Лејк Сити како член на канадската репрезентација, со која заврши на 24. место во слалом.