Македонија
Таравари ја прими вакцината против грип и повика граѓаните да се заштитат: Спречува компликации, особено кај повозрасните што имаат и други болести
Министерот за здравство, Арбен Таравари, и директорката на Институтот за јавно здравје, Марија Андоновска, утрово се вакциинираа против грип и повикаа тоа да го направат и здравствените работници и граѓаните што спаѓаат во групата ранливи категории, односно лицата што имаат други болести и повозрасните. Досега вакцина против грип примиле 10.000 граѓани.
„Има посебна веб-страница на која може да се јават сите граѓани, ‘Вакцинација.мк’. Досега се пријавени 52.000 граѓани, кои треба да примат вакцина на 36 пункта, кои се отворени во државата. Ја користам пригодата да ги повикам сите граѓани, особено оние што се ранливи категории, да ја примат оваа вакцина бидејќи оневозможува да се појават компликации, особено кај повозрасните луѓе, кои имаат и други коморбидитети“, рече утрово министерот Таравари.
За заштита од сезонскиот грип Министерството за здравство и Институтот за јавно здравје набавија вкупно 70.000 вакцини. Од денес на терен излегуваат мобилни екипи за вакцинирање на здравствените работници.
„На инсистирање на министерот за поголема ефикасност, а во договор со него, Институтот за јавно здравје формира мобилни екипи, кои од денес ќе почнат да одат на терен во здравствените установи од три причини. Прво, да им олесниме на здравствените работници, второ, да ја зголемиме бројката на вакцинирани и нашата трета цел е да бидеме поефикасни, да завршиме побргу за да може Институтот да продолжи и понатаму со вакцинација на другите граѓани, да го искористиме и овој пункт“, рече директорката Андоновска.
Вакцинацијата против сезонскиот грип почна минатата недела.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Гаши – Цамај: продлабочување на парламентарната соработката
Денеска во Рига, претседателот на Собранието на Република Северна Македонија, Африм Гаши, оствари средба со потпретседателот на Парламентот на Црна Гора, Никола Цамај.
На средбата се дискутираше за соработката меѓу двата Парламента, вклучувајќи размена на практики и посети на службата, како и можностите за продлабочување на соработка во иднина.
Исто така, двајцата претставници разменија мислења за процесот на интеграција во Европската Унија на Северна Македонија и Црна Гора, нагласувајќи ја улогата на парламентите во процесот на усогласување на законодавството со европското.
На крајот од средбата, Цамај изрази подготвеност да го посети Собранието на Северна Македонија во блиска иднина.
Македонија
Сиљановска-Давкова – Фон дер Лајен: изразено очекување дека процесот на интеграција ќе се спроведе врз основа на принципот на заслуги
Претседателката Гордана Сиљановска Давкова денеска оствaри средба со претседателката на Европската Комисија, Урсула фон дер Лајен.
На средбата беа разменети мислења и информации за евроинтеграцискиот процес на земјава и перспективите за напредок, имплементацијата на реформите и придобивките од Планот за раст на Европската Унија за Западен Балкан.
Заблагодарувајќи се за нејзиниот личен ангажман и заложби во однос на проширувањето, претседателката Сиљановска Давкова посочи дека Планот за раст е важен механизам со голем потенцијал, кој ќе ги забрза реформите, ќе придонесе за стандардизација, економскиот раст и напредок и ќе ја приближи земјата до Европската Унија.
Претседателката истакна дека македонските институции во повеќе области се подготвени за забрзана интеграција и вклучување во повеќе иницијативи и мрежи на ЕУ и изрази очекување дека процесот на интеграција ќе се спроведе врз основа на принципот на заслуги и Копенхагенските критериуми, пoтенцирајќи дека во нив е клучот за нашиот развој.
Посочувајќи ја важноста од одржување на кредибилитетот на Европската Унија во однос на политиката на проширувањето, претседателката ја истакна потребата од засилена поддршка од страна на европските институции со цел надминување на билатералните предизвици и забрзување на евроинтеграциите.
