Спорт
Џовани Симеоне: Нема разлика меѓу Конте и мојот татко, опседнати се со фудбалот
Фудбалерот на Наполи, Џовани Симеоне за италијанските медиуми го спореди тренерот Антонио Конте со неговиот татко, тренер на Атлетико Мадрид, Диего Чоло Симеоне..
„Тренерот е 100% посветен на Наполи, полн со концентрација. Тој навистина ме потсетува на мојот татко Диего. Во главата ја има страста кон фудбалот. Тој гледа сè, тој чувствува, а тоа доаѓа од неговото искуство и гледање натпревари о часови. Така знаете кога да напаѓате, кога да се браните, тоа се квалитети на големите тренери“, изјави младиот Симеоне.
Синот на славниот Чоло проговори и за конкуренцијата во нападот, не му пречи што предност има Ромелу Лукаку.
„Импресиониран сум од Лукаку како личност. Тој е многу интелигентен и одличен соиграч, им помага на другите. Тоа го става во позиција на лидер, покрај тоа што е одличен играч”, изјави Симеоне.
Наполи моментално е на првото место на табелата во Серија А со 16 освоени бодови од седум натпревари.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Спорт
Ѓоковиќ нема намера да се пензионира
Новак Ѓоковиќ истакнува дека се уште нема да се пензионира, иако признава дека му е се потешко да се мотивира.
Во интервју за аргентинскиот Ла Насион, Ѓоковиќ исто така беше запрашан што го мотивира по сето она што го помина во тенисот.
„Тоа е легитимно прашање. Длабоко во себе чувствувам дека можам да освојам повеќе Грен слем титули. Она што сè уште ме мотивира да се натпреварувам, особено на слемовите, е чувството дека сум кандидат за освојување на тие трофеи. Исто така, сакам да настапувам во Дејвис купот за Србија“, изјави Ѓоковиќ и додаде:
„Исто така, тенисот е сè уште најголемата платформа што ја имам за да правам некои други работи што ме интересираат, да ги споделам пораките што мислам дека треба, без разлика дали е тоа тенис, општеството како целина, некој деловен потфат што го имам или нешто што го гради моето наследство, мојот бренд. Сè уште чувствувам дека уживам во целиот процес и ми носи многу придобивки. Tогаш зошто да не продолжам?“
Новак е свесен дека многумина веруваат дека треба да се пензионира додека е на врвот.
„Велат, освои злато, освои сè, време е да кажеш „збогум“. Од друга страна, некои мислат дека треба да продолжам се додека мислам дека можам да бидам фаворит за грен слем титули. Јас сум поблизок со овие другите. Можеби ќе се предомислам, не знам, но засега се чувствувам како да сакам да продолжам. Уште колку? Сè потешко ми е да патувам и да пронајдам мотивација. Не е лесно, особено со децата, не сакам долго да отсуствувам од дома, но сепак имам нешто што ме води. Жал ми е за оние кои сакаат да се пензионирам, затоа што ќе мора да ме гледаат уште некое време“.
Ѓоковиќ во сабота ќе игра со Рафаел Надал на егзибиција во Ријад, а потоа треба да соопшти дали планира да игра на мастерсот Париз и завршниот Мастерс во Торино.
Спорт
Лазаров ги испофали Литванците: Постигнуваат многу голови, тие се опасен тим
Извор/ rkalkaloid.mk
РК Алкалоид ја почнува својата втора европска сезона. По ланскиот настап во Лига Европа во која ја запиша својата историска прва победа, а и првиот освоен бод на гости, сезонава РК Алкалоид ќе се натпреварува во ЕХФ Европскиот куп.
РК Алкалоид има амбиции да стигне колку што може подалеку во овие нокаут дуели, а прв противник на избраниците на Кире Лазаров ќе им биде литванскиот вицепрвак Клаипеда Драгунас. Тоа е клуб што годинава има шампионски амбиции, за таа цел ангажираше и тренер од Шпанија, а во ЕХФ Европски Куп исто така има амбиции да стигне што подалеку.
„Се наоѓаме пред еден нов предизвик во Европскиот куп. Конкретно, имаме еден ривал кој што можеби е неатрактивен за нас, но е доста опасен. Се работи за незгодна школа, тим кој оваа година е воден од шпански тренер и полека од материјалите се гледа напредокот на Клаипеда. Ако направиме споредба, мислам дека, да не претерам, тие се подобри за 35% и затоа сум доста внимателен во најавите, заедно со мојот тим и со моите играчи, затоа што системот на играње е дома-гости, не е групна фаза и треба да се биде доста претпазлив. Од она што го имаме како информација, се работи за тим кој дава многу голови, над 40 гола во поголемиот дел од натпреварите. Ривалот игра во силен ритам, без разлика на противникот. Ние сме цврсто на земја заедно со играчите, добро се подготвуваме и можам да ветам дека нема да го потцениме противникот. Очекувам квалитетен меч, убав ракомет за око. Испраќам покана до навивачите, да дојдат во салата Автокоманда и да бидат поддршка на овој млад и македонски тим“, изјави тренерот Лазаров.
Алкалоид има брилијантен старт во новата сезона, го освои Суперкупот на Македонија, а во првенството има седум победи во исто толку натпревари.
Натпреварот Алкалоид-Драгунас Клаипеда се игра утре во 19 часот во салата во Автокоманда.
Спорт
ФБИ лови поранешен олимпиец за дилање дрога и убиство
Поранешниот сноубордер Рајан Вединг го бара ФБИ во операцијата Слалом. Имено, ФБИ има издадено потерница по 43-годишникот и нуди награда од 50.000 долари за информација која ќе доведе до негово апсење.
Вединг се бара поради наводно водење и учество во транснационална операција за шверц на стотици килограми кокаин од Колумбија, преку Мексико и јужна Калифорнија, во Канада и остатокот од САД.
Во налогот за апсење се наведува дека Вединг бил вмешан во организирање на повеќе убиства поврзани со дрога. Американските медиуми пишуваат дека Вединг е познат во шверцерскиот свет по прекарите Шефот, Гигант и Јавен Непријател и дека е дел од криминална организација која работи под заштита на озлогласениот мексикански картел Синалоа.
Мартин Естрада, федералниот обвинител за Калифорнија, потврди дека Вединг е обвинет за водење на транснационална организирана криминална група која била вклучена во шверц на кокаин и убиства на невини цивили. Локалните власти уапсија повеќе од десет лица во рамките на операцијата Слалом, но Вединг и уште тројца се уште се во бегство.
Полицијата заплени повеќе од еден тон огнено оружје и муниција, 250.000 долари во кеш и 3,2 милиони евра во криптовалути.
Американските власти тврдат дека обвинетите поседувале кокаин вреден меѓу 23 и 25 милиони долари.
Поранешниот олимпиец може да биде осуден на доживотен затвор. Само по обвиненијата за трговија со дрога, доколку биде осуден, Вединг се соочува со минимум десет години затвор.
Обвиненијата за убиство и злосторничко здружување, носат доживотна казна во федерален затвор.
Вединг учествуваше на Зимските олимписки игри 2002 во Солт Лејк Сити како член на канадската репрезентација, со која заврши на 24. место во слалом.