Претседателката изрази подготвеност за натамошно продолжување на дијалогот и ја истакна важноста новиот пристап на постепена, фазна интеграција да продолжи паралелно со процесот на пристапување.
Во контекст на регионалните случувања, претседателката Сиљановска Давкова посочи дека напредокот постигнат од секоја земја-кандидат од Западен Балкан позитивно влијае на регионалната динамика на пристапување во ЕУ и ги истакна своите заложби за натамошно унапредување на севкупната регионална соработка во интерес на заедничката стабилност, безбедност и просперитет.
Македонија
Љутков и Сирс потпишаа меморандум за разбирање: платформа за развој на културната и креативната економија
Министерот за култура и туризам, Зоран Љутков, и директорката на канцеларијата на Британскиот совет за Западен Балкан, Клер Сирс, денеска потпишаа Меморандум за разбирање за периодот 2024 – 2027 година, кој е важен чекор кон зајакнување на соработката во областа на уметноста, културата и креативната економија.
Со потпишувањето на Меморандумот се реафирмира 30-годишното партнерство и пријателство меѓу Северна Македонија и Обединетото Кралство, а со тоа и можноста за поголема достапност на програмите на Британскиот совет во нашата земја и засилени кампањи за нивна афирмација.
„Потпишувањето на овој меморандум е потврда за добрите односи меѓу канцеларијата на Британскиот совет и Министерството за култура и туризам. Соработката ќе овозможи размена на знаења и искуства, како и реализација на различни проекти кои ќе го зголемат влијанието на креативната економија и ќе ја збогатат културната понуда во земјава“, рече Љутков.
Министерот изрази уверување дека Меморандумот ќе отвори нови можности за културна размена и соработка помеѓу уметниците и нагласи дека тој ќе биде платформа за иновации и креативност, а тоа ќе придонесе за подобрување на културниот дијалог и развој на локалната културна сцена. Таквата соработка ќе им овозможи на уметниците да се поврзат, да разменуваат идеи и да учествуваат во меѓународни проекти.
Со Меморандумот е предвидено да се спроведуваат проекти и активности во следниве области: градење капацитети за професионалци, филм, музика, визуелни уметности, театар, игри, технологија, културно наследство, дизајн, архитектура, мода и издаваштво.
Директорката Сирс очекува потпишувањето на Меморандумот за разбирање и улогата на Британскиот совет да придонесат за продлабочување на културните врски и за зголемување на иницијативите за реализација на значајни проекти.
„Овој меморандум за разбирање го означува почетокот на една нова ера во нашата соработка со Северна Македонија. Ќе бидеме непосредно вклучени во дополнителното зајакнување на енергичната креативна економија на земјата, особено во контекст на претстојните големи настани кои ќе понудат единствена можност да се прикаже талентот на Северна Македонија на пошироката сцена. Посебно сум задоволна што нашето партнерство доби нов замав благодарејќи на министерот Зоран Љутков и со нетрпение очекувам ова да биде првиот од многуте проекти што ќе ги реализираме заедно“, изјави Сирс.
Амбасадорот на Обединетото Кралство во земјава, Метју Лосон, кој присуствуваше на потпишувањето, рече дека овој документ е значаен чекор за долгорочна и продуктивна соработка меѓу двете земји.
„Особено сум горд и се радувам што присуствував на денешното потпишување на Меморандумот за разбирање меѓу Британскиот совет и Министерството за култура и туризам. Ова е потврда за продлабочување на нашите културни врски и британско-македонските односи. Одбединетото Кралство има многу да понуди во однос на креативните економии и развој на овој сектор во земјата. Заедно ќе работиме кон реализирање на многубројни проекти со поддршка од Британскиот совет и во соработка со Министерството за култура и туризам”, истакна Лосон.
Очекувањата се дека Меморандумот ќе придонесе за продлабочување на културните врски и за зголемување на заедничките иницијативи